ಅಜೆಕಾರು: ಪ್ರಯೋಜನಕ್ಕೆ ಬಾರದ ದಾರಿ ದೀಪ

Team Udayavani, Apr 6, 2019, 6:15 AM IST

ಅಜೆಕಾರು: ಮರ್ಣೆ ಪಂಚಾಯತ್‌ ವ್ಯಾಪ್ತಿಯ ಅಜೆಕಾರು ಪೇಟೆಯಲ್ಲಿ ರಸ್ತೆ ಚತುಷ್ಪಥ ಮಾಡುವ ಸಂದರ್ಭ ರಸ್ತೆ ವಿಭಾಜಕಗಳನ್ನು ನಿರ್ಮಿಸಲಾಗಿದ್ದು ಇದಕ್ಕೆ ಅಳವಡಿಸಲಾದ ದಾರಿ ದೀಪಗಳಲ್ಲಿ ಬಹುತೇಕ ಉರಿಯದೆ ನಿಷ್ಪ್ರಯೋಜಕವಾಗಿದೆ.

ಕಳೆದ ವರ್ಷ ರಸ್ತೆ ವಿಭಾಜಕಗಳ ನಡುವೆ 8 ದಾರಿ ದೀಪಗಳನ್ನು ಅಳವಡಿಸಲಾಗಿತ್ತು. ಅಳವಡಿಸಿದ ಕೆಲವೇ ದಿನಗಳಲ್ಲಿ ಬಹುತೇಕ ದೀಪಗಳು ಉರಿಯದೆ ಪ್ರಯೋಜನಕ್ಕೆ ಬಾರದಂತಾಗಿದೆ.

ದಾರಿ ದೀಪಗಳು ಉರಿಯದೆ ವರ್ಷ ಕಳೆಯುತ್ತಾ ಬಂದರೂ ಸಂಬಂದಪಟ್ಟ ಗುತ್ತಿಗೆದಾರರು ದುರಸ್ತಿಪಡಿಸದೆ ಸಾರ್ವಜನಿಕರಿಗೆ ಸಮಸ್ಯೆ ಉಂಟಾಗುವಂತೆ ಮಾಡಿದ್ದಾರೆ.ಪಂಚಾಯತ್‌ ಆಡಳಿತವು ದಾರಿ ದೀಪ ಅವ್ಯವಸ್ಥೆಯ ಬಗ್ಗೆ ಗುತ್ತಿಗೆದಾರರ ಗಮನಕ್ಕೆ ತಂದಿದ್ದರೂ ಯಾವುದೇ ಪ್ರಯೋಜನವಿಲ್ಲದಂತಾಗಿದೆ.

ದಾರಿ ದೀಪ ಅಳವಡಿಕೆ ಕಾಮಗಾರಿ ಮುಗಿದು ಒಂದು ವರ್ಷ ಕಳೆದಿದ್ದರೂ ಇನ್ನೂ ಸಹ ಪಂಚಾಯತ್‌ ಆಡಳಿತಕ್ಕೆ ಗುತ್ತಿಗೆದಾರ ಹಸ್ತಾಂತರಿಸದೆ ಇರುವುದರಿಂದ ಪಂಚಾಯತವೂ ಸಹ ಈ ದಾರಿ ದೀಪಗಳನ್ನು ದುರಸ್ತಿಪಡಿಸಲಾಗದೆ ಅಸಹಾಯಕವಾಗಿದೆ.