ದೇಶದಲ್ಲಿ ಬಿಜೆಪಿಗೆ ಪೂರಕ ವಾತಾವರಣ ಇಲ್ಲ: ಸಿಎಂ

Team Udayavani, Apr 4, 2019, 6:15 AM IST

ಶಿವಮೊಗ್ಗ: ಬುರುಡೆ ಭಾಷಣಗಳಿಂದ ರಾಷ್ಟ್ರೀಯ ಹಿತಾಸಕ್ತಿ ಕಾಪಾಡಲು ಸಾಧ್ಯವಿಲ್ಲ.ಯುಪಿಎ ಅಥವಾ ಹಿಂದಿನ ಸರಕಾರಗಳು ಅಧಿಕಾರದಲ್ಲಿದ್ದಾಗ ದೇಶದ ರಕ್ಷಣೆಗಾಗಿ ನರೇಂದ್ರ ಮೋದಿಗಿಂತಲೂ ಹತ್ತು ಪಟ್ಟು ಮುಂದೆ ಹೋಗಿ ಕೆಲಸ ಮಾಡಿವೆ ಎಂದು ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಹೇಳಿದರು.

ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿ, ಬಿಜೆಪಿಯವರು ಐದು ವರ್ಷದಲ್ಲಿ ಬಡವರು, ರೈತರ ಕಷ್ಟ ಪರಿಹಾರಕ್ಕೆ ಏನು ಯೋಜನೆ ಕೊಟ್ಟಿದ್ದಾರೆ ಎಂಬುದನ್ನು ಹೇಳಲಿ ಎಂದರು.

ಮೈತ್ರಿ ಪಕ್ಷದಿಂದ ಈಗಾಗಲೇ ಈ ವರ್ಷದ ಬಜೆಟ್‌ ಮಂಡಿಸಲಾಗಿದೆ. ಇದಕ್ಕಿಂತ ದೊಡ್ಡ ಪ್ರಣಾಳಿಕೆ ಇನ್ನೊಂದಿಲ್ಲ. ಕೇಂದ್ರದಲ್ಲಿ ಯಾವುದೇ ಪಕ್ಷ ಅ ಧಿಕಾರಕ್ಕೆ ಬರುವ ವಿಶ್ವಾಸವಿಲ್ಲ. ಇಲ್ಲಿನ ನಾಯಕರು ಈಗಾಗಲೇ ಬಿಜೆಪಿ 300 ಸೀಟು ಗೆದ್ದಿದೆ ಎಂದು ಹೇಳುತ್ತಿದ್ದಾರೆ. ಆ ರೀತಿಯ ವಾತಾವರಣ ದೇಶದಲ್ಲಿ ಇಲ್ಲ ಎಂದು ತಿರುಗೇಟು ನೀಡಿದರು.

ಈಶ್ವರಪ್ಪನವರು ನೆಗೆದು ಬೀಳ್ತಾರೆ ಎಂಬ ಹೇಳಿಕೆಗೆ ಪ್ರತಿಕ್ರಿಯಿಸಿದ ಅವರು, ನೆಗೆದು ಬೀಳುವುದು ಎಂದರೆ ಸಾಯುತ್ತಾರೆ ಎಂದು ಅಲ್ಲ, ಜಂಪ್‌ ಮಾಡ್ತಾರೆ, ಜಂಪ್‌ ಮಾಡಿ ಬೀಳ್ತಾರೆ ಎಂದು ಹೇಳಿರಬಹುದು. ಅದನ್ಯಾಕೆ ತಿರುಚಿ ಹೇಳಲಿ ಪಾಪ ಬಿಡಿ. ಅವರು ಹಳ್ಳಿ ಭಾಷೆಯಲ್ಲಿ ಮಾತನಾಡಿರಬಹುದು ಎಂದರು.