ಕಂಗನಾ ಕನಸು

Team Udayavani, Apr 19, 2019, 6:00 AM IST

ಬಾಲಿವುಡ್‌ನ‌ಲ್ಲಿ ತನ್ನ ಅಭಿನಯ, ಸಿನಿಮಾಗಳಿಗಿಂತಲೂ ಬೇರೆ ವಿಷಯಗಳಿಗೆ ಹೆಚ್ಚಾಗಿ ಸುದ್ದಿಯಾಗುವ, ಇತ್ತೀಚಿನ ನಾಯಕ ನಟಿಯರ ಪೈಕಿ ಕಂಗನಾ ರಣಾವತ್‌ ಕೂಡ ಒಬ್ಬರು. ಇತ್ತೀಚೆಗೆ ಕಂಗನಾ ಏನು ಮಾಡಿದರೂ, ಏನು ಮಾತನಾಡಿದರೂ ಅದು ಸುದ್ದಿಯಾಗುತ್ತೆ. ಅದರಲ್ಲೂ ಕೆಲದಿನಗಳ ಹಿಂದಷ್ಟೇ ಕಂಗನಾ ನೀಡಿರುವ ಹೇಳಿಕೆಯೊಂದು ಬಾಲಿವುಡ್‌ನ‌ಲ್ಲಿ ಹಲವರು ಹುಬ್ಬೇರಿಸುವಂತೆ ಮಾಡಿದೆ.

ಹೌದು, ಭಾರತೀಯ ಚಿತ್ರರಂಗದಲ್ಲಿ ಬಾಹುಬಲಿ ಸಿನಿಮಾ ಮಾಡಿದ ಸದ್ದು, ಬರೆದ ದಾಖಲೆಗಳ ಬಗ್ಗೆ ಎಲ್ಲರಿಗೂ ಗೊತ್ತೇ ಇದೆ. ಅದ್ದೂರಿ ಮೇಕಿಂಗ್‌, ಬಿಗ್‌ ಬಜೆಟ್‌, ಬಾಕ್ಸಾಫೀಸ್‌ನಲ್ಲಿ ಭಾರೀ ಕಲೆಕ್ಷನ್‌ ಹೀಗೆ ಹತ್ತುಹಲವು ವಿಷಯಗಳಲ್ಲಿ ಬಾಹುಬಲಿ ಸಿನಿಮಾ ದಾಖಲೆ ನಿರ್ಮಿಸಿದೆ. ಇಂಥ ಬಾಹುಬಲಿ ಸದ್ಯಕ್ಕೆ ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ ಅತಿ ದೊಡ್ಡ ಸಿನಿಮಾ ಎನ್ನಲಾಗಿದೆ. ಈ ಚಿತ್ರವನ್ನು ಮೀರಿಸುವಂತೆ ಸಿನಿಮಾ ಮಾಡಬೇಕು ಎನ್ನುವ ಪ್ಲಾನಿಂಗ್‌ನಲ್ಲಿ ಮಾಡುತ್ತಿದ್ದಾರಂತೆ ಕಂಗನಾ ರಾಣಾವತ್‌.

ಈ ಬಗ್ಗೆ ಮಾತನಾಡಿರುವ ಕಂಗನಾ, ಬಾಹುಬಲಿ, ಪದ್ಮಾವತ್‌ ಅಂತಹ ಚಿತ್ರಗಳನ್ನ ಮೀರಿಸುವಂತಹ ಸಿನಿಮಾ ಮಾಡಬೇಕು ಅನ್ನೋದು ನನ್ನ ಕನಸು. ಈಗಾಗಲೇ ಈ ಚಿತ್ರಕ್ಕೆ ಕಥೆ ಅಂತಿಮವಾಗಿದ್ದು, ಒಂದಷ್ಟು ಸ್ಕ್ರಿಪ್ಟ್ ಕೆಲಸಗಳು ನಡೆಯುತ್ತಿದೆ. ಅದು ಮುಗಿಯುತ್ತಿದ್ದಂತೆ ಚಿತ್ರದ ಹೆಸರನ್ನು ಅಧಿಕೃತವಾಗಿ ಅನೌನ್ಸ್‌ ಮಾಡಲಾಗುವುದು. ಸದ್ಯದಲ್ಲೇ ಈ ಚಿತ್ರಕ್ಕಾಗಿ ಭರ್ಜರಿ ಫೋಟೋಶೂಟ್‌ ಮಾಡಲು ಪ್ಲಾನ್‌ ಮಾಡಿಕೊಂಡಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ.

ಅಂದ ಹಾಗೆ, ಕಂಗನಾ ಕಬಡ್ಡಿ ಕ್ರೀಡೆಯನ್ನು ಆಧರಿಸಿದ ಕಥೆಯನ್ನು ಸಿನಿಮಾ ಮಾಡಲು ಹೊರಟಿದ್ದಾರೆ ಎನ್ನಲಾಗುತ್ತಿದೆ. ಇದಕ್ಕೆ ಪೂರಕವೆಂಬಂತೆ ಕಂಗನಾ ಕೂಡ ಕೆಲದಿನಗಳಿಂದ ಕಬಡ್ಡಿ ಟ್ರೈನಿಂಗ್‌ ಪಡೆದುಕೊಳ್ಳುತ್ತಿ¨ªಾರಂತೆ. ಆದರೆ, ಇದು ಬಯೋಪಿಕ್‌ ಚಿತ್ರವಾ ಅಥವಾ ಕಾಲ್ಪನಿಕ ಕಥೆ ಆಧರಿತ ಚಿತ್ರವಾ ಎನ್ನುವುದರ ಬಗ್ಗೆ ಇನ್ನೂ ಮಾಹಿತಿ ಇಲ್ಲ.

ಇನ್ನೊಂದು ವಿಶೇಷ ಅಂದ್ರೆ, ಈ ಚಿತ್ರದ ಮುಖ್ಯ ಭೂಮಿಕೆಯಲ್ಲಿ ಕಂಗನಾ ಕಾಣಿಸಿಕೊಳ್ಳುತ್ತಿದ್ದು, ಇಂಥ ದೊಡ್ಡ ಚಿತ್ರವನ್ನು ಕಂಗನಾ ಅವರೇ ನಿರ್ದೇಶಿಸಲಿದ್ದಾರಂತೆ. ತಮ್ಮ ಈ ಹಿಂದಿನ ಮಣಿಕರ್ಣಿಕಾ ಚಿತ್ರದಲ್ಲೂ ಅರ್ಧದಷ್ಟು ನಿರ್ದೇಶನ ಮಾಡಿದ ಅನುಭವ ಹೊಂದಿರುವ ಕಂಗನಾ, ಅದೇ ಜೋಶ್‌ನಲ್ಲಿ ಈ ಸಿನಿಮಾ ಮಾಡಲು ಸಜ್ಜಾಗುತ್ತಿದ್ದಾರೆ. ಒಟ್ಟಾರೆ ಕಂಗನಾ ಆಡುವ ಭರವಸೆಯ ಮಾತುಗಳನ್ನು ಕೇಳುತ್ತಿದ್ದರೆ, ನಿಜಕ್ಕೂ ಬಾಹುಬಲಿಯನ್ನು ಮೀರಿಸುವ ಸಿನಿಮಾ ಮಾಡುತ್ತಾರಾ ಎಂಬ ಕುತೂಹಲದ ಪ್ರಶ್ನೆ ಮೂಡುವುದರಲ್ಲಂತೂ ಅನುಮಾನವಿಲ್ಲ.