ಇರಾನ್‌ನಿಂದ ತೈಲ: ಸದ್ಯಕ್ಕೆ ಯಥಾ ಸ್ಥಿತಿ

Team Udayavani, May 9, 2019, 6:17 AM IST

ಹೊಸದಿಲ್ಲಿ/ಟೆಹರಾನ್‌:ಇರಾನ್‌ನಿಂದ ಕಚ್ಚಾ ತೈಲ ಆಮದು ಮಾಡಿಕೊಂಡರೆ ಆರ್ಥಿಕ ದಿಗ್ಬಂಧನ ಭೀತಿಗೆ ಗುರಿಯಾಗಲಿದ್ದ ಕೇಂದ್ರಕ್ಕೆ ಕೊಂಚ ನಿರಾಳತೆ ಸಿಕ್ಕಿದೆ. ಸದ್ಯ ದೇಶದಲ್ಲಿ ಚುನಾವಣೆ ನಡೆಯುತ್ತಿರುವುದರಿಂದ ಹೊಸ ಸರಕಾರ ಅಧಿಕಾರಕ್ಕೆ ಬರುವ ವರೆಗೆ ವಿನಾಯಿತಿ ಮುಂದುವರಿಸಲು ಅಮೆರಿಕ ಸರಕಾರ ಒಪ್ಪಿದೆ. ಈ ಬಗ್ಗೆ ಅಮೆರಿಕದ ವಾಣಿಜ್ಯ ಸಚಿವ ವಿಲ್ಬರ್‌ ರೋಸ್‌ ಮಾತನಾಡಿ ಎರಡೂ ರಾಷ್ಟ್ರಗಳು ವ್ಯಾಪಾರ ಸಮಸ್ಥಿತಿ ಕಾಯ್ದುಕೊಳ್ಳಲು ಒಪ್ಪಿವೆ. ಅದಕ್ಕಾಗಿ ಭಾರತ ಕ್ರಮ ಶ್ಲಾಘಿಸುತ್ತೇವೆ. ಜೂನ್‌ನಲ್ಲಿ ಸರಕಾರ ಅಸ್ತಿತ್ವಕ್ಕೆ ಬಂದ ಬಳಿಕ ಈ ಬಗ್ಗೆ (ಇರಾನ್‌ ವಿಚಾರ) ಪರಿಶೀಲನೆ ನಡೆಸಲಾಗುತ್ತದೆ ಎಂದಿದ್ದಾರೆ.

ಮತ್ತೂಂದು ಬೆಳವಣಿಗೆಯಲ್ಲಿ 2015ರಲ್ಲಿ ಸಮ್ಮತಿಸಲಾದ ಒಪ್ಪಂದದ ಅನ್ವಯ ಪರಮಾಣು ಅಭಿವೃದ್ಧಿಯನ್ನು ಸ್ಥಗಿತಗೊಳಿಸಿರುವುದಾಗಿ ಇರಾನ್‌ ಹೇಳಿದೆ. ಅಮೆರಿಕ ವಿಧಿಸಲು ಮುಂದಾಗಿರುವ ಹೊಸ ದಿಗ್ಬಂಧನಗಳ ವಿರುದ್ಧ ಐರೋಪ್ಯ ಒಕ್ಕೂಟ ಮತ್ತು ಇತರ ರಾಷ್ಟ್ರಗಳು ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಕಾರ್ಯತಂತ್ರ ರೂಪಿಸಿರುವ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಇದೇ ವೇಳೆ ಮಾಸ್ಕೋದಲ್ಲಿ ಮಾತನಾಡಿದ ಇರಾನ್‌ ವಿದೇಶಾಂಗ ಸಚಿವ ಮೊಹಮ್ಮದ್‌ ಜಾವೇದ್‌ ಝರೀಫ್ ತಮ್ಮ ದೇಶ ಯಾವುದೇ ಒಪ್ಪಂದ ಉಲ್ಲಂಘಿಸಿಲ್ಲ ಎಂದು ಹೇಳಿದ್ದಾರೆ.