ಶುದ್ಧ ನೀರಿನ ಘಟಕ ಅಪೂರ್ಣ: ಪೋಲಾಗುತ್ತಿದೆ ಜೀವಜಲ

Team Udayavani, May 29, 2019, 6:00 AM IST

ಗುತ್ತಿಗಾರು: ಬರದಿಂದ ಜಿಲ್ಲೆಯೇ ಕಂಗೆಟ್ಟಿರುವಾಗ ದಾಹ ತೀರಿಸಲು ನಿರ್ಮಿಸಲಾದ ಶುದ್ಧ ನೀರಿನ ಘಟಕವೇ ಜೀವಜಲ ಪೋಲಾಗಲು ಕಾರಣವಾಗುತ್ತಿದೆ! ರಾಷ್ಟ್ರೀಯ ಗ್ರಾಮೀಣ ಗುಡಿಯುವ ನೀರಿನ ಯೋಜನೆಯಲ್ಲಿ ಗ್ರಾಮೀಣಾಭಿವೃದ್ಧಿ ಹಾಗೂ ಪಂಚಾಯತ್‌ ರಾಜ್‌ ಇಲಾಖೆಯ ವತಿಯಿಂದ ದೇವಚಳ್ಳ ಗ್ರಾ.ಪಂ. ಆವರಣದಲ್ಲಿ ನಿರ್ಮಿಸಲಾದ ಶುದ್ಧ ನೀರಿನ ಘಟಕದಲ್ಲಿ 1 ಲೀಟರ್‌ ಶುದ್ಧ ನೀರು ಪಡೆಯಬೇಕೆಂದರೆ 6 ಲೀಟರ್‌ ನೀರು ಪೋಲಾಗುತ್ತಿದೆ. ದೇವಚಳ್ಳ ಪರಿಸರದಲ್ಲಿ ನೀರಿಗೆ ಹಾಹಾಕಾರ ಇರುವಾಗ ಇಂಥದೊಂದು ಕಳಪೆ ಕಾಮಗಾರಿ ಪಂಚಾಯತ್‌ಗೆ ತಲೆನೋವಾಗಿ ಪರಿಣಮಿಸಿದೆ.

ತಾಲೂಕಿನ ನಾನಾ ಕಡೆಗಳಲ್ಲಿ ಶುದ್ಧ ನೀರಿನ ಘಟಕಗಳನ್ನು ಸ್ಥಾಪಿಸಲಾಗಿದ್ದು, ಯಾವ ಕಾಮಗಾರಿಯೂ ಪೂರ್ಣಗೊಂಡಿಲ್ಲ. ಆದರೆ ದೇವಚಳ್ಳ ಗ್ರಾ.ಪಂ. ಅಧ್ಯಕ್ಷರು ಹಾಗೂ ಆಡಳಿತ ಮಂಡಳಿಯ ಮುತುವರ್ಜಿಯಿಂದ ನೀರಿನ ಘಟಕ 2 ರೂ.ಗೆ 20 ಲೀಟರ್‌ ನೀರು ಪೂರೈಸುವ ಕಾರ್ಯ ಮಾಡಿದೆ. ಕಾಮಗಾರಿ ಅಪೂರ್ಣವಾಗಿರುವ ಕಾರಣ 1 ಲೀಟರ್‌ ನೀರನ್ನು ಶುದ್ಧೀಕರಿಸಲು 6 ಲೀ. ನೀರನ್ನು ಘಟಕಕ್ಕೆ ಪೂರೈಸಬೇಕಾಗುತ್ತದೆ. ತಾಂತ್ರಿಕ ದೋಷದಿಂದಾದ ಈ ಅಚಾತುರ್ಯ ನಡೆಯುತ್ತಿದೆ. ಅಷ್ಟಕ್ಕಷ್ಟೇ ಇರುವ ನೀರು ಈ ರೀತಿ ಪೋಲಾದರೆ ಘಟಕಕ್ಕೆ ನೀರು ಪೂರೈಸುವುದು ಹೇಗೆ? ಎನ್ನುವ ಪ್ರಶ್ನೆ ಸಿಬಂದಿಯದು.

ಪೋಲಾಗಲು ಕಾರಣವೇನು?
ನೀರು ಶುದ್ಧೀಕರಣ ಘಟಕಕ್ಕೆ ಪೂರೈಸಲಾಗುವ ನೀರಿನಲ್ಲಿ ಹೆಚ್ಚು ಉಪ್ಪಿನಂಶ ಜಾಸ್ತಿ ಇದ್ದರೆ ಪೋಲಾಗುವ ನೀರಿನ ಪ್ರಮಾಣವೂ ಹೆಚ್ಚಾಗಿರುತ್ತದೆ. ಸಮುದ್ರ ತೀರ ಪ್ರದೇಶಗಳಲ್ಲಿ ಶುದ್ಧ ನೀರನ್ನು ಪಡೆಯುವಾಗ ಈ ರೀತಿ ನೀರು ಪೋಲಾಗುವ ಸಾಧ್ಯತೆಗಳಿದೆ. ಸುಳ್ಯ ತಾಲೂಕಿನಲ್ಲಿ ಲಭ್ಯವಿರುವ ನೀರಿನಲ್ಲಿ ಉಪ್ಪಿನಂಶ ಹೆಚ್ಚಾಗಿರುವ ಸಾಧ್ಯತೆ ಕಡಿಮೆ ಇದ್ದು, ನೀರು ಪೋಲಾಗಲು ಸಮಸ್ಯಾತ್ಮಕ ಅಥವಾ ಅಪೂರ್ಣ ತಾಂತ್ರಿಕ ರಚನೆಯೇ ಕಾರಣವಾಗಿರುವ ಸಾಧ್ಯತೆ ಇದೆ.

ಅಪೂರ್ಣ ಕಟ್ಟಡ
ಘಟಕಕ್ಕೆ ನಿರ್ಮಿಸಲಾದ ಕಟ್ಟಡವೂ ಅಪೂರ್ಣವಾಗಿದೆ. ನೆಲಕ್ಕೆ ಹಾಸಿರುವ ಟೈಲ್ಸ್‌ ಎದ್ದು ಹೋಗಿವೆ. ಕಟ್ಟಡದ ಬಹುತೇಕ ಕಾಮಗಾರಿ ಕಳಪೆಯಾಗಿದೆ ಎಂದು ಸ್ಥಳೀಯರು ಹೇಳುತ್ತಾರೆ.

ಫ್ರೀ ಶಾಕ್‌ ಟ್ರೀಟ್‌ಮೆಂಟ್‌!
ಅಪೂರ್ಣಗೊಂಡ ಶುದ್ಧ ನೀರಿನ ಘಟಕದಲ್ಲಿ ವಿದ್ಯುತ್‌ ಪ್ರವಹಿಸುತ್ತಿದ್ದು, ಮಳೆ ಸುರಿದಾಗ ನೀರು ಪಡೆದುಕೊಳ್ಳಲು ಹೋದರೆ ಶಾಕ್‌ ತಗಲುತ್ತದೆ. ಘಟಕದ ಒಳಗೆ ಮಳೆ ನೀರು ಹರಿಯುವುದರಿಂದ ಈ ರೀತಿಯಾಗಿ ಆಗುತ್ತದೆ ಎನ್ನುತ್ತಾರೆ ದೇವಚಳ್ಳ ಗ್ರಾ.ಪಂ ಅಧ್ಯಕ್ಷ ಡಿವಾಕರ ಮುಂಡೋಡಿ.

 ಪೋಲಾಗದಂತೆ ನೋಡುತ್ತೇವೆ
ಪ್ರವಾಸಿಗರು ಹಾಗೂ ಊರವರು ನೀರು ಪಡೆದುಕೊಳ್ಳುವುದರಿಂದ ನೀರು ಪೋಲಾಗದಂತೆ ನೋಡಿಕೊಳ್ಳುವ ಜವಾಬ್ದಾರಿ ನಮ್ಮದು. ಅಪೂರ್ಣಗೊಂಡ ಕಾಮಗಾರಿಯನ್ನು ಆದಷ್ಟು ಬೇಗ ಇಲಾಖೆ ಸರಿಪಡಿಸಬೇಕು.
 - ದಿವಾಕರ ಮುಂಡೋಡಿ, ಅಧ್ಯಕ್ಷರು, ದೇವಚಳ್ಳ ಗ್ರಾ.ಪಂ.

– ಕೃಷ್ಣಪ್ರಸಾದ್‌ ಕೋಲ್ಚಾರ್‌