ಒಗ್ಗಟ್ಟಿನಿಂದ ಬಲಿಷ್ಠವಾದ ಬಿಜೆಪಿ

Team Udayavani, Jun 2, 2019, 10:27 AM IST

ಔರಾದ: ಪಟ್ಟಣ ಪಂಚಾಯತ ಚುನಾವಣೆ ಫಲಿತಾಂಶ ತಿಳಿಯುತ್ತಿದ್ದಂತೆ ಅಭ್ಯರ್ಥಿಗಳ ಕುಟುಂಬ ಸದಸ್ಯರು ಸಂಭ್ರಮ ಆಚರಿಸಿದರು.

ಔರಾದ: ಭಾರೀ ಕುತೂಹಲ ಮೂಡಿಸಿದ್ದ ಔರಾದ ಪಟ್ಟಣ ಪಂಚಾಯತ ಚುನಾವಣೆ ಫಲಿತಾಂಶ ಹೊರಬಿದ್ದಿದ್ದು, ಮತದಾರರು ಬಿಜೆಪಿಗೆ ಸ್ಪಷ್ಟ ಬಹುಮತದೊಂದಿಗೆ ಆರ್ಶೀವಾದ ಮಾಡಿದ್ದಾರೆ.

ಒಟ್ಟು 20 ವಾರ್ಡ್‌ಗಳಿರುವ ಪಟ್ಟಣ ಪಂಚಾಯತನಲ್ಲಿ 12 ಸ್ಥಾನ ಬಿಜೆಪಿ, 6 ಸ್ಥಾನ ಕಾಂಗ್ರೆಸ್‌, 2 ಸ್ಥಾನಗಳಲ್ಲಿ ಪಕ್ಷೇತರರು ಗೆಲುವು ಸಾಧಿಸಿದ್ದಾರೆ. ಕಳೆದ ಬಾರಿ ಪಪಂ ಚುನಾವಣೆಯಲ್ಲಿ ಕೆಜೆಪಿ ಹಾಗೂ ಬಿಜೆಪಿ ಸಮಬಲದ ಗೆಲುವು ಸಾಧಿಸಿದ್ದವು. ಕೆಜೆಪಿ ಮೂಲಕ ಏಳು ಸದಸ್ಯರು ಕಾಂಗ್ರೆಸ್‌ ಪಕ್ಷಕ್ಕೆ ಸೇರ್ಪಡೆಯಾಗಿದ್ದರು. ಅರದರಂತೆ ಬಿಜೆಪಿಯ ಅಂದಿನ ಸದಸ್ಯ ರಾಜಕುಮಾರ ನಿರ್ಮಳೆ ಅವರನ್ನು ಕಾಂಗ್ರೆಸ್‌ ಪಕ್ಷಕ್ಕೆ ಸೇರ್ಪಡೆ ಮಾಡಿಕೊಳ್ಳುವ ಮೂಲಕ ಪಟ್ಟಣ ಪಂಚಾಯತ ಅಧಿಕಾರನ್ನು ಕಾಂಗ್ರೆಸ್‌ ಪಕ್ಷ ಹಿಡಿದಿತ್ತು.

ಶಾಸಕ ಪ್ರಭು ಚವ್ಹಾಣ ಅವರ ಕಠಿಣ ಪರಿಶ್ರಮ ಹಾಗೂ ಸಂಸದ ಭಗವಂತ ಖೂಬಾ ಅವರ ಮಾರ್ಗದರ್ಶನದಿಂದ, ಕಾರ್ಯಕರ್ತರ ಒಗ್ಗಟ್ಟಿನ ಶ್ರಮದಿಂದ ಪಟ್ಟಣದಲ್ಲಿ ಬಿಜೆಪಿ ಬಲಿಷ್ಠವಾಗಿ ಬೆಳೆದು ಈ ಬಾರಿ ಅಧಿಕಾರಕ್ಕೆ ಬಂದಿದೆ. ಪಕ್ಷ ಸಂಪೂರ್ಣ ಬಹುಮತದಿಂದ ಅಧಿಕಾರಕ್ಕೆ ಬರಲು ಸ್ಥಳೀಯ ನಾಯಕರ ಪರಿಶ್ರಮವೇ ಕಾರಣ ಎನ್ನಬಹುದಾಗಿದೆ.

ಕಾಂಗ್ರೆಸ್‌ ಪಕ್ಷದ ನಾಯಕರ ಆಂತರಿಕ ಭಿನ್ನಮತ ಹಾಗೂ ಟಿಕೆಟ್ ಹಂಚಿಕೆಯಲ್ಲಿ ನಡೆದ ಗೊಂದಲದಿಂದ ಪಕ್ಷದ ಅಭ್ಯರ್ಥಿಗಳ ಸೋಲಿಗೆ ಕಾರಣವಾಗಿದೆ. ಚುನಾವಣೆ ಪೂರ್ವದಲ್ಲಿ ಅಭ್ಯರ್ಥಿಗಳನ್ನು ಚುನಾವಣೆ ಕಣಕ್ಕೆ ಇಳಿಸಿ ಮುಖಂಡರು ಪ್ರಚಾರಕ್ಕೆ ಬಂದಿರಲಿಲ್ಲ. ಪತ್ರಿಕೆಯಲ್ಲಿ ವರದಿಗಳು ಬಂದ ನಂತರ ಒಂದೇ ದಿನಕ್ಕೆ ಎರಡು ಗುಂಪಿನ ನಾಯಕರು ಪ್ರತ್ಯೇಕವಾಗಿ ಪ್ರಚಾರ ಮಾಡಿದ ಹಿಮನ್ನೆಲೆಯಲ್ಲಿ ಪಕ್ಷ ಅಧಿಕಾರದಿಂದ ದೂರ ಉಳಿಯುವಂತಾಯಿತು.

ವಾರ್ಡ್‌ 13 ಮತ್ತು 8ರಲ್ಲಿ ಕಾಂಗ್ರೆಸ್‌ ಪಕ್ಷದಿಂದ ಟಿಕೆಟ್ ಸಿಕ್ಕಿಲ್ಲವೆಂದು ವಾರ್ಡ್‌ 13ರಲ್ಲಿ ಇಮಾನವ್ಯೆಲ್ ಬಂಟಿ ಹಾಗೂ ವಾರ್ಡ್‌ 8ರಲ್ಲಿ ದಯಾನಂದ ವೈಜಿನಾಥ ಘೂಳೆ ಪಕ್ಷೇತರ ಅಭ್ಯರ್ಥಿಗಳಾಗಿ ಗೆಲುವು ಸಾಧಿಸಿ , ಕಾಂಗ್ರೆಸ್‌ ಪಕ್ಷದ ಮುಖಂಡರಿಗೆ ತಮ್ಮ ಶಕ್ತಿ ತೋರಿಸಿದ್ದಾರೆ.

ಮೂರು ಅಧ್ಯಕ್ಷರ ಗೆಲುವು: ಪಟ್ಟಣ ಪಂಚಾಯತ ಚುನಾವಣೆಯಲ್ಲಿ ಒಂದು ಸಲ ಗೆದ್ದು ಇನ್ನೊಂದು ಸಲ ಗೆಲ್ಲುವುದೇ ಕಠಿಣವಾಗಿದೆ. ಆದರೆ ಔರಾದ ಪಟ್ಟಣದಲ್ಲಿ ಮೂವರು ಪಪಂ ಮಾಜಿ ಅಧ್ಯಕ್ಷರು ಸತತವಾಗಿ ಆಯ್ಕೆಯಾಗುವ ಮೂಲಕ ಜನರ ಮೆಚ್ಚುಗೆ ಪಡೆದಿದ್ದಾರೆ. ಪಪಂ ಮಾಜಿ ಅಧ್ಯಕ್ಷ ಧೋಂಡಿಬಾರಾವ್‌ ನರೋಟೆ ಮೂರನೇ ಬಾರಿಯೂ ಸಹ ಕಾಂಗ್ರೆಸ್‌ ಪಕ್ಷದಿಂದಲೆ ಆಯ್ಕೆಯಾಗಿದ್ದಾರೆ. ಸರಸ್ವತಿ ವೈಜಿನಾಥ ಘೂಳೆ ಕೆಜೆಪಿಯಿಂದ ಒಂದು ಸಲ, ಕಾಂಗ್ರೆಸ್‌ ಪಕ್ಷದಿಂದ ಎರಡು ಸಲ ಆಯ್ಕೆಯಾಗಿದ್ದಾರೆ. ಅದರಂತೆ ಸುನೀಲಕುಮಾರ ದೇಶಮುಖ ಎರಡನೆ ಬಾರಿಯೂ ಸಹ ಬಿಜೆಪಿಯಿಂದಲೆ ಆಯ್ಕೆಯಾಗಿದ್ದಾರೆ. ಪಟ್ಟಣದಲ್ಲಿ ಉತ್ತಮ ಕೆಲಸ ಮಾಡುವ ವ್ಯಕ್ತಿಯನ್ನು ಇಲ್ಲಿನ ಮತದಾರರು ಎಂದಿಗೂ ಕೈ ಬಿಡುವುದಿಲ್ಲ ಎಂಬುದು ಫಲಿತಾಂಶದ ತಿಳಿಯುತ್ತದೆ.

ತಾಯಿ-ಮಗ ಗೆಲುವು: ಸರಸ್ವತಿ ವೈಜಿನಾಥ ಘೂಳೆ 19ನೇ ವಾರ್ಡ್‌ನಲ್ಲಿ ಕಾಂಗ್ರೆಸ್‌ ಪಕ್ಷದಿಂದ ಗೆಲುವು ಸಾಧಿಸಿದ್ದರೆ, ಪುತ್ರ ದಯಾನಂದ ಘೂಳೆ ಕಾಂಗ್ರೆಸ್‌ ಪಕ್ಷದಿಂದ ಟಿಕೆಟ್ ಸಿಗದಿರುವುದರಿಂದ ಪಕ್ಷೇತರ ಅಭ್ಯರ್ಥಿಯಾಗಿ 8ನೇ ವಾರ್ಡ್‌ನಲ್ಲಿ ಗೆಲುವು ಸಾಧಿಸಿದ್ದಾರೆ.

ಮಾವ-ಸೊಸೆ ಗೆಲುವು: ಪಟ್ಟಣ ಪಂಚಾಯತ ಮಾಜಿ ಅಧ್ಯಕ್ಷ ಹಾಗೂ ಹ್ಯಾಟ್ರಿಕ್‌ ಗೆಲುವು ಸಾಧಿಸಿದ 9ನೇ ವಾರ್ಡ್‌ನಲ್ಲಿ ಕಾಂಗ್ರೆಸ್‌ ಪಕ್ಷದಿಂದ ಗೆಲುವು ಸಾಧಿಸಿದ ಧೋಂಡಿಬಾರಾವ್‌ ನರೋಟೆ ಹಾಗೂ 1ನೇ ವಾರ್ಡ್‌ನ‌ಲ್ಲಿ ರಾಧಾ ಕೃಷ್ಣಾ ನರೋಟೆ, ಒಂದೇ ಕುಟುಂಬದ ಇಬ್ಬರು (ಮಾವ-ಸೊಸೆ) ಗೆಲುವು ಸಾಧಿಸಿದ್ದಾರೆ.