ಶಸ್ತ್ರಚಿಕಿತ್ಸೆಯ ಮೂಲಕ ಜನನೇಂದ್ರಿಯ ಅಳವಡಿಕೆ

Team Udayavani, Jun 2, 2019, 6:00 AM IST

ಇಂದೋರ್‌: ಹುಟ್ಟಿದಾಗಿನಿಂದ ಜನನೇಂದ್ರಿಯ ಹೊಂದಿಲ್ಲದ ಬಾಲಕಿಯೊಬ್ಬಳಿಗೆ ಇಲ್ಲಿನ ಮಹಾರಾಜ ಯಶ್ವಂತ್‌ರಾವ್‌ ಹೋಳ್ಕರ್‌ ಆಸ್ಪತ್ರೆಯಲ್ಲಿ ಶಸ್ತ್ರಚಿಕಿತ್ಸೆಯ ಮೂಲಕ ಜನನೇಂದ್ರಿಯ ಯಶಸ್ವಿಯಾಗಿ ಅಳವಡಿಸಲಾಗಿದೆ. “ವೆಜಿನೋಪ್ಲಾಸ್ಟಿ’ ಎಂದು ಕರೆಯಲ್ಪಡುವ ಈ ಶಸ್ತ್ರಕ್ರಿಯೆ ಸುಮಾರು 5 ಗಂಟೆಗಳ ಕಾಲ ನಡೆದಿತ್ತು. ವಾರದ ನಂತರ, ಚೇತರಿಸಿಕೊಂಡಿರುವ ಆಕೆ ಆರೋಗ್ಯವಾಗಿ ಮನೆಗೆ ಹಿಂದಿರುಗಿದ್ದಾರೆ ಎಂದು ಶಸ್ತ್ರಚಿಕಿತ್ಸೆ ನಡೆಸಿದ್ದ ಆಸ್ಪತ್ರೆಯ ಪೀಡಿಯಾಟ್ರಿಕ್‌ ಸರ್ಜರಿ ವಿಭಾಗದ ಸಹ ಪ್ರಾಧ್ಯಾಪಕರಾದ ಡಾ. ಅಶೋಕ್‌ ಲಾಢಾ ತಿಳಿಸಿದ್ದಾರೆ. “2005ರಲ್ಲಿ ಜನಿಸಿದ್ದ ಆ ಬಾಲಕಿಗೆ ಹುಟ್ಟಿನಿಂದಲೂ ಜನನೇಂದ್ರಿಯ ಇರಲಿಲ್ಲ. ಜತೆಗೆ, ಆಕೆಗೆ ಗುದದ್ವಾರವೂ ಇರಲಿಲ್ಲ. ಆಕೆ ಜನಿಸಿ ಒಂದು ವರ್ಷದೊಳಗೆ ಮೂರು ಶಸ್ತ್ರಕ್ರಿಯೆ ನಡೆಸಿ ಗುದದ್ವಾರವನ್ನು ಮರು ಸೃಷ್ಟಿಸಲಾಗಿತ್ತು. ಈಗ, ಆಕೆಯ ಕರುಳಿನ ಭಾಗವನ್ನೇ ಕತ್ತರಿಸಿ ತೆಗೆದು ಅದನ್ನು ಜನನೇಂದ್ರಿಯವಾಗಿ ಅಳವಡಿಸಲಾಗಿದೆ’ ಎಂದು ಅವರು ತಿಳಿಸಿದ್ದಾರೆ.