“ಮತದಾನ ಮಾಡಿ, ದೇಶದ ಭವಿಷ್ಯ ಉಜ್ವಲಗೊಳಿಸಿ’

Team Udayavani, Apr 17, 2019, 3:00 AM IST

ನಟನೆ ಜತೆಗೆ ರಾಜಕೀಯ ಅನುಭವ ಹೊಂದಿರುವ ಹಿರಿಯ ನಟ ಅನಂತ್‌ನಾಗ್‌, ಪ್ರತಿಯೊಬ್ಬರೂ ಮತದಾನ ಮಾಡಬೇಕೆಂದು ಮನವಿ ಮಾಡಿದ್ದಾರೆ. ಮತದಾನದ ಮಹತ್ವ ಹಾಗೂ ಸೂಕ್ತ ಅಭ್ಯರ್ಥಿಯ ಆಯ್ಕೆ ಕುರಿತು ಅನಂತ್‌ನಾಗ್‌ ಇಲ್ಲಿ ಮಾತನಾಡಿದ್ದಾರೆ…

“ನಿಮ್ಮ ಒಂದು ಮತ ದೇಶದ ಭವಿಷ್ಯವನ್ನು ಬದಲಿಸಬಲ್ಲದು. ಮತದಾನದ ಬಗ್ಗೆ ನಿರ್ಲಕ್ಷ್ಯ ಮಾಡಿದರೆ ಮುಂದೆ ನಾವು ಪಶ್ಚಾತ್ತಾಪ ಪಡಬೇಕಾಗುತ್ತದೆ. ನಮ್ಮನ್ನು ಆಳುವ ನಾಯಕ ಹೇಗಿರಬೇಕು ಎಂದರೆ ಆತ, ನಮ್ಮ ಸಮಸ್ಯೆಗಳಿಗೆ ಸ್ಪಂದಿಸಿ, ನಮ್ಮ ಕ್ಷೇತ್ರದ, ರಾಜ್ಯದ, ದೇಶದ ಅಭಿವೃದ್ಧಿಗೆ ಟೊಂಕಕಟ್ಟಿ ನಿಲ್ಲುವವನಾಗಿರಬೇಕು.’

“ನಾನು “ದೇವರ ಮಗ‌’ ಎಂಬ ಸಿನಿಮಾ ಮಾಡಿದ್ದೆ. ಅದರಲ್ಲಿ ಕವಿ ಲಕ್ಷ್ಮಿ ನಾರಾಯಣ ಭಟ್ಟರು ಒಂದು ಕಂದಪದ್ಯ ಬರೆದಿದ್ದರು. ಅದರ ಕೆಲವು ಸಾಲುಗಳು ಹೀಗಿವೆ; “ಕನಸಿನೊಳು, ನನಸಿನೊಳು ಮಾತು ಮತಿ ಮನಸಿನೊಳು ಇನಿತಾದೊಡೆ, ಹುಸಿಯು ಇರದಿರ್ದೊಡೆ ದೈವಕ್ಕೆ, ಧರ್ಮಕ್ಕೆ, ನ್ಯಾಯಕ್ಕೆ, ತಲೆಬಾಗಿ ಪ್ರಜೆಗಳನ್ನು ಸುತರಂತೆ ನಡೆಸಿರ್ದೊಡೆ …’ ಎಂದು ಸಾಗುವ ಆ ಪದ್ಯದಲ್ಲಿ ಒಬ್ಬ ನಾಯಕ ಯಾವ ರೀತಿ ಇರಬೇಕು ಎಂಬುದನ್ನು ಚೆನ್ನಾಗಿ ವಿವರಿಸಿದ್ದರು.

ನನಗೆ ಇವತ್ತಿನ ರಾಜಕಾರಣ ನೋಡುವಾಗ ಆ ಸಾಲು ತುಂಬಾ ಚೆನ್ನಾಗಿ ಹೊಂದುತ್ತದೆ ಎಂಬ ಭಾವನೆ ಇದೆ. ಜನರ ಕಷ್ಟಕ್ಕೆ ಸ್ಪಂದಿಸುವ ಅಭ್ಯರ್ಥಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ಬಂದು ಜನ ಮತ ಹಾಕಬೇಕು ಎಂಬುದು ನನ್ನ ಅಭಿಪ್ರಾಯ’.

“ಯಾವುದೇ ಕಾರಣಕ್ಕೂ ಮತದಾನ ಮಾಡದೇ ಇರಬೇಡಿ. ವಿಶೇಷವಾಗಿ ತರುಣ-ತರುಣಿಯರು ಹೆಚ್ಚಿನ ಸಂಖ್ಯೆಯಲ್ಲಿ ಬಂದು ಭಾಗವಹಿಸಬೇಕು. ತಪ್ಪದೇ ಮತದಾನ ಮಾಡಬೇಕು ಎಂಬುದೇ ನನ್ನ ಪ್ರಾರ್ಥನೆ. ಒಂದು ವೇಳೆ ನಿಮಗೆ ಯಾವುದೇ ಅಭ್ಯರ್ಥಿ ಇಷ್ಟವಾಗದೇ ಹೋದರೆ ನೋಟಾದ ಆಯ್ಕೆಯೂ ಇದೆ. ಅದನ್ನು ಬಳಸಿ. ಆದರೆ ಮತದಾನ ಮಾಡದೇ ಇರಬೇಡಿ.

ನಿಮಗೆ ನೀಡಿದ ಭರವಸೆಯನ್ನು ಈಡೇರಿಸಿದಂತಹ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಿ. ನಿಮ್ಮ ಕ್ಷೇತ್ರದ ಯಾವ ಅಭ್ಯರ್ಥಿ ನಿಮಗೆ ಸರಿ ಎನಿಸಿದರೆ ಅವರಿಗೆ ಮತದಾನ ಮಾಡಿ. ಅವರಿಗಿಂತಲೂ ಉತ್ತಮ ಅಭ್ಯರ್ಥಿ ಸಿಕ್ಕರೆ ಅವರಿಗೆ ನಿಮ್ಮ ಮತವಿರಲಿ. ಮುಖ್ಯವಾಗಿ ಮೊದಲ ಬಾರಿಗೆ ಮತದಾನ ಮಾಡುವ ಮತದಾರರು ತುಂಬಾ ಎಚ್ಚರದಿಂದ ಮತದಾನ ಮಾಡಬೇಕು.

ಇವತ್ತು ದೇಶದ ಭವಿಷ್ಯ ನಿರ್ಧರಿಸುವಲ್ಲಿ ಯುವ ಜನತೆಯ ಪಾತ್ರ ಪ್ರಮುಖವಾಗಿದೆ. ಯುವಜನತೆ ಎಚ್ಚರ ತಪ್ಪಿ, ಸೂಕ್ತ ಅಭ್ಯರ್ಥಿಯನ್ನು ಆಯ್ಕೆ ಮಾಡದೇ ಹೋದರೆ ದೇಶ ಕವಲುದಾರಿಯಲ್ಲಿ ಇರಬೇಕಾಗುತ್ತದೆ. ನಮ್ಮ “ಕವಲುದಾರಿ’ ಚಿತ್ರದಲ್ಲಿ ಈ ಅಂಶವನ್ನೇ ಹೇಳಲಾಗಿದೆ. ಹಾಗಾಗಿ, ಪ್ರತಿಯೊಬ್ಬ ಮತದಾರರು ಕೂಡಾ ತಪ್ಪದೇ ಮತದಾನ ಮಾಡಿ, ದೇಶದ ಭವಿಷ್ಯವನ್ನು ಉಜ್ವಲವಾಗಿಸಿ..’