ಕೆಥೋಲಿಕ್‌ ಸಭಾದಿಂದ ಸಂತಾಪ; ಖಂಡನ ಸಭೆ

Team Udayavani, Apr 30, 2019, 6:04 AM IST

ಪಜೀರು: ಈಸ್ಟರ್‌ ದಿನ ಶ್ರೀಲಂಕಾದಲ್ಲಿ ನಡೆದ ಉಗ್ರದಾಳಿಯನ್ನು ಖಂಡಿಸಿ ರವಿವಾರ ಪಜೀರ್‌ ಮೆರ್ಸಿ ಯಮ್ಮನವರ ಚರ್ಚ್‌, ಕೆಥೋಲಿಕ್‌ ಸಭಾ ಪಜೀರು ಘಟಕ, ಭಾರತೀಯ ಕೆಥೋಲಿಕ್‌ ಯುವಸಂಚಲನ ಪಜೀರು ಘಟಕ ಹಾಗೂ ಪಜೀರ್‌ ಚರ್ಚ್‌ ವ್ಯಾಪ್ತಿಯ ಕ್ರೈಸ್ತರಿಂದ ವಿಶೇಷ ಪ್ರಾರ್ಥನೆ, ಸಂತಾಪ ಸೂಚಕ ಹಾಗೂ ಖಂಡನಾ ಸಭೆ ಮತ್ತು ಪಜೀರ್‌ ಹೊಸಚರ್ಚ್‌ನಿಂದ ಗ್ರಾಮಚಾವಡಿ ಜಂಕ್ಷನ್‌ವರೆಗೆ ಕ್ಯಾಂಡಲ್‌ ಮಾರ್ಚ್‌ ಜರಗಿತು.

ವಿಶೇಷ ಪ್ರಾರ್ಥನೆಯ ನೇತೃತ್ವ ವಹಿಸಿದ ಚರ್ಚ್‌ನ ಧರ್ಮಗುರು ವಂ| ಸುನಿಲ್‌ ವೇಗಸ್‌ ಮಾತನಾಡಿ, ಉಗ್ರದಾಳಿಯಲ್ಲಿ ಮೃತರಾದವರ ಕುಟುಂಬದ ದುಃಖದಲ್ಲಿ ನಾವಿದ್ದೇವೆ. ಇಂದಿನ ಸಂಕಷ್ಟ ಸಂದರ್ಭ ನಮ್ಮ ಪ್ರಾರ್ಥನೆ ಅಗತ್ಯವಿದ್ದು,ಅದರ ಫಲವಾಗಿ ಮೃತರ ಕುಟುಂಬಕ್ಕೆ ಶಾಂತಿ,ನೆಮ್ಮದಿ ಸಿಗಲಿ ಎಂದರು.

ಶಾಂತಿ ನೆಲೆಸಲಿ
ಮನುಷ್ಯರಾಗಿರುವ ನಾವೆಲ್ಲರೂ ಪರಸ್ಪರ ಸಹೋದರತೆಯಿಂದ ಜೀವಿಸಲು ಮುಂದಾದಾಗ ಜಗತ್ತಿನಲ್ಲಿ ಶಾಂತಿ,ಸೌಹಾರ್ದತೆ ಸಾಧ್ಯ.ನಮ್ಮ ದೇಶ,ಜಗತ್ತಿನಲ್ಲಿ ಶಾಂತಿ ಸಿಗುವಂತಾಗಲು ವಿಶೇಷ ಪ್ರಾರ್ಥನೆ ಸಲ್ಲಿಸಲಾಗಿದೆ ಎಂದರು.

ಸಂತ ಜೋಸೆಫರ ಹಿರಿಯ ಪ್ರಾಥಮಿಕ ಶಾಲೆಯ ಮುಖ್ಯ ಶಿಕ್ಷಕಿ ಸಿಸ್ಟರ್‌ ಈನೆಟ್‌ ಡಿ’ಸೋಜಾ, ಸಿಸ್ಟರ್‌ ಲೀನೆಟ್‌ ದಾಂತಿ, ಚರ್ಚ್‌ ಪಾಲನಾ ಮಂಡಳಿ,ಕೆಥೋಲಿಕ್‌ ಸಭಾ ಪಜೀರ್‌ ಘಟಕದ ಪದಾಧಿಕಾರಿಗಳು,ಸದಸ್ಯರು ಮೊದಲಾದವರು ಉಪಸ್ಥಿತರಿದ್ದರು.