ಫ‌ಲಿತಾಂಶ ತಡವಾದರೂ ಶೇ. 50 ವಿವಿಪ್ಯಾಟ್‌ ಲೆಕ್ಕ ಮಾಡಿ!

Team Udayavani, Apr 8, 2019, 6:30 AM IST

ಚುನಾವಣೆ ಫ‌ಲಿತಾಂಶ ಪ್ರಕಟಿಸಲು 6 ದಿನ ವಿಳಂಬವಾದರೂ ಸರಿ, ಶೇ.50ರಷ್ಟು ವಿವಿಪ್ಯಾಟ್‌ ಸ್ಲಿಪ್‌ಗ್ಳನ್ನು ಲೆಕ್ಕ ಮಾಡಬೇಕು ಎಂದು 21 ವಿಪಕ್ಷಗಳು ಸುಪ್ರೀಂಕೋರ್ಟ್‌ಗೆ ತಿಳಿಸಿವೆ. ಚುನಾವಣೆ ಪ್ರಕ್ರಿಯೆ ಸಶಕ್ತವಾಗುತ್ತದೆ ಎಂದಾದರೆ ಇದು ಗಂಭೀರ ವಿಳಂಬವೇನಲ್ಲ ಎಂದು ವಿಪಕ್ಷಗಳು ಹೇಳಿವೆ.

ಟಿಡಿಪಿ ಮುಖ್ಯಸ್ಥ ಚಂದ್ರಬಾಬು ನಾಯ್ಡು ಸಲ್ಲಿಸಿದ ಅರ್ಜಿಗೆ ಪ್ರತಿಕ್ರಿಯೆ ನೀಡಿದ್ದ ಚುನಾವಣಾ ಆಯೋಗವು ಶೇ. 50 ರಷ್ಟು ವಿವಿಪ್ಯಾಟ್‌ ರಸೀದಿಗಳನ್ನು ಪರಿಶೀಲಿಸಿದರೆ ಫ‌ಲಿತಾಂಶ ಘೋಷಿಸಲು 5.2 ದಿನಗಳವರೆಗೆ ವಿಳಂಬ ವಾಗುತ್ತದೆ ಎಂದು ಸುಪ್ರೀಂಕೋರ್ಟ್‌ಗೆ ಹೇಳಿತ್ತು. ಹೀಗಾಗಿ ಇದಕ್ಕೆ ಪ್ರತಿಕ್ರಿಯೆ ನೀಡುವಂತೆ ವಿಪಕ್ಷಗಳಿಗೆ ಸುಪ್ರೀಂ ಕೋರ್ಟ್‌ ಸೂಚಿಸಿತ್ತು. ಸದ್ಯ ವಿಧಾನಸಭೆ ಚುನಾವಣೆಯಲ್ಲಿ ಒಂದು ವಿಧಾನಸಭೆ ಕ್ಷೇತ್ರದಲ್ಲಿನ ಒಂದು ಬೂತ್‌ನಲ್ಲಿ ಮತ್ತು ಲೋಕಸಭೆ ಚುನಾವಣೆಯಲ್ಲಿ ಒಂದು ವಿಧಾನಸಭೆ ಕ್ಷೇತ್ರದ ವ್ಯಾಪ್ತಿಯಲ್ಲಿನ ಒಂದು ಮತಗಟ್ಟೆಯಲ್ಲಿನ ವಿವಿಪ್ಯಾಟ್‌ ಸ್ಲಿಪ್‌ಗ್ಳನ್ನು ಲೆಕ್ಕ ಹಾಕಲಾಗುತ್ತಿದೆ. ಅರ್ಜಿಯ ವಿಚಾರಣೆ ಸೋಮವಾರ ನಡೆಯಲಿದೆ.