ಗಮನ ಸೆಳೆದ ಯಶ್‌ ರಾಯಲ್‌ ಲುಕ್‌

Team Udayavani, Jun 3, 2019, 3:00 AM IST

“ಕೆಜಿಎಫ್ ಚಾಪ್ಟರ್‌ 2′ ಚಿತ್ರದ ಚಿತ್ರೀಕರಣವನ್ನು ಇದೇ ಜೂನ್‌ ಮೊದಲ ವಾರದಿಂದ ಮೈಸೂರಿನಲ್ಲಿ ನಡೆಸಲು ಚಿತ್ರತಂಡ ಪ್ಲಾನ್‌ ಮಾಡಿಕೊಂಡಿರುವ ನಡುವೆಯೇ, ನಟ ಯಶ್‌ ಅವರ ಹೊಸ ಫೋಟೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ವೈರಲ್‌ ಆಗಿದೆ.

ಉದ್ದ ಕೂದಲು ಮತ್ತು ಉದ್ದ ದಾಡಿ ಬಿಟ್ಟಿರುವ ಯಶ್‌, ಕೈಯಲ್ಲೊಂದು ಸ್ಟಿಕ್‌ ಹಿಡಿದು ಕೂತಿರುವ ರಾಯಲ್‌ ಲುಕ್‌ ಅಭಿಮಾನಿಗಳ ಕುತೂಹಲ ಕೆರಳಿಸಿದೆ. ಆರಂಭದಲ್ಲಿ ಈ ಫೋಟೋ “ಕೆಜಿಎಫ್ ಚಾಪ್ಟರ್‌ 2′ ಚಿತ್ರದಲ್ಲಿ ಬರುವ ಯಶ್‌ ಲುಕ್‌ಗಳಲ್ಲಿ ಒಂದು ಎಂದು ಹೇಳಲಾಯಿತಾದರೂ, ಚಿತ್ರತಂಡ ಮಾತ್ರ ಈ ಬಗ್ಗೆ ತುಟಿಬಿಚ್ಚಿಲ್ಲ.

ಹಾಗಾದ್ರೆ ಈ ಫೋಟೋ ಯಾವ ಚಿತ್ರದ್ದು ಎನ್ನುವ ಪ್ರಶ್ನೆ ಸದ್ಯ ಯಶ್‌ ಅಭಿಮಾನಿಗಳಲ್ಲಿ ಮನೆಮಾಡಿರುವಂತೆಯೇ, ಈ ಫೋಟೋ ಯಶ್‌ ಅವರ ಹೊಸ ಜಾಹಿರಾತಿನ ಫೋಟೋ ಶೂಟ್‌ ಎಂದು ಹೇಳಲಾಗುತ್ತಿದೆ. ಆದರೆ ಅದೆಲ್ಲದಕ್ಕೂ “ಕೆಜಿಎಫ್ ಚಾಪ್ಟರ್‌ 2′ ಅಥವಾ ಹೊಸ ಜಾಹೀರಾತು ಹೊರಬಂದ ಮೇಲಷ್ಟೇ ಉತ್ತರ ಸಿಗಲಿದೆ.