ಮಹಿಳೆ ಮೇಲೆ ಗುಜರಾತ್‌ ಶಾಸಕನ ಗೂಂಡಾಗಿರಿ

Team Udayavani, Jun 4, 2019, 6:00 AM IST

ಅಹ್ಮದಾಬಾದ್‌: ತಮ್ಮ ಪ್ರಾಂತದಲ್ಲಿ ನೀರು ಸರಬರಾಜು ವ್ಯವಸ್ಥೆಯನ್ನು ಪುನರಾರಂಭಿಸುವಂತೆ ಮನವಿ ಸಲ್ಲಿಸಲು ಬಂದಿದ್ದ ಎನ್‌ಸಿಪಿ ನಾಯಕಿ ನೀತು ತೇಜ್ವಾನಿ ಎಂಬುವರನ್ನು ಗುಜರಾತ್‌ನ ನರೋಡಾದ ಬಿಜೆಪಿ ಶಾಸಕ ಬಲರಾಮ್‌ ಥವಾನಿ ಅವರು ತಮ್ಮ ಕಚೇರಿ ಆವರಣದಲ್ಲೇ ಕಪಾಳ ಮೋಕ್ಷ ಮಾಡಿದ್ದಲ್ಲದೆ, ಕೆಳಗೆ ಬಿದ್ದ ಮಹಿಳೆಯನ್ನು ಬೂಟು ಕಾಲಿ ನಿಂದ ಒದ್ದು ಹಲ್ಲೆ ನಡೆಸಿದ್ದಾರೆ. ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗುತ್ತಿದ್ದಂತೆ ಥವಾನಿ ಕ್ಷಮೆ ಕೋರಿದ್ದು, ನೀತು ಅವರ ನಿವಾಸಕ್ಕೆ ತೆರಳಿ ರಾಖಿ ಕಟ್ಟಿಸಿಕೊಂಡು ಬಂದಿರುವುದಾಗಿ ಹೇಳಿಕೊಂಡಿದ್ದಾರೆ.

ನೀತು ಅವರು ಹೇಳುವ ಪ್ರಕಾರ, ಅವರು ಮೊದಲಿಗೆ ಥವಾನಿಯವರ ಸಹೋದರ ಕಿಶೋರ್‌ ಥವಾನಿ (ಈತ ಕಾರ್ಪೊರೇಟರ್‌) ಅವರನ್ನು ಭೇಟಿ ಮಾಡಿ ತಮ್ಮ ಪ್ರಾಂತಕ್ಕೆ ನೀರಿನ ಸೌಕರ್ಯ ಪುನರಾರಂಭಿಸಬೇಕೆಂದು ಮನವಿ ಸಲ್ಲಿಸಿದರು. ಆದರೆ, ಅದಕ್ಕೆ ಸಮ್ಮತಿಸದ ಕಿಶೋರ್‌, ನೀತು ಅವರನ್ನು ನಿಂದಿಸಿದ್ದರು. ಹೀಗಾಗಿ, ನೀತು ಹಾಗೂ ಅವರ ಪತಿ ತಮ್ಮ ಪ್ರಾಂತದ ಕೆಲವು ಮಹಿಳೆಯರ ಜತೆಗೆ ಶಾಸಕರಿಗೆ ಮನವಿ ಸಲ್ಲಿಸಲು ತೆರಳಿದ್ದರು. ಘಟನೆಯನ್ನು ಖಂಡಿಸಿರುವ ಎನ್‌ಸಿಪಿ, ಶಾಸಕ ಥವಾನಿ ವಿರುದ್ಧ ಕ್ರಮಕ್ಕೆ ಒತ್ತಾಯಿಸಿದೆ.