ನವಗ್ರಾಮಕ್ಕೆ ಕೊಳಕು ನೀರೇ ಗತಿ !

Team Udayavani, Apr 30, 2019, 6:30 AM IST

ಬ್ರಹ್ಮಾವರ: ಹನೆಹಳ್ಳಿ ಗ್ರಾಮ ಪಂಚಾಯತ್‌ನ ನವಗ್ರಾಮ ನಿವಾಸಿಗಳ ನೀರಿನ ಸಮಸ್ಯೆ ಮಿತಿ ಮೀರಿದೆ. ಈ ಪರಿಸದಲ್ಲಿ 50ಕ್ಕೂ ಹೆಚ್ಚು ಮನೆಗಳಿದ್ದು ಕೊಳಕು ನೀರಿನಿಂದ ಹೈರಾಣಾಗಿದ್ದಾರೆ.

ಗ್ರಾ.ಪಂ. ವತಿಯಿಂದ ಕೂರಾಡಿಯಲ್ಲಿರುವ ಬಾವಿಯ ನೀರನ್ನು ಸುಮಾರು ಹದಿನೈದು ವರ್ಷಗಳಿಂದ ಪೂರೈಸಲಾಗುತ್ತಿದೆ. ಆದರೆ ಈ ನೀರು ಹಾಲಿಗೆ ಹಾಕಿದಾಗ ಹಾಲು ಹಾಳಾಗುತ್ತಿದೆ.

ಇದೇ ನೀರನ್ನು ಕುಡಿಯಲು ಬಳಕೆ ಮಾಡುತ್ತಿದ್ದು ಮಕ್ಕಳ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತಿದೆ. ಸ್ನಾನ ಮಾಡಿದರೆ ಮೈ ತುಂಬಾ ಅಲರ್ಜಿ ಆಗುತ್ತಿದೆ.

ಪರಿಹಾರಕ್ಕೆ ಆಗ್ರಹ
ನವಗ್ರಾಮದ ನೀರಿನ ಸಮಸ್ಯೆಗೆ ಶಾಶ್ವತ ಪರಿಹಾರವಾಗಿ ಕಿಂಡಿ ಅಣೆಕಟ್ಟು ಬಳಿ ಶುದ್ಧ ನೀರು ದೊರೆಯುವಲ್ಲಿ ಬಾವಿ ರಚಿಸಬೇಕೆಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ. ಅಲ್ಲಿಯ ತನಕ ಟ್ಯಾಂಕರ್‌ ನೀರನ್ನು ಪೂರೈಸಬೇಕಾಗಿ ಮನವಿ ಮಾಡಿದ್ದಾರೆ.

3 ದಿನಕ್ಕೊಮ್ಮೆ
ಬೇಸಗೆಯಲ್ಲಿ ಶುದ್ಧ ನೀರಿನ ಎರಡೂ ಬಾವಿ ಆರುವುದರಿಂದ ಅನಿವಾರ್ಯವಾಗಿ ಕೂರಾಡಿಯ ಬಾವಿಯಿಂದ ಕಲುಷಿತ ನೀರನ್ನೇ ಪೂರೈಸಲಾಗುತ್ತಿದೆ. ಅದೂ ಸಹ 3 ದಿನಕ್ಕೊಮ್ಮೆ ದೊರೆಯುತ್ತಿದೆ.