ನೀರವ್‌ ಮೋದಿಯ 5 ಕೋಟಿ ರೂ. ಕಾರು 1 ಕೋಟಿಗೆ!

Team Udayavani, Apr 26, 2019, 5:45 AM IST

ಮುಂಬಯಿ: ತಲೆಮರೆಸಿಕೊಂಡಿರುವ ವಜ್ರ ವ್ಯಾಪಾರಿ ನೀರವ್‌ ಮೋದಿಯವರಿಗೆ ಸೇರಿದ 13 ಐಶಾರಾಮಿ ಕಾರು ಗಳನ್ನು ಮುಂಬಯಿನಲ್ಲಿ ಹರಾಜಿಗಿಡಲಾಗಿದೆ. ಪಂಜಾಬ್‌ ನ್ಯಾಷನಲ್ ಬ್ಯಾಂಕ್‌ ಸೇರಿದಂತೆ ವಿವಿಧ ಬ್ಯಾಂಕುಗಳಿಗೆ ಆತ ನೀಡಬೇಕಿರುವ ಸಾಲ ವಸೂಲಾತಿಗಾಗಿ ಜಾರಿ ನಿರ್ದೇಶನಾಲಯ (ಇ.ಡಿ.) ಈ ಹರಾಜಿಗೆ ಮುಂದಾಗಿದೆ. ಅಂದಾಜು 5 ಕೋಟಿ ರೂ. ಮೌಲ್ಯದ ರೋಲ್ಸ್ ರಾಯ್ಸ ಘೋಸ್ಟ್‌ ಕಾರಿಗೆ 1.3 ಕೋಟಿ ರೂ. ಮೂಲಬೆಲೆ ನಿಗದಿಪಡಿಸಲಾಗಿದೆ. ಜತೆಗೆ, ಒಂದು ಪೋರ್ಶ್‌ ಪನಾಮೆರಾ, ಎರಡು ಮರ್ಸಿಡಿಸ್‌ ಬೆಂಝ್, ಮೂರು ಹೋಂಡಾ ಮತ್ತು ಟೊಯೊಟೊ ಫಾಚ್ಯೂರ್ನರ್‌, ಇನ್ನೋವಾ, ಹೋಂಡಾ ಬ್ರಿಯೋ ಹಾಗೂ ಇನ್ನಿತರ ಕಾರುಗಳೂ ಹರಾಜುಗೊಳ್ಳಲಿವೆ ಎಂದು ಹೇಳಲಾಗಿದೆ.

ಈ ನಡುವೆ, ಭಾರತಕ್ಕೆ ನೀರವ್‌ ಮೋದಿಯ ಹಸ್ತಾಂತರ ಮತ್ತು ಅವರ ಜಾಮೀನು ಅರ್ಜಿಯ ವಿಚಾರಣೆ, ಲಂಡನ್‌ ವೆಸ್ಟ್‌ ಮಿನಿಸ್ಟರ್‌ ಕೋರ್ಟಿನಲ್ಲಿ ಇದೇ ಶುಕ್ರವಾರ ವಿಚಾರಣೆಗೊಳಪಡಲಿವೆ. ಸದ್ಯಕ್ಕೆ ವಾಂಡ್ಸ್‌ವರ್ತ್‌ ಜೈಲಿನಲ್ಲಿರುವ ನೀರವ್‌, ವೀಡಿಯೋ ಕಾನ್ಫರೆನ್ಸ್‌ ಮೂಲಕ ವಿಚಾರಣೆ ಯಲ್ಲಿ ಪಾಲ್ಗೊಳ್ಳಲಿದ್ದಾರೆಂದು ಹೇಳಲಾಗಿದೆ.