ಭಾರತದ ಸ್ತ್ರೀಯರ ಹೆಗ್ಗಳಿಕೆ

Team Udayavani, Jun 8, 2019, 6:00 AM IST

ನ್ಯೂಯಾರ್ಕ್‌: ಪ್ರತಿಷ್ಠಿತ ನಿಯತಕಾಲಿಕೆ ‘ಫೋರ್ಬ್ಸ್’ ತಯಾರಿಸಿರುವ ಅಮೆರಿಕದ ಅತಿ ಶ್ರೀಮಂತ ಮಹಿಳಾ ಸ್ವಯಂ ಉದ್ಯಮಿಗಳ ಪಟ್ಟಿಯಲ್ಲಿ ಭಾರತ ಮೂಲದ ಜಯಶ್ರೀ ಉಲ್ಲಾಳ, ನೀರಜಾ ಸೇಥಿ ಹಾಗೂ ನೇಹಾ ನಾರ್ಖೇಡೆ ಸ್ಥಾನ ಪಡೆದಿದ್ದಾರೆ.

‘ಅಮೆರಿಕಾಸ್‌ ರಿಚೆಸ್ಟ್‌ ಸೆಲ್ಫ್-ಮೇಡ್‌ ವುಮೆನ್‌ 2019’ ಎಂಬ ಹೆಸರಿನ ಈ ಪಟ್ಟಿಯಲ್ಲಿ 80 ಉದ್ಯಮಿಗಳಿದ್ದು, ಇವರೆಲ್ಲರಿಗೂ ಅವರು ಸ್ಥಾಪಿಸಿರುವ ಸಂಸ್ಥೆಗಳ ಒಟ್ಟಾರೆ ಮಾರುಕಟ್ಟೆ ಮೌಲ್ಯದ ಆಧಾರದಲ್ಲಿ ರ್‍ಯಾಂಕಿಂಗ್‌ ನೀಡಲಾಗಿದೆ.

ಕಂಪ್ಯೂಟರ್‌ ನೆಟ್ವರ್ಕಿಂಗ್‌ ಕ್ಷೇತ್ರದ ಮಾರುಕಟ್ಟೆಯಲ್ಲಿ 9,700 ಕೋಟಿ ರೂ. ಮೌಲ್ಯ ಹೊಂದಿರುವ ‘ಅರಿಸ್ಟಾ ನೆಟ್ವರ್ಕ್ಸ್’ನ ಅಧ್ಯಕ್ಷೆ ಹಾಗೂ ಆಡಳಿತಾಧಿಕಾರಿ ಜಯಶ್ರೀ ಉಲ್ಲಾಳ ಅವರಿಗೆ 18ನೇ ರ್‍ಯಾಂಕ್‌ ನೀಡಲಾಗಿದೆ. ಐಟಿ ಕನ್ಸಲ್ಟಿಂಗ್‌ ಆ್ಯಂಡ್‌ ಔಟ್ ಸೋರ್ಸಿಂಗ್‌ ಕಂಪನಿಯಾದ ‘ಸಿಂಟೆಲ್’ (6,900 ಕೋಟಿ ರೂ. ಮೌಲ್ಯ) ಸಂಸ್ಥಾಪಕಿ ನೀರಜಾ ಸೇಥಿಗೆ 23ನೇ ರ್‍ಯಾಂಕ್‌, ಸ್ಟ್ರೀಮಿಂಗ್‌ ಡೇಟಾ ತಂತ್ರಜ್ಞಾನ ಕ್ಷೇತ್ರದ ಕಂಪನಿ ‘ಕನ್‌ಫ‌್ಲೂಯೆಂಟ್’ನ (2,500 ಕೋಟಿ ರೂ. ಮೌಲ್ಯ) ಸಂಸ್ಥಾಪಕಿ ನೇಹಾ ನಾರ್ಖೇಡೆ ಅವರಿಗೆ 60ನೇ ರ್‍ಯಾಂಕ್‌ ನೀಡಲಾಗಿದೆ.