ಉಗ್ರರ ವಿರುದ್ಧ ಕ್ರಮ ಕೈಗೊಳ್ಳಲು ಪಾಕ್‌ ವಿಫ‌ಲ ಎಂದ ಎಪಿಜಿ

Team Udayavani, May 18, 2019, 6:00 AM IST

ಇಸ್ಲಾಮಾಬಾದ್‌: ಹಣಕಾಸು ವಿಚಕ್ಷಣಾ ಕಾರ್ಯಪಡೆ (ಎಫ್ಎಟಿಎಫ್) ಪ್ರಾದೇಶಿಕ ಸಂಘಟನೆಯಾದ ಏಷ್ಯಾ ಪೆಸಿಫಿಕ್‌ ಗ್ರೂಪ್‌ ಎದುರು ಪಾಕಿಸ್ತಾನ ಭಾರಿ ಹಿನ್ನಡೆ ಅನುಭವಿಸಿದೆ. ಚೀನಾದಲ್ಲಿ ನಡೆದ ಸಭೆಯಲ್ಲಿ ಪಾಕಿಸ್ತಾನದ ವಿರುದ್ಧ ಕಠಿಣ ಶಬ್ದಗಳಲ್ಲಿ ಎಪಿಜಿ ಸದಸ್ಯರು ಆಕ್ಷೇಪ ವ್ಯಕ್ತಪಡಿಸಿದ್ದು, ಉಗ್ರ ಸಂಘಟನೆಗಳ ವಿರುದ್ಧ ಕ್ರಮ ಕೈಗೊಳ್ಳುವುದು ಮತ್ತು ಉಗ್ರರಿಗೆ ಹಣಕಾಸು ಸೌಲಭ್ಯವನ್ನು ಪೂರೈಸುವಲ್ಲಿ ಪಾಕಿಸ್ತಾನ ಕ್ರಮ ಸೂಕ್ತವಾಗಿಲ್ಲ ಎಂದು ಆಕ್ಷೇಪಿಸಲಾಗಿದೆ.

ಎರಡು ದಿನಗಳ ಈ ಸಭೆಗೆ ಪಾಕಿಸ್ತಾನದ ಹಣಕಾಸು ಕಾರ್ಯದರ್ಶಿ ಮೊಹಮ್ಮದ್‌ ಯೂನುಸ್‌ ದಾಘಾ 10 ಸದಸ್ಯರ ನಿಯೋಗದೊಂದಿಗೆ ಭಾಗವಹಿಸಿದ್ದರು. ಭಾರತದ ಸದಸ್ಯರಂತೂ ಪಾಕಿಸ್ತಾನದ ಅಧಿಕಾರಿಗಳಿಗೆ ಕಠಿಣ ಪ್ರಶ್ನೆಗಳನ್ನು ಕೇಳಿ ಬೆವರಿಳಿಸಿದ್ದಾರೆ ಎಂದು ಪಾಕಿಸ್ತಾನದ ದಿನಪತ್ರಿಕೆ ಡಾನ್‌ ವರದಿ ಮಾಡಿದೆ.

ಈಗಾಗಲೇ ಎಫ್ಎಟಿಎಫ್ನಿಂದ ಕಪ್ಪುಪಟ್ಟಿಗೆ ಸೇರುವ ಭೀತಿ ಎದುರಿಸುತ್ತಿರುವ ಪಾಕಿಸ್ತಾನಕ್ಕೆ ಇದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರಿ ಮುಜುಗರ ತಂದಂತಾಗಿದೆ‌. ಈ ಸಭೆಯ ವರದಿಯನ್ನು ಎಫ್ಎಟಿಎಫ್ಗೆ ಸಲ್ಲಿಸಲಾಗುತ್ತದೆ ಮತ್ತು ಈ ಸಲ್ಲಿಕೆಯನ್ನು ಆಧರಿಸಿ ಎಫ್ಎಟಿಎಫ್ ಮುಂದಿನ ಸಭೆಯಲ್ಲಿ ನಿರ್ಧಾರ ತೆಗೆದುಕೊಳ್ಳಲಿದೆ.