ಬರದ ನಾಡಲ್ಲಿ ತರಕಾರಿ ತುಟ್ಟಿ

Team Udayavani, May 21, 2019, 11:11 AM IST

ಇಂಡಿ: ಜಿಲ್ಲೆ ಭೀಕರ ಬರಗಾಲಕ್ಕೆ ತುತ್ತಾಗಿದೆ. ಗಡಿ ಭಾಗದ ಇಂಡಿ ತಾಲೂಕಿನಲ್ಲಿ ಕುಡಿಯುವ ನೀರಿಗೂ ಹಾಹಾಕಾರವಿದೆ. ಅಲ್ಲದೆ ಗ್ರಾಮೀಣ ಭಾಗದಲ್ಲೂ ನೀರು ಸಿಗದೆ ಇರುವುದರಿಂದ ರೈತರು ಬೆಳೆ ಬೆಳೆಯಲು ಸಾಧ್ಯವಾಗಿಲ್ಲ. ಕಾಯಿಪಲ್ಲೆ ಬೆಳೆಗಾರರಿಗೂ ನೀರಿನ ತೊಂದರೆಯಾಗಿದ್ದರಿಂದ ದರದಲ್ಲಿ ಭಾರಿ ಬದಲಾವಣೆಯಾಗಿದೆ.

ಕಾಲುವೆಗೆ ಪ್ರಸಕ್ತ ವರ್ಷ ಜನೆವರಿ ತಿಂಗಳವರೆಗೆ ಮಾತ್ರ ನೀರು ಹರಿಸಿದ್ದರಿಂದ ಭೂಮಿಯಲ್ಲಿ ಅಂತರ್ಜಲ ಮಟ್ಟ ಬೇಸಿಗೆಯಲ್ಲಿ ಸಂಪೂರ್ಣ ಕುಸಿದು ಹೋಗಿದೆ. ಬೋರ್‌ವೆಲ್, ಬಾವಿಗಳು ಬತ್ತಿದ್ದರಿಂದ ತರಕಾರಿ ಬೆಳೆಯಲು ಸಾಧ್ಯವಾಗಿಲ್ಲ. ಹೀಗಾಗಿ ತರಕಾರಿ ಬೆಲೆಯಲ್ಲಿ ಭಾರಿ ಹೆಚ್ಚಳವಾಗಿದೆ.

ಏಪ್ರಿಲ್-ಮೇ ದರ: ಈರುಳ್ಳಿ 20 ರೂ, ಬಳ್ಳೊಳ್ಳಿ 80 ರೂ, ಟೊಮೆಟೊ 50 ರೂ, ಮೆಣಸಿನಕಾಯಿ 80 ರೂ, ಬದನೆಕಾಯಿ 50 ರೂ, ಬಟಾಟಿ 30 ರೂ, ಕೊತ್ತಂಬರಿ 15 ರೂ.ಗೆ ಒಂದು ಸೂಡ್‌, ಸೌತೆಕಾಯಿ 20 ರೂ, ಬೆಂಡೆಕಾಯಿ 50 ರೂ, ಡಬ್ಬು ಮೆಣಸಿನಕಾಯಿ 80 ರೂ, ನುಗ್ಗೆ 20 ರೂ.ಗೆ ಒಂದು ಸೂಡ್‌, ಫ್ಲಾವರ್‌ ಕೆಜಿಗೆ 50 ರೂ.

ಜನೆವರಿ-ಫೆಬ್ರವರಿ ದರ: ಈರುಳ್ಳಿ 10 ರೂ, ಬಳ್ಳೊಳ್ಳಿ 20 ರೂ, ಟೊಮೆಟೊ 20 ರೂ, ಮೆಣಸಿನಕಾಯಿ 20 ರೂ, ಬಟಾಟಿ 10 ರೂ, ಬದನೆಕಾಯಿ 20 ರೂ, ಸೌತೆಕಾಯಿ 10 ರೂ, ಬೆಂಡಿಕಾಯಿ 20 ರೂ, ಡಬ್ಬು ಮೆಣಸಿನಕಾಯಿ 20, ನುಗ್ಗೆ 10 ರೂ, ಫ್ಲಾವರ್‌ 20 ರೂ, ಕೊತ್ತಂಬರಿ 5 ರೂ. ಒಂದು ಸೂಡ್‌ ಹೀಗೆ ಇನ್ನಿತರಗೆ ಕಾಯಿಪಲ್ಲೆ ದರ ಇನ್ನಷ್ಟು ಹೆಚ್ಚಾಗಿ ಬಿಟ್ಟಿದೆ. ಇಷ್ಟು ಹೆಚ್ಚಿಗೆ ದರವಾದರೂ ನೇರವಾಗಿ ರೈತರಿಗೆ ಆ ಹಣ ಮುಟ್ಟಲ್ಲ. ಮಧ್ಯವರ್ತಿಗಳು ರೈತರು ಬೆಳೆದ ತರಕಾರಿ ಖರೀದಿಸಿ ಕಾಯಿಪಲ್ಲೆ ವ್ಯಾಪಾರಸ್ಥರಿಗೆ ನೀಡುತ್ತಾರೆ. ಹೀಗಾಗಿ ಕಾಯಿಪಲ್ಲೆ ಬೆಳೆದ ರೈತನಿಗಿಂತ ದಲ್ಲಾಳಿಗಳು, ವ್ಯಾಪಾರಸ್ಥರಿಗೆ ಇದರ ಲಾಭ ದೊರೆಯುತ್ತಿದೆ.

•ಉಮೇಶ ಬಳಬಟ್ಟಿ