ಕಾಪು ತಾ| ಕಡಲ ತೀರದಲ್ಲಿ ಡಾಮರು ತ್ಯಾಜ್ಯ

Team Udayavani, May 28, 2019, 6:11 AM IST

ಪಡುಬಿದ್ರಿ: ಬಡಾ ಗ್ರಾಮ ಉಚ್ಚಿಲದ ಕಡಲ ತೀರದಲ್ಲಿಯೂ ರವಿವಾರ ರಾತ್ರಿಯಿಂದ ಡಾಂಬರು ತ್ಯಾಜ್ಯ ಸಂಗ್ರಹವಾಗುತ್ತಿದ್ದು, ತೀರ ಪ್ರದೇಶವಿಡೀ ಮಲಿನಗೊಂಡಿದೆ. ಇದರ ಮೇಲೆ ಕಾಲಿರಿಸಿದಲ್ಲಿ ಕಾಲಿಗೂ ಈ ತ್ಯಾಜ್ಯ ಅಂಟಿಕೊಳ್ಳುತ್ತಿದೆ.

ಕಳೆದ ರಾತ್ರಿಯಿಂದಲೇ ಹೆಜಮಾಡಿ, ಪಡುಬಿದ್ರಿ, ಎರ್ಮಾಳು ತೆಂಕ, ಬಡಾ ಹಾಗೂ ಮೂಳೂರು ಕಡಲ ಕಿನಾರೆಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಡಾಮರು ತ್ಯಾಜ್ಯ ಸೇರುತ್ತಿದೆ ಎಂದು ತೀರವಾಸಿಗಳು ತಿಳಿಸಿದ್ದಾರೆ. ಇದು ಕಡಲತೀರದ ಅಂದಗೆಡಿಸಿದೆ. ತೀರ ಸೇರಿದ ಡಾಂಬರು ಬಿಸಿಲಿಗೆ ಕರಗುತ್ತಿರುವುದರಿಂದ ಪರಿಸರ ವೆಲ್ಲ ಎಣ್ಣೆಯ ವಾಸನೆ ಬೀರುತ್ತಿದೆ.

ಈ ಕುರಿತಾಗಿ ಉಡುಪಿ ಜಿಲ್ಲಾ ಪರಿಸರ ಇಲಾಖೆಯ ಅಧಿಕಾರಿಗಳು, ಕಾಪು ತಹಶೀಲ್ದಾರ್‌ ಕೂಡಾ ಸಮುದ್ರ ತೀರ ಪ್ರದೇಶಕ್ಕೆ ಭೇಟಿ ನೀಡಿ ಜಿಲ್ಲಾಡಳಿತಕ್ಕೆ ವರದಿ ನೀಡುವರೆಂದೂ ತಿಳಿದು ಬಂದಿದೆ.

ಮೀನುಗಾರಿಕಾ ಋತು ಪೂರ್ಣ ಗೊಳಿಸಿದ ಬಳಿಕ ಅಂದರೆ ಮೇ, ಜೂನ್‌ ತಿಂಗಳಿನಲ್ಲಿ ಬೃಹತ್‌ ಗಾತ್ರದ ಮೀನುಗಾರಿಕಾ ಬೋಟುಗಳಲ್ಲಿನ ಬಳಸಿದ ಆಯಿಲನ್ನು ಸಮುದ್ರದಲ್ಲಿ ಎಲ್ಲೆಂದರಲ್ಲಿ ವಿಸರ್ಜಿಸುತ್ತಿರುವುದರಿಂದ ಈ ರೀತಿಯಾಗುತ್ತಿದೆ. ಕಳೆದ ಕೆಲ ವರ್ಷಗಳಿಂದ ಇಂತಹ ಸಮಸ್ಯೆಗಳು ಕಂಡು ಬರುತ್ತಿವೆ. ಈ ಬಗ್ಗೆ ಮೀನುಗಾರರು ಯೋಚಿಸಬೇಕು ಎಂದು ಮೀನುಗಾರ ಮುಖಂಡರೊಬ್ಬರು ಪ್ರತಿಕ್ರಿಯಿಸಿದ್ದಾರೆ.