ಕಾಂಗ್ರೆಸ್‌ಗೆ ಬಿದ್ದಿರುವ ಬೆಂಕಿ ತತ್‌ಕ್ಷಣ ನಂದಿಸಿ : ರಾಹುಲ್‌ಗೆ ಮೊಯಿಲಿ ಮೊರೆ

Team Udayavani, Jun 7, 2019, 5:21 PM IST

ಹೈದರಾಬಾದ್‌ : ‘ಕಾಂಗ್ರೆಸ್‌ ಪಕ್ಷಕ್ಕೆ ಬಿದ್ದಿರುವ ಬೆಂಕಿಯನ್ನು ತತ್‌ಕ್ಷಣ ನಂದಿಸಬೇಕಾಗಿದೆ, ಇಲ್ಲದಿದ್ದರೆ ಮಹಾ ವಿಪತ್ತು ಸಂಭವಿಸಲಿದೆ, ಆದುದರಿಂದ ಕೂಡಲೇ ಪಕ್ಷಾಧ್ಯಕ್ಷ ಹುದ್ದೆಯನ್ನು ವಹಿಸಿಕೊಳ್ಳಿ’ ಎಂದು ಕಾಂಗ್ರೆಸ್‌ ಹಿರಿಯ ನಾಯಕ ವೀರಪ್ಪ ಮೊಯಿಲಿ, ರಾಹುಲ್‌ ಗಾಂಧಿ ಅವರನ್ನು ಬೇಡಿಕೊಂಡಿದ್ದಾರೆ.

‘ಕೆಲವು ರಾಜ್ಯಗಳಲ್ಲಿ (ಪಂಜಾಬ್‌ ಮತ್ತು ರಾಜಸ್ಥಾನ) ಭಿನ್ನಮತದ ಬೆಂಕಿ ಭುಗಿಲೆದ್ದಿದೆ; ಇನ್ನು ಕೆಲವು ರಾಜ್ಯಗಳಲ್ಲಿ (ತೆಲಂಗಾಣ, ಮಹಾರಾಷ್ಟ್ರ) ಪಕ್ಷವನ್ನು ತ್ಯಜಿಸಿ ಹೋಗುವವರ ಸಂಖ್ಯೆ ಹೆಚ್ಚುತ್ತಿದೆ. ಪಕ್ಷದ ನಾಯಕತ್ವ ನಿಷ್ಕ್ರಿಯವಾದಾಗ ಈ ರೀತಿಯ ವಿದ್ಯಮಾನಗಳು ಸಂಭವಿಸುತ್ತವೆ; ಆದುದರಿಂದ ಕೂಡಲೇ ಪಕ್ಷಾಧ್ಯಕ್ಷ ಸ್ಥಾನ ವಹಿಸಿಕೊಂಡು ಪಕ್ಷವನ್ನು ಅಧಃಪತನದಿಂದ ಉಳಿಸಿ’ ಎಂದು ಮೊಯಿಲಿ ಅವರು ರಾಹುಲ್‌ ಗಾಂಧಿ ಅವರನ್ನು ಕೇಳಿಕೊಂಡಿದ್ದಾರೆ.

2019ರ ಲೋಕಸಭಾ ಚುನಾವಣೆಯಲ್ಲಿ 18 ರಾಜ್ಯಗಳಲ್ಲಿ ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಕಾಂಗ್ರೆಸ್‌ ಪಕ್ಷ ನಾಮಾವಶೇಷವಾಗಿರುವ ಹಿನ್ನೆಲೆಯಲ್ಲಿ ಸೋಲಿನ ಹೊಣೆ ಹೊತ್ತು ರಾಹುಲ್‌ ಗಾಂಧಿ ಅವರು ಕಳೆದ ಮೇ 25ರ ಸಿಡಬ್ಲ್ಯುಸಿ ಸಭೆಯಲ್ಲಿ ಪಕ್ಷಾಧ್ಯಕ್ಷ ಹುದ್ದೆಗೆ ರಾಜೀನಾಮೆ ನೀಡಿದ್ದರು.