ಮಸೂದ್‌ ಅಜರ್‌ ಜಾಗತಿಕ ಉಗ್ರನೆಂದು ಘೋಷಿತನಾದರೆ ತತ್‌ಕ್ಷಣ ಕಸ್ಟಡಿಗೆ

Team Udayavani, May 1, 2019, 11:17 AM IST

ಇಸ್ಲಾಮಾಬಾದ್‌ : ಮುಂಬಯಿ ಮತ್ತು ಪುಲ್ವಾಮಾ ಉಗ್ರ ದಾಳಿಯ ಮಾಸ್ಟರ್‌ ಮೈಂಡ್‌, ಜೈಶ್‌ ಎ ಮೊಹಮ್ಮದ್‌ ಮುಖ್ಯಸ್ಥ ಮಸೂದ್‌ ಅಜರ್‌ ನನ್ನು ಜಾಗತಿಕ ಉಗ್ರನೆಂದು ಘೋಷಿಸುವ ವಿಶ್ವಸಂಸ್ಥೆಯ ಠರಾವಿಗೆ ತಾನು ಒಡ್ಡಿದ್ದ ತಾಂತ್ರಿಕ ತಡೆಯನ್ನು ಚೀನ ಬಹುತೇಕ ತೆರವುಗೊಳಿಸುವ ಸಾಧ್ಯತೆ ಇರುವ ಹಿನ್ನೆಲೆಯಲ್ಲಿ ಪಾಕಿಸ್ಥಾನ ಇದೀಗ ಅಜರ್‌ ನನ್ನು ತನ್ನ ವಶಕ್ಕೆ ತೆಗೆದುಕೊಳ್ಳುವ ಕ್ರಮಕ್ಕೆ ಮುಂದಾಗಿದೆ ಎಂದು ವರದಿಗಳು ತಿಳಿಸಿವೆ.

ಚೀನ ತನ್ನ ತಾಂತ್ರಿಕ ತಡೆಯನ್ನು ವಿಶ್ವಸಂಸ್ಥೆಯಲ್ಲಿ ತೆರವು ಗೊಳಿಸಿದ ಒಡನೆಯೇ ಅಜರ್‌ನನ್ನು ಪಾಕ್‌ ಸರಕಾರ ತನ್ನ ಕಸ್ಟಡಿಗೆ ತೆಗದುಕೊಳ್ಳಲಿದೆ ಎಂದು ಸರಕಾರಿ ಮೂಲಗಳು ಹೇಳಿವೆ.

ಪಾಕ್‌ ಸರಕಾರ ಉಗ್ರ ಮಸೂದ್‌ ಅಜರ್‌ ನನ್ನು ತನ್ನ ಕಸ್ಟಡಿಗೆ ತೆಗೆದುಕೊಂಡ ತತ್‌ಕ್ಷಣವೇ ಆತನ ವಿರುದ್ದ ಈ ಹಿಂದೆ ದಾಖಲಾಗಿದ್ದ ಎಲ್ಲ ಎಫ್ಐಆರ್‌ ಗಳ ತನಿಖೆಯು ಆರಂಭವಾಗಲಿದೆ ಎಂದು ಮೂಲಗಳು ಹೇಳಿವೆ.

ಮಸೂದ್‌ ಅಜರ್‌ ನನ್ನು ಜಾಗತಿಕ ಉಗ್ರನೆಂದು ಘೋಷಿಸುವಂತೆ ಭಾರತ ವಿಶ್ವಸಂಸ್ಥೆಯಲ್ಲಿ ಬಹಳ ಹಿಂದಿನಿಂದಲೂ ಆಗ್ರಹಿಸುತ್ತಾ ಬಂದಿದ್ದು ಆ ಕುರಿತ ಠರಾವಿಗೆ ಚೀನ ಈ ವರೆಗೆ ನಾಲ್ಕು ಬಾರಿ ತಾಂತ್ರಿಕ ನೆಲೆಯಲ್ಲಿ ಅಡ್ಡಗಾಲು ಹಾಕಿತ್ತು.