ಕ್ಯೂಆರ್‌ ಕೋಡ್‍ನಲ್ಲಿ ಪಠ್ಯದ ಹೆಚ್ಚುವರಿ ಮಾಹಿತಿ

Team Udayavani, Jun 2, 2019, 3:10 AM IST

ಬೆಂಗಳೂರು: ಶಾಲಾ ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ಪಠ್ಯಪುಸ್ತಕದ ಹೆಚ್ಚುವರಿ ಮಾಹಿತಿಯನ್ನು ಕ್ಯೂಆರ್‌ (ಕ್ವೀಕ್‌ ರೆಸ್ಪಾನ್ಸ್‌) ಕೋಡ್‌ ಬಳಸಿ ಪಡೆಯಬಹುದಾದ ಹೊಸ ವ್ಯವಸ್ಥೆಯನ್ನು ಸಾರ್ವಜನಿಕ ಶಿಕ್ಷಣ ಇಲಾಖೆ ಇದೇ ಮೊದಲ ಬಾರಿಗೆ ಜಾರಿಗೊಳಿಸಿದೆ.

ಕ್ಯೂಆರ್‌ ಕೋಡ್‌ ಸಹಾಯದಿಂದ ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ಪಠ್ಯದ ಸಮಗ್ರ ಮಾಹಿತಿಯನ್ನು ತಾವಿದ್ದ ಸ್ಥಳದಿಂದಲೇ ಪಡೆಯಬಹುದಾಗಿದೆ. ಇದಕ್ಕಾಗಿ “ದೀಕ್ಷಾ’ ಆ್ಯಪ್‌ನ್ನು ಕೂಡ ಅಭಿವೃದ್ಧಿಪಡಿಸಲಾಗಿದೆ. ಸ್ಮಾರ್ಟ್‌ಫೋನ್‌ನಲ್ಲಿ ಗೂಗಲ್‌ ಸ್ಟೋರ್‌ ಮೂಲಕ ದೀಕ್ಷಾ ಆ್ಯಪ್‌ನ್ನು ಡೌನ್‌ಲೋಡ್‌ ಮಾಡಿಕೊಂಡು, ಪುಸ್ತಕದ ಕ್ಯೂಆರ್‌ ಕೋಡ್‌ ಬಳಸಿ, ಸುಲಭವಾಗಿ ಪಠ್ಯಪುಸ್ತಕದಲ್ಲಿರುವ ಅಗತ್ಯ ಮಾಹಿತಿ ಪಡೆಯಬಹುದಾಗಿದೆ.

ರಾಜ್ಯ ಪಠ್ಯಕ್ರಮದ ಪಠ್ಯಪುಸ್ತಕದಲ್ಲಿ ಕ್ಯೂಆರ್‌ ಕೋಡ್‌ ವ್ಯವಸ್ಥೆ ಮಾಡಿರುವುದು ಇದೇ ಮೊದಲು. ತಂತ್ರಜ್ಞಾನ ಬೆಳೆಯುತ್ತಿರುವುದರಿಂದ ಸುಲಭದಲ್ಲಿ ಶಿಕ್ಷಕರಿಗೆ ಮತ್ತು ವಿದ್ಯಾರ್ಥಿಗಳಿಗೆ ಮಾಹಿತಿ ಒದಗಿಸಿ ಕೊಡುವ ಉದ್ದೇಶದಿಂದ ಕರ್ನಾಟಕ ಪಠ್ಯಪುಸ್ತಕ ಸಂಘವು ಕನ್ನಡ ಮತ್ತು ಇಂಗ್ಲಿಷ್‌ ಮಾಧ್ಯಮದ 6ರಿಂದ 10ನೇ ತರಗತಿಯ ಇಂಗ್ಲಿಷ್‌ ಪಠ್ಯಪುಸ್ತಕ ಮತ್ತು 6,7,9 ಮತ್ತು 10ನೇ ತರಗತಿಯ ಗಣಿತ ಹಾಗೂ ವಿಜ್ಞಾನ ಪಠ್ಯಪುಸ್ತಕದಲ್ಲಿ ಕ್ಯೂಆರ್‌ ಕೋಡ್‌ನ್ನು ವ್ಯವಸ್ಥೆ ಮಾಡಿದೆ.

ಎರಡೂ ಮಾಧ್ಯಮದ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರು ಇದರ ಅನುಕೂಲವನ್ನು ಪಡೆಯಬಹುದಾಗಿದೆ ಎಂದು ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದರು. ಕ್ಯೂಆರ್‌ ಕೋಡ್‌ ಬಳಸುವ ಮೂಲಕ ಶಿಕ್ಷಕರು ತಮಗೆ ಬೇಕಾದ ಅಗತ್ಯ ಮಾಹಿತಿಯನ್ನು ಅತಿ ತುರ್ತಾಗಿ ಪಡೆಯಬಹುದು ಮತ್ತು ಅದರ ಪ್ರಿಂಟ್‌ಔಟ್‌ ತೆಗೆದುಕೊಳ್ಳಲು ಅವಕಾಶವಿದೆ.

ಹಾಗೆಯೇ ವಿದ್ಯಾರ್ಥಿಗಳು ತಮ್ಮ ಪಾಲಕರ ಮೊಬೈಲ್‌ನಲ್ಲಿ ದೀಕ್ಷಾ ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಂಡು, ಮನೆಯಲ್ಲಿ ಪಠ್ಯಪುಸ್ತಕದ ಅಗತ್ಯ ಮಾಹಿತಿ ಪಡೆಯಬಹುದಾಗಿದೆ. 6ರಿಂದ 10ನೇ ತರಗತಿಯ ವಿದ್ಯಾರ್ಥಿಗಳಿಗೆ ಇದು ಹೆಚ್ಚು ಅನುಕೂಲ ಆಗಲಿದೆ. ಮುಂದಿನ ದಿನಗಳಲ್ಲಿ ಎಲ್ಲ ವಿಷಯಕ್ಕೂ ಇದನ್ನು ಅಳವಡಿಸುವ ಯೋಜನೆಯನ್ನು ಸರ್ಕಾರ ಹೊಂದಿದೆ ಎಂದು ವಿವರ ನೀಡಿದರು.

ಆ್ಯಪ್‌ ಬಳಕೆ ಹೇಗೆ?: ದೀಕ್ಷಾ ಆ್ಯಪ್‌ನ್ನು ಡೌನ್‌ಲೋಡ್‌ ಮಾಡಿಕೊಂಡು, ಓಪನ್‌ ಮಾಡಿದ ತಕ್ಷಣವೇ ಭಾಷೆಯನ್ನು ಆಯ್ಕೆ ಮಾಡಿಕೊಳ್ಳಬಹುದಾದ ಅವಕಾಶ ನೀಡಲಾಗಿದೆ. ಅದರಲ್ಲಿ ಹಿಂದಿ, ಇಂಗ್ಲಿಷ್‌, ಮರಾಠಿ, ತೆಲಗು, ಕನ್ನಡ, ತಮಿಳು, ಉರ್ದು ಭಾಷೆಯ ಆಯ್ಕೆಗಳು ಲಭ್ಯ ಇವೆ.

ನಿಮ್ಮ ಭಾಷೆಯನ್ನು ಆಯ್ಕೆ ಮಾಡಿಕೊಂಡ ನಂತರ ನೀವು ವಿದ್ಯಾರ್ಥಿಯೇ ಅಥವಾ ಶಿಕ್ಷಕ, ಶಿಕ್ಷಕಿಯರೇ ಎಂಬ ಎರಡು ಆಯ್ಕೆ ತೆರೆದುಕೊಳ್ಳುತ್ತದೆ. ವಿದ್ಯಾರ್ಥಿಯಾಗಿದ್ದರೆ-ಪುಸ್ತಕದಲ್ಲಿರುವ ಸಂಪನ್ಮೂಲಗಳನ್ನು (ಮಾಹಿತಿ) ಹುಡುಕಿ ಎಂದು ಬರುತ್ತದೆ. ಅದನ್ನು ಒತ್ತಿದರೆ ಕ್ಯೂಆರ್‌ ಕೋಡ್‌ ಆಪ್ಷನ್‌ ತೆರೆದುಕೊಳ್ಳುತ್ತದೆ.

ಆಗ ಕ್ಯೂಆರ್‌ ಕೋಡ ಬಳಸಿ ಮಾಹಿತಿ ಪಡೆಯಬಹುದು. ಶಿಕ್ಷಕ ಅಥವಾ ಶಿಕ್ಷಕಿಯಾಗಿದ್ದರೆ ಬೇಕಿರುವ ಕೋರ್ಸ್‌, ಸಂಬಂಧಿತ ಸಂಪನ್ಮೂಲ (ಮಾಹಿತಿ), ಗುಂಪುಗಳ ಮೂಲಕ ಹುಡುಕಬಹುದಾದ ಆಯ್ಕೆ ಬರುತ್ತದೆ. ಆಗ ಕ್ಯೂಆರ್‌ ಕೋಡ್‌ ಬಳಸಿ, ನಿಮಗೆ ಬೇಕಾದ ಮಾಹಿತಿ ಪಡೆಯಬಹುದಾಗಿದೆ.

ರಾಜ್ಯ ಪಠ್ಯಕ್ರಮದ ಕೆಲವು ಪುಸ್ತಕದಲ್ಲಿ ಇದೇ ಮೊದಲ ಬಾರಿಗೆ ಕ್ಯೂಆರ್‌ ಕೋಡ್‌ ಅಳವಡಿಸಲಾಗಿದೆ. ಇದು ಶಿಕ್ಷಕರಿಗೆ ಮತ್ತು ವಿದ್ಯಾರ್ಥಿಗಳಿಗೆ ಅನುಕೂಲವಾಗಲಿದೆ. ಅಲ್ಲದೆ, ಮಕ್ಕಳ ಬ್ಯಾಗ್‌ ಹೊರೆ ಕೂಡ ಇದರಿಂದ ಕಡಿಮೆಯಾಗಲಿದೆ.
-ಉಮಾಶಂಕರ್‌, ಪ್ರಧಾನ ಕಾರ್ಯದರ್ಶಿ, ಪ್ರಾಥಮಿಕ ಹಾಗೂ ಪ್ರೌಢಶಿಕ್ಷಣ ಇಲಾಖೆ.

* ರಾಜು ಖಾರ್ವಿ ಕೊಡೇರಿ