ಪ್ಲೇ ಆಫ್ ಪಂದ್ಯಗಳ ನಡುವೆ ವನಿತಾ ಐಪಿಎಲ್‌ ಟೂರ್ನಿ

Team Udayavani, Apr 9, 2019, 6:30 AM IST

ಹೊಸದಿಲ್ಲಿ: 12ನೇ ಆವೃತ್ತಿಯ ಪ್ಲೇ ಆಫ್ ಪಂದ್ಯಗಳ ವೇಳೆ 3 ತಂಡಗಳ ವನಿತಾ ಐಪಿಎಲ್‌ ಕೂಟ ನಡೆಸಲು ನಿರ್ಧರಿಸಲಾಗಿದೆ. ಪ್ಲೇ ಆಫ್ ಪಂದ್ಯಗಳ ತಾಣಗಳಾದ ಚೆನ್ನೈ, ಹೈದರಾಬಾದ್‌ ಮತ್ತು ವಿಶಾಖಪಟ್ಟಣದಲ್ಲೇ ವನಿತಾ ಪಂದ್ಯಗಳು ನಡೆಯಲಿವೆ.

ಪುರುಷರ ಪಂದ್ಯಗಳು ರಾತ್ರಿ 8 ಗಂಟೆಗೆ ನಡೆದರೆ, ಸಂಜೆ 4 ಗಂಟೆ ವನಿತೆಯರ ಪಂದ್ಯಗಳನ್ನಾಡಿಸಲು ಬಿಸಿಸಿಐ ತೀರ್ಮಾನಿಸಿದೆ. ರೌಂಡ್‌ ರಾಬಿನ್‌ ರೀತಿಯಲ್ಲಿ ಪಂದ್ಯಗಳು ನಡೆಯಲಿದ್ದು, ಅಗ್ರ 2 ತಂಡಗಳು ಫೈನಲ್‌ ಪ್ರವೇಶಿಸಲಿವೆ. ಫೈನಲ್‌ ಕೂಡ ಪುರುಷರ ಫೈನಲ್ಸ್‌ ದಿನವೇ (ಮೇ 12) ಸಂಜೆ 4 ಗಂಟೆಗೆ ನಡೆಯಲಿದೆ.

ವನಿತಾ ಬಿಗ್‌ ಬಾಶ್‌ ಲೀಗ್‌, ಕಿಯಾ ಸೂಪರ್‌ ಲೀಗ್‌ನಂತೆ ಪಂದ್ಯಾವಳಿ ನಡೆಸುವುದು ಬಿಸಿಸಿಐ ಯೋಜನೆಯಾಗಿದೆ. ಆದರೆ ಇದು ಯಾವಾಗ ಕಾರ್ಯರೂಪಕ್ಕೆ ಬಂದೀತು ಎಂಬುದು ಕ್ರಿಕೆಟ್‌ ಅಭಿಮಾನಿಗಳ ಕುತೂಹಲ.

6 ದೇಶಗಳ ಆಟಗಾರ್ತಿಯರು
ಕಳೆದ ವರ್ಷ ಮುಂಬಯಿನಲ್ಲಿ 2 ತಂಡಗಳ ಪ್ರದರ್ಶನ ಪಂದ್ಯ ಆಯೋಜಿಸಲಾಗಿತ್ತು. ಈ ವರ್ಷ 14 ಆಟಗಾರ್ತಿಯರನ್ನು ಒಳಗೊಂಡ 3 ತಂಡಗಳು ಈ ಪ್ರದರ್ಶನ ಕೂಟದಲ್ಲಿ ಸ್ಪರ್ಧಿಸಲಿವೆ. 6 ದೇಶಗಳ ಆಟಗಾರ್ತಿಯರು ಈ ಬಾರಿಯ ಕೂಟದಲ್ಲಿ ಪಾಲ್ಗೊಳ್ಳುತ್ತಿರುವುದು ವಿಶೇಷ. ಕಳೆದ ವರ್ಷ ಕೂಟದಲ್ಲಿ ಭಾಗವಹಿಸಿದ ಅಗ್ರ ಆಟಗಾರ್ತಿಯರಾದ ಡೇನ್‌ ವಾನ್‌ ನೀಕರ್ಕ್‌, ಡಿಯಾಂಡ್ರಾ ಡಾಟಿನ್‌, ಮರಿಜಾನ್‌ ಕಾಪ್‌, ಚಾಮರಿ ಅತ್ತಪಟ್ಟು ಈ ಬಾರಿಯೂ ಪಾಲ್ಗೊಳ್ಳಲಿದ್ದಾರೆ.