ಬೈಕ್‌-ಟಿಪ್ಪರ್‌ ಢಿಕ್ಕಿ: ಇಬ್ಬರ ಸಾವು

ಪುಂಜಾಲಕಟ್ಟೆ ಸಮೀಪ ದುರಂತ

Team Udayavani, May 9, 2019, 6:15 AM IST

ಸುರೇಂದ್ರ ಹಾಗೂ ಜಯಲಕ್ಷ್ಮೀ .

ಪುಂಜಾಲಕಟ್ಟೆ: ಟಿಪ್ಪರ್‌ ಲಾರಿ ಮತ್ತು ಬುಲೆಟ್‌ ಬೈಕ್‌ ಮುಖಾಮುಖೀ ಢಿಕ್ಕಿಯಾದ ಪರಿಣಾಮ ಸವಾರರಿಬ್ಬರು ಮೃತಪಟ್ಟ ದಾರುಣ ಘಟನೆ ಬಂಟ್ವಾಳ ತಾಲೂಕಿನ ಅಣ್ಣಳಿಕೆ-ಹಿರ್ಣಿ ರಸ್ತೆ ನಡುವಿನ ಕುಮೇರ್‌ನಲ್ಲಿ ಬುಧವಾರ ಸಂಭವಿಸಿದೆ.

ಅರಳ ಗ್ರಾಮದ ಹಿರ್ಣಿ ನಿವಾಸಿ ರಮೇಶ್‌ ಪೂಜಾರಿ ಅವರ ಪುತ್ರ, ಬೈಕ್‌ ಸವಾರ ಸುರೇಂದ್ರ (33) ಹಾಗೂ ಅವರ ಸಂಬಂಧಿ ಜಯಲಕ್ಷ್ಮೀ (36) ಮೃತಪಟ್ಟವರಾಗಿದ್ದಾರೆ.

ಘಟನೆಯ ವಿವರ
ಬೆಳಗ್ಗೆ ಸುರೇಂದ್ರ ಅವರು ಬೈಕಿನಲ್ಲಿ ಸೋದರಿಯನ್ನು ರಾಯಿ ಗ್ರಾಮ ಪಂಚಾಯತ್‌ಗೆ ಬಿಟ್ಟು ವಾಪಸ್‌ ಬರುತ್ತಿದ್ದರು. ಆಗ ಅಣ್ಣಳಿಕೆಯಲ್ಲಿ ಸಂಬಂಧಿ ಜಯಲಕ್ಷಿ$¾ ಅವರನ್ನು ಕೂರಿಸಿ ಮನೆಗೆ ತೆರಳುತ್ತಿದ್ದಾಗ ಎದುರಿನಿಂದ ಬಂದ ಟಿಪ್ಪರ್‌ ಲಾರಿಗೆ ಢಿಕ್ಕಿಯಾಗಿದೆ.ಗಂಭೀರ ಗಾಯಗೊಂಡಿದ್ದ ಇಬ್ಬರನ್ನೂ ಮಂಗಳೂರಿನ ಆಸ್ಪ ತ್ರೆಗೆ ಕೊಂಡೊಯ್ಯುತ್ತಿದ್ದಾಗ ದಾರಿ ಮಧ್ಯೆ ಮೃತಪಟ್ಟಿದ್ದಾರೆ ಎಂದು ತಿಳಿದು ಬಂದಿದೆ.
ಬಂಟ್ವಾಳ ಟ್ರಾಫಿಕ್‌ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು,ಲಾರಿ ಚಾಲಕನನ್ನು ವಶಕ್ಕೆ ಪಡೆ ದುಕೊಂಡಿದ್ದಾರೆ.

ಸುರೇಂದ್ರ
ಸುರೇಂದ್ರ ಅವರು ರಮೇಶ್‌ ಪೂಜಾರಿ ಅವರ ನಾಲ್ವರು ಮಕ್ಕಳಲ್ಲಿ ಹಿರಿಯವರಾಗಿದ್ದು, ಬೆಂಗಳೂರಿನ ಕಂಪೆನಿಯೊಂದರಲ್ಲಿ ಉದ್ಯೋಗ ದಲ್ಲಿದ್ದರು.ಸಹೋದರಿಯ ವಿವಾಹ ಕಾರ್ಯಕ್ರಮಕ್ಕೆಂದು ಊರಿಗೆ ಬಂದಿದ್ದರು. ಈ ನಡುವೆ ಸುರೇಂದ್ರರಿಗೂ ಬುಧವಾರ ಹುಡುಗಿ ನೋಡಲು ನಿರ್ಧರಿಸಲಾಗಿತ್ತು. ಅವರು ಬುಧವಾರವೇ ರಾತ್ರಿಯೇ ಬೆಂಗಳೂರಿಗೆ ತೆರಳುವವರಿದ್ದರು.

ಜಯಲಕ್ಷ್ಮೀ
ಮಂಗಳೂರಿನ ತೊಕ್ಕೊಟ್ಟು ಸಮೀಪದ ಪಂಡಿತ್‌ ಹೌಸ್‌ ನಿವಾಸಿ ರಾಜೇಶ್‌ ಅವರ ಪತ್ನಿ ಜಯಲಕ್ಷ್ಮೀ ಅವರು ಹತ್ತಿರದ ಸಂಬಂಧಿಯಾಗಿದ್ದು, ಸುರೇಂದ್ರರಿಗೆ ವಧು ನೋಡಲೆಂದೇ ಅವರು ಮೂರು ದಿನಗಳ ಹಿಂದಷ್ಟೇ ಬಂಟ್ವಾಳದ ಹಿರ್ಣಿಯಲ್ಲಿರುವ ತಾಯಿ ಮನೆಗೆ ತೆರಳಿದ್ದರು. ರಾಜೇಶ್‌ – ಜಯಲಕ್ಷ್ಮೀ ದಂಪತಿಗೆ 5 ಮತ್ತು 10ರ ಹರೆಯದ ಇಬ್ಬರು ಪುಟ್ಟ ಹೆಣ್ಮಕ್ಕಳಿದ್ದಾರೆ. ರಾಜೇಶ್‌ ಅವರು ಉಳ್ಳಾಲದ ಬೀಡಿ ಕಂಪೆನಿಯಲ್ಲಿ ಉದ್ಯೋಗಿಯಾಗಿದ್ದಾರೆ.