ಮೋದಿ ಮತ್ತೆ ಪ್ರಧಾನಿ; ಜಿಲ್ಲಾದ್ಯಂತ ಸಂಭ್ರಮ

Team Udayavani, May 31, 2019, 10:53 AM IST

ಲಿಂಗಸುಗೂರು: ನರೇಂದ್ರ ಮೋದಿ ಎರಡನೇ ಬಾರಿ ದೇಶದ ಪ್ರಧಾನಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ ಹಿನ್ನೆಲೆಯಲ್ಲಿ ಮೋದಿ ಅಭಿಮಾನಿಗಳು ಸಿಹಿ ವಿತರಿಸಿ ಸಂಭ್ರಮಿಸಿದರು.

ಲಿಂಗಸುಗೂರು: ಅತ್ಯಂತ ಪ್ರಚಂಡ ಬಹುಮತದಿಂದ ಗೆದ್ದು ನರೇಂದ್ರ ಮೋದಿ ಮತ್ತೂಮ್ಮೆ ಪ್ರಧಾನಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದ್ದರಿಂದ ಗುರುವಾರ ಸಂಜೆ ಪಟ್ಟಣದಲ್ಲಿ ಟೀಮ್‌ ಮೋದಿ ಸಂಘಟನೆ, ಬಿಜೆಪಿ, ಹಿಂದೂ ಜಾಗರಣಾ ವೇದಿಕೆ ಸೇರಿದಂತೆ ಇನ್ನಿತರ ಸಂಘಟನೆಗಳ ಮುಖಂಡರು, ಕಾರ್ಯಕರ್ತರು ಅದ್ಧೂರಿಯಾಗಿ ವಿಜಯೋತ್ಸವ ಆಚರಿಸಿದರು.

ಪಟ್ಟಣದ ನೇತಾಜಿ ವೃತ್ತದಿಂದ ವಿವಿಧೆಡೆ ಪ್ರಧಾನಿ ನರೇಂದ್ರ ಮೋದಿಯವರ ಭಾವಚಿತ್ರ ಮೆರವಣಿಗೆ ನಡೆಸಿದರು. ವಿಜಯೋತ್ಸವ ಅಂಗವಾಗಿ 20 ಸಾವಿರ ಲಾಡು ಹಂಚಿದರು.

ಹಿರಿಯ ಮುಖಂಡ ಡಾ| ಶಿವಬಸಪ್ಪ ಮಾತನಾಡಿ, ಕಳೆದ ಐದು ವರ್ಷಗಳಲ್ಲಿ ನರೇಂದ್ರ ಮೋದಿ ದೇಶದ ಪ್ರಗತಿಗಾಗಿ ಶ್ರಮಿಸಿದ್ದಾರೆ. ಅವರು ದೇಶದ ಸಮರ್ಥ ನಾಯಕರಾಗಿ ಹೊರಹೊಮ್ಮಿದ್ದಾರೆ. ಇಡೀ ವಿಶ್ವವೇ ಮೆಚ್ಚುವಂತಹ ನಾಯಕರಾಗಿದ್ದಾರೆ. ಇದೀಗ ಎರಡನೇ ಅವಧಿಗೆ ಅವರು ಪ್ರಧಾನಿಯಾಗಿ ಅಧಿಕಾರ ಸ್ವೀಕರಿಸಿದ್ದು ನಮ್ಮೆಲ್ಲರಿಗೆ ಹೆಮ್ಮೆಯ ದಿನವಾಗಿದೆ ಎಂದರು. ಹಿರಿಯ ಮುಖಂಡ ಶರಣಬಸಪ್ಪ ಗುಡದನಾಳ, ಲಕ್ಷ್ಮೀಕಾಂತ ರೆಡ್ಡಿ, ಮನೋಹರ ರೆಡ್ಡಿ, ಜಗನ್ನಾಥ ಕುಲಕರ್ಣಿ, ವಿಶ್ವನಾಥ ಆನ್ವರಿ, ಅಯ್ಯಪ್ಪ ವಕೀಲ, ಹನುಮೇಶ ಸರಾಫ್‌, ಸಿದ್ದು ಬಡಿಗೇರ, ಚೆನ್ನಬಸವ ಹಿರೇಮಠ, ವೀರಣ್ಣ ಹುರಕಡ್ಲಿ, ಮಲ್ಲಯ್ಯ ತಾತ, ಜೀವನ ಬಾಳೇಗೌಡ ಇತರರು ಇದ್ದರು.