ಸಂಸದ ನಳಿನ್‌ ಕಲಿತ ಶಾಲೆಯ ಮಕ್ಕಳಿಗೆ ವರ್ಗಾವಣೆ ಶಿಕ್ಷೆ?

Team Udayavani, May 27, 2019, 6:07 AM IST

ಸುಳ್ಯ: ಸಂಸದ ನಳಿನ್‌ ಪ್ರಾಥಮಿಕ ಶಿಕ್ಷಣ ಪಡೆದ ಸುಳ್ಯ ತಾಲೂಕಿನ ಮುಕ್ಕೂರು ಹಿ.ಪ್ರಾ. ಶಾಲೆ ಯಲ್ಲಿ 8ನೇ ತರಗತಿಗೆ ಶಿಕ್ಷಕರಿಲ್ಲದೆ ವಿದ್ಯಾರ್ಥಿಗಳು ವರ್ಗಾವಣೆ ಪತ್ರಕ್ಕೆ ಮೊರೆಯಿಟ್ಟಿದ್ದಾರೆ.

2 ವರ್ಷಗಳಿಂದ 7ನೇ ತರಗತಿ ತೇರ್ಗಡೆ ವಿದ್ಯಾರ್ಥಿಗಳು ಟಿ.ಸಿ. ಪಡೆದು ಬೇರೆ ಶಾಲೆಗೆ ಸೇರಿದ್ದಾರೆ. ಈ ಬಾರಿಯೂ ಅದೇ ಪರಿಸ್ಥಿತಿ.

ಕಳೆದ ವರ್ಷವೂ…

ಮುಕ್ಕೂರು ಹಿ.ಪ್ರಾ. ಶಾಲೆಯಲ್ಲಿ 2017-18ನೇ ಸಾಲಿನಲ್ಲಿ 8ನೇ ತರಗತಿಗೆ 8 ಮಂದಿ ತೇರ್ಗಡೆಯಾಗಿದ್ದರು. ಆದರೆ ಟಿಜಿಟಿ, ಎಜಿಟಿ ದರ್ಜೆಯ ಎರಡೂ ಶಿಕ್ಷಕ ಹುದ್ದೆ ಖಾಲಿಯಿದ್ದ ಕಾರಣ 7 ಮಕ್ಕಳ ಪೋಷಕರು ಟಿ.ಸಿ. ಪಡೆದು ಬೇರೆ ಶಾಲೆಗೆ ಸೇರಿಸಿದ್ದರು.

ಹುದ್ದೆ ಖಾಲಿ ಯಿದ್ದು, ಮಕ್ಕಳು ಟಿಸಿ ಪಡೆ ಯುತ್ತಿದ್ದರೂ ಶಿಕ್ಷಣ ಇಲಾಖೆ ಶಿಕ್ಷಕರ ನಿಯೋಜನೆಗೆ ಕ್ರಮ ಕೈಗೊಂಡಿಲ್ಲ. ಜನಪ್ರತಿನಿಧಿಗಳು ಪ್ರಯತ್ನ ಮಾಡಿಲ್ಲ. ಪರಿಣಾಮ ಈ ವರ್ಷ ಮೂವರು ವಿದ್ಯಾರ್ಥಿಗಳು ಟಿಸಿಗಾಗಿ ಅರ್ಜಿ ಸಲ್ಲಿಸಿದ್ದಾರೆ.

ಶಿಕ್ಷಕರು ಇಲ್ಲ

ಈ ಶಾಲೆಯಲ್ಲಿ 5 ಮಂಜೂರಾದ ಹುದ್ದೆಗಳಿವೆ. 2 ಹುದ್ದೆಗಳಲ್ಲಿ ಶಿಕ್ಷಕರಿದ್ದು, ಈ ವರ್ಷ ಮುಖ್ಯ ಗುರು ಗಳನ್ನು ಹೆಚ್ಚುವರಿ ಎಂದು ಬೇರೆಡೆ ನಿಯೋಜಿಸುವ ಪ್ರಕ್ರಿಯೆ ನಡೆದಿದೆ. 6ರಿಂದ 8ನೇ ತರಗತಿ ತನಕ ಎಜಿಟಿ, ಟಿಜಿಟಿ ಅರ್ಹತೆಯ ಇಬ್ಬರು ಶಿಕ್ಷಕರ ಅಗತ್ಯ ಇದೆ. ಆದರೆ ಈ ಎರಡೂ ಹುದ್ದೆ ಖಾಲಿ ಇವೆ.

ಸಂಸದ ನಳಿನ್‌ ಕಲಿತ ಶಾಲೆ

ಸಂಸದ ನಳಿನ್‌ ಪ್ರಾಥಮಿಕ ಶಿಕ್ಷಣ ಪೂರೈಸಿದ ಸರಕಾರಿ ಶಾಲೆಯಿದು. ಕೆಲವು ತಿಂಗಳ ಹಿಂದೆ ಅವರಿಗೆ ಮನವಿ ಸಲ್ಲಿಸಲಾಗಿದೆ. ಸ್ಪಂದಿಸುವ ಭರವಸೆ ಸಿಕ್ಕಿದ್ದರೂ ಶಾಲಾ ಪುನರಾರಂಭಕ್ಕೆ ಇನ್ನೆರಡು ದಿನ ಬಾಕಿ ಇದ್ದು, ಶಿಕ್ಷಕರ ನೇಮಕವಾಗದೆ ಪೋಷಕರು ಮಕ್ಕಳನ್ನು ಬೇರೆ ಶಾಲೆಗೆ ಸೇರಿಸಲು ನಿರ್ಧರಿಸಿದ್ದಾರೆ.

ನೇಮಕಕ್ಕೆ ಕ್ರಮ

ಈ ಶಾಲೆಗೆ ಎಜಿಟಿ ಶಿಕ್ಷಕರ ನಿಯೋಜನೆಗೆ ಕ್ರಮ ಕೈಗೊಳ್ಳಲಾಗುವುದು. ವರ್ಕ್‌ ಲೋಡ್‌ ಆಧರಿಸಿ ಹೆಚ್ಚಿನ ಶಿಕ್ಷಕರ ಅಗತ್ಯ ಇದ್ದರೆ ನೇಮಕಕ್ಕೆ ಆದ್ಯತೆ ನೀಡಲಾಗುವುದು. ಈ ಬಗ್ಗೆ ಶಾಲಾ ಮುಖ್ಯ ಶಿಕ್ಷಕರಿಂದ ಮಾಹಿತಿ ಪಡೆಯುತ್ತೇನೆ.

– ಮಹಾದೇವ ಕ್ಷೇತ್ರ ಶಿಕ್ಷಣಾಧಿಕಾರಿ, ಸುಳ್ಯ

– ಕಿರಣ್‌ ಪ್ರಸಾದ್‌ ಕುಂಡಡ್ಕ