ಕಡವೆ ಬೇಟೆ: ಸೊತ್ತು ಸಹಿತ ಓರ್ವನ ಸೆರೆ

Team Udayavani, May 10, 2019, 6:10 AM IST

ಬೈಂದೂರು: ಇಲ್ಲಿನ ಪಡುವರಿ ಗ್ರಾಮದ ತೊಂಡ್ಲೆಯಲ್ಲಿ ಕಡವೆ ಬೇಟೆಯಾಡಿದ ಆರೋಪದಲ್ಲಿ ರಾಬಿನ್‌ ಎಂಬಾತನನ್ನು ಬೈಂದೂರು ವಲಯ ಅರಣ್ಯಾಧಿಕಾರಿಗಳ ತಂಡ ಬಂಧಿಸಿದೆ.

ಮೇ 9ರಂದು ಯಡ್ತರೆ ಗ್ರಾಮದ ನಾಗರಮಕ್ಕಿ ನಿವಾಸಿಯಾದ ರಾಬಿನ್‌ ಬಿನ್‌ ಸ್ಕರಿಯಾ ಮತ್ತು ತಂಡ ಕಡವೆಯನ್ನು ಕೊಂದಿದೆ. ಇನ್ನೋರ್ವ ಆರೋಪಿ ಪಡುವರಿ ಗ್ರಾಮದ ಮಧ್ದೋಡಿ ನಿವಾಸಿ ಅಭಿಲಾಷ್‌ ತಂಗಚ್ಚನ್‌ ತಲೆಮರೆಸಿಕೊಂಡಿದ್ದಾನೆ.

ಕುಂದಾಪುರ ಉಪ ವಿಭಾಗದ ಉಪ ಅರಣ್ಯ ಸಂರಕ್ಷಣ ಅಧಿಕಾರಿಗಳಾದ ಪ್ರಭಾಕರನ್‌ ಅವರ ಮಾರ್ಗದರ್ಶನದಲ್ಲಿ ಕುಂದಾಪುರ ಉಪ ವಿಭಾಗದ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿಗಳಾದ ಜಿ. ಲೋಹಿತ್‌ ಪ್ರಕರಣದ ತನಿಖೆ ಕೈಗೊಂಡಿದ್ದಾರೆ.

ಬೈಂದೂರು ವಲಯ ಅರಣ್ಯಾಧಿಕಾರಿ ಟಿ. ಕಿರಣ ಬಾಬು, ಕೊಲ್ಲೂರು ವನ್ಯಜೀವಿ ವಲಯದ ವಲಯ ಅರಣ್ಯಾಧಿಕಾರಿ ಜಿ.ವಿ.ನರೇಶ್‌, ಬೈಂದೂರು ಹಾಗೂ ಕೊಲ್ಲೂರು ವನ್ಯಜೀವಿ ವಲಯದ ಸಿಬಂದಿ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದರು.