ನಗರದಲ್ಲಿ ಟ್ಯಾಂಕರ್‌ ಬಳಕೆ; ಒಡೆದ ಮರಳು ಕಟ್ಟ

Team Udayavani, Apr 13, 2019, 6:00 AM IST

ನಾಗಪಟ್ಟಣದ ಬಳಿ ನೀರಿನ ಸಂಗ್ರಹ ಹೆಚ್ಚಾಗಿ ಮರಳು ಕಟ್ಟ ಒಡೆದು ಹೋಗಿದೆ.

ಸುಳ್ಯ: ಎಂಟು ತಿಂಗಳ ಭಾರೀ ಮಳೆಗೆ ಸಾಕ್ಷಿಯಾಗಿದ್ದ ಸುಳ್ಯ ತಾಲೂಕಿನ ಈಗಿನ ಸ್ಥಿತಿ ತದ್ವಿರುದ್ಧ. 28 ಗ್ರಾ.ಪಂ. ಮತ್ತು ನ.ಪಂ. ವ್ಯಾಪ್ತಿಯಲ್ಲಿ ಕುಡಿಯುವ ನೀರಿನ ಅಭಾವ ಕಾಡಿದೆ. ಭಾಗಮಂಡಲ ಪ್ರದೇಶದಲ್ಲಿ ಮಳೆ ಸುರಿದ ಕಾರಣ ಪಯಸ್ವಿನಿ ನದಿಯಲ್ಲಿ ನೀರಿನ ಹರಿವು ಕಂಡು ಬಂದಿದ್ದು, ನಗರಕ್ಕೆ ನೀರು ಪೂರೈಸಲು ನಿರ್ಮಿಸಿದ ಕಟ್ಟದಲ್ಲಿ ನೀರಿನ ಸಂಗ್ರಹ ಪ್ರಮಾಣ ಕೊಂಚ ಹೆಚ್ಚಾಗಿದೆ.

ಗ್ರಾಮಾಂತರದಲ್ಲಿ ಎರಡು ದಿನ ಕೊಂಚ ಮಳೆ ಸುರಿದು ಇಳೆ ತಂಪಾಗಿದ್ದರೂ ನೀರಿನ ಕೊರತೆ ನೀಗಲಾರದು. ಹಾಗಾಗಿ ಮಳೆ ಕೈ ಕೊಟ್ಟರೆ ಪರಿಸ್ಥಿತಿ ಬರೆಗಾಲದ ಸ್ವರೂಪ ಪಡೆದುಕೊಳ್ಳುವ ಆತಂಕ ಉಂಟಾಗಿದೆ.

ತಾಲೂಕು ಆಡಳಿತ ನೀಡಿದ ವರದಿ ಪ್ರಕಾರ, 28 ಪಂಚಾಯತ್‌ಗಳ ಪೈಕಿ 26ರಲ್ಲಿ ಸಮಸ್ಯೆ ಹೆಚ್ಚಾಗಿದೆ. ಪೆರುವಾಜೆ, ಅಮರಮುಟ್ನೂರು ಗ್ರಾ.ಪಂ. ವ್ಯಾಪ್ತಿಯಲ್ಲಿ ಪರಿಸ್ಥಿತಿ ಪರವಾಗಿಲ್ಲ ಅನ್ನುವುದು ತಾ.ಪಂ. ಮಾಹಿತಿ. ಆದರೆ ಜನ ಹೇಳುವ ಪ್ರಕಾರ ಎಲ್ಲ ಗ್ರಾ.ಪಂ. ವ್ಯಾಪ್ತಿಯಲ್ಲಿ ಸಮಸ್ಯೆ ತಪ್ಪಿಲ್ಲ. ನಳ್ಳಿ ನೀರು, ಸರಕಾರಿ ಬಾವಿ, ಖಾಸಗಿ ಬಾವಿ, ಕೆರೆಗಳನ್ನು ನಂಬಿದ ನಿವಾಸಿಗಳಿಗೂ ನೀರಿಲ್ಲ. ಹಲವು ಕಾಲನಿಗಳಲ್ಲಿ ಮೂರು ದಿನಕ್ಕೊಮ್ಮೆ ನಳ್ಳಿ ನೀರು ಪೂರೈಸಲಾಗುತ್ತಿದೆ.

ವಿದ್ಯುತ್‌ ಶಾಕ್‌
ನಳ್ಳಿ ನೀರು ನಂಬಿದ ಕುಟುಂಬಗಳು ಹನಿ ಹನಿ ನೀರಿಗೂ ಪರದಾಡುವ ಸ್ಥಿತಿ ಉಂಟಾಗಿದೆ. ನೀರು ಲಭ್ಯವಿದ್ದರೂ, ಪೂರೈಕೆಗೆ ವಿದ್ಯುತ್‌ ಸಮಸ್ಯೆ ಅಡ್ಡಿಯಾಗಿದೆ. ತ್ರಿಫೇಸ್‌ ಇಲ್ಲದೆ ಕೊಳವೆಬಾವಿ ಪಂಪ್‌ ಚಾಲೂ ಆಗುತ್ತಿಲ್ಲ. ಕರೆಂಟ್‌ ಬಳಸದೆ ಪರ್ಯಾಯ ವ್ಯವಸ್ಥೆಯಲ್ಲಿ ನೀರೆತ್ತಲು ದಾರಿ ಇಲ್ಲ. ಹೀಗಾಗಿ ಗ್ರಾ.ಪಂ.ಗಳಿಗೆ ನೀರೋದಗಿಸಲು ಸಮಸ್ಯೆ ತಂದೊಡ್ಡಿದೆ.

ನಗರದಲ್ಲಿ ಟ್ಯಾಂಕರ್‌ ಬಳಕೆ
ನಗರದ ಕೆಲವು ವಾರ್ಡ್‌ಗಳಲ್ಲಿ ನೀರಿನ ಸಮಸ್ಯೆ ಉಂಟಾಗಿದೆ. ಅಂಬೆಟಡ್ಕ, ಬೋರುಗುಡ್ಡೆ, ಕುರುಂಜಿಬಾಗ್‌ ಮೊದಲಾದ ಎತ್ತರದ ಪ್ರದೇಶಕ್ಕೆ ನೀರು ಪೂರೈಕೆ ಆಗದ ಕಾರಣ ಟ್ಯಾಂಕರ್‌ನಲ್ಲಿ ವಿತರಿಸಲಾಗುತ್ತಿದೆ. 6000 ಲೀ. ಸಾಮರ್ಥ್ಯದ ಟ್ಯಾಂಕರ್‌ ಇದ್ದು, ಇದರಲ್ಲಿ ನೀರು ಪೂರೈಸಲಾಗುತ್ತಿದೆ.

ಒಡೆದ ಮರಳು ಕಟ್ಟ
ಪಯಸ್ವಿನಿ ನದಿ ಪಾತ್ರದಲ್ಲಿ ಮಳೆ ಸುರಿದಿದ್ದು, ನಾಗಪಟ್ಟಣ ಬಳಿ ನಿರ್ಮಿಸಿದ ಮರಳು ಕಟ್ಟದಲ್ಲಿ ನೀರಿನ ಸಂಗ್ರಹ ಹೆಚ್ಚಿದೆ. ಗುರುವಾರ ರಾತ್ರಿ ಕಟ್ಟದ ಹೆಚ್ಚುವರಿ ನೀರು ನದಿಗೆ ಹರಿದಿದೆ. ಒತ್ತಡ ಹೆಚ್ಚಿ ಕಟ್ಟದ ಒಂದು ಪಾರ್ಶ್ವ ಒಡೆದು ಹೋಗಿ, ಮರಳಿನ ಚೀಲಗಳು ನೀರು ಪಾಲಾಗಿವೆ. ಅದನ್ನು ಮರುಜೋಡಿಸುವ ಕಾರ್ಯಕ್ಕೆ ನ.ಪಂ.ಮುಂದಾಗಿದೆ.