ಭಾರತ-ಆಸೀಸ್‌ “ಎ’ ಪಂದ್ಯ ಡ್ರಾ

Team Udayavani, May 14, 2019, 6:00 AM IST

ಪರ್ತ್‌: ಆಸ್ಟ್ರೇಲಿಯ ಪ್ರವಾಸ ದಲ್ಲಿರುವ ಭಾರತದ ಪುರುಷರ ಹಾಕಿ ತಂಡ ಆಸ್ಟ್ರೇಲಿಯ “ಎ’ ತಂಡದೆದುರಿನ ದ್ವಿತೀಯ ಪಂದ್ಯವನ್ನು 1-1 ಗೋಲು ಗಳಿಂದ ಡ್ರಾ ಮಾಡಿಕೊಂಡಿದೆ. ಸೋಮವಾರ ನಡೆದ ಈ ಪಂದ್ಯದ ಕೊನೆಯ ಕ್ಷಣದಲ್ಲಿ ಗೋಲು ಹೊಡೆದ ಹರ್ಮನ್‌ಪ್ರೀತ್‌ ಸಿಂಗ್‌ ಪಂದ್ಯವನ್ನು ಡ್ರಾ ಮಾಡುವಲ್ಲಿ ಯಶಸ್ವಿಯಾದರು.

ಆರಂಭದಿಂದಲೇ ಭಾರತ ರಕ್ಷಣಾತ್ಮಕ ಆಟವಾಡಿತು. ಮೊದಲ ಕ್ವಾರ್ಟರ್‌ನ ಆರಂಭಿಕ ನಿಮಿಷಗಳಲ್ಲಿ ಸತತ 2 ಪೆನಾಲ್ಟಿ ಕಾರ್ನರ್‌ ರಕ್ಷಿಸಿದ ಭಾರತೀಯರು ಆಸ್ಟ್ರೇಲಿಯ “ಎ’ ಮುನ್ನಡೆಗೆ ತಡೆಯೊಡ್ಡಿದರು. ಆದರೆ ಆರಂಭದಲ್ಲೇ ಆಕ್ರಮಣ ಆಟಕ್ಕಿಳಿದ ಆಸ್ಟ್ರೇಲಿಯ ಭಾರತೀಯರಲ್ಲಿ ಒತ್ತಡ ಹೇರಿತು. 21ನೇ ನಿಮಿಷದಲ್ಲಿ ತಮಿಳುನಾಡು ಮೂಲದ ಕಿರಣ್‌ ಅರುಣಾಸಲಾಮ್‌ ಆಕರ್ಷಕ ಫೀಲ್ಡ್‌ ಗೋಲು ಬಾರಿಸುವ ಮೂಲಕ ಆಸ್ಟ್ರೇಲಿಯ “ಎ’ ತಂಡಕ್ಕೆ 1-0 ಮುನ್ನಡೆ ತಂದುಕೊಟ್ಟರು.

ಹಿನ್ನಡೆಗೆ ಸಿಲುಕಿದ ಭಾರತಕ್ಕೆ ಗೋಲು ಬಾರಿಸಲು ಹಲವಾರು ಅವಕಾಶ ಗಳಿದ್ದವು. ಆದರೆ 3 ಪೆನಾಲ್ಟಿ ಕಾರ್ನರ್‌ ಅವಕಾಶಗಳನ್ನು ಭಾರತ ಕೈಚೆಲ್ಲಿತು.