ಟಿಎಂಸಿ ಅಭ್ಯರ್ಥಿ ಪರ ಬಾಂಗ್ಲಾ ನಟನಿಂದ ಚುನಾವಣಾ ಪ್ರಚಾರ: ವರದಿ ಕೇಳಿದ ಕೇಂದ್ರ

Team Udayavani, Apr 16, 2019, 4:16 PM IST

ಹೊಸದಿಲ್ಲಿ : ಬಾಂಗ್ಲಾದೇಶೀ ನಟ ಫ‌ರ್‌ದೂಸ್‌ ಅಹ್ಮದ್‌ ಅವರು ತೃಣ ಮೂಲ ಕಾಂಗ್ರೆಸ್‌ ಅಭ್ಯರ್ಥಿಗಾಗಿ ಲೋಕಸಭಾ ಚುನಾವಣಾ ಪ್ರಚಾರಾಭಿಯಾನದಲ್ಲಿ ತೊಡಗಿಕೊಂಡಿರುವ ಬಗೆಗಿನ ವರದಿಗಳನ್ನು ಅನುಸರಿಸಿ ಕೇಂದ್ರ ಸರಕಾರ ಕೋಲ್ಕತದ ವಿದೇಶೀಯರ ಪ್ರಾದೇಶಿಕ ನೋಂದಾವಣೆ ಅಧಿಕಾರಿಯಿಂದ ವರದಿ ಕೇಳಿರುವುದಾಗಿ ಮೂಲಗಳು ತಿಳಿಸಿವೆ.

ಟಿಎಂಸಿಯ ರಾಯಗಂಜ್‌ ಲೋಕಸಭಾ ಕ್ಷೇತ್ರದ ಅಭ್ಯರ್ಥಿ ಕನ್ಹಯ್ಯಲಾಲ್‌ ಅಗರ್‌ವಾಲ್‌ ಅವರ ಪರವಾಗಿ ಬಾಂಗ್ಲಾ ನಟ ಫ‌ರ್‌ದೂಸ್‌ ಅಹ್ಮದ್‌ ಅವರು ಇತರ ಕೆಲ ಭಾರತೀಯ ಚಿತ್ರ ನಟರೊಂದಿಗೆ ಪ್ರಚಾರಾಭಿಯಾನ ನಡೆಸುತ್ತಿದ್ದಾರೆಂಬ ವರದಿಗಳನ್ನು ಅನುಸರಿಸಿ ಕೇಂದ್ರ ಸರಕಾರ ಈ ಕ್ರಮ ತೆಗೆದುಕೊಂಡಿದೆ.

ಬಾಂಗ್ಲಾ ಚಿತ್ರ ನಟ ಫ‌ರ್‌ದೂಸ್‌ ಅಹ್ಮದ್‌ ಪ್ರಕೃತ ವ್ಯಾಪಾರೋದ್ಯಮ ವೀಸಾದಲ್ಲಿ ಭಾರತಕ್ಕೆ ಬಂದಿರುವುದಾಗಿ ವರದಿಗಳು ತಿಳಿಸಿವೆ.

ಫ‌ರ್‌ದೂಸ್‌ ಅವರು ಭಾರತ-ಬಾಂಗ್ಲಾ ಗಡಿಗೆ ತಾಗಿಕೊಂಡಿರುವ ಹೇಮತಾಬಾದ್‌ ಮತ್ತು ಕರಂದಿಗಿಯಲ್ಲಿ ಚುನಾವಣಾ ಪ್ರಚಾರ ರಾಲಿಯಲ್ಲಿ ಪಾಲ್ಗೊಂಡು ಅಗರ್‌ವಾಲಾ ಪರವಾಗಿ ಮತ ಯಾಚನೆ ನಡೆಸಿದ್ದಾರೆ ಎಂದು ವರದಿಗಳು ತಿಳಿಸಿವೆ.