ಅಗಲ ಕಿರಿದಾದ ಕೋಣಿ -ಕೋಟೇಶ್ವರ ಸಂಪರ್ಕ ರಸ್ತೆ

Team Udayavani, Jun 16, 2019, 6:10 AM IST

ಬಸ್ರೂರು: ಕೋಣಿ ಶಾಲೆಯ ಎದುರಿನಿಂದ ಮತ್ತು ಕೋಣಿಯ ಎಚ್.ಎಂ.ಟಿ.ರಸ್ತೆಯ ಮೂಲಕ ಕೋಟೇಶ್ವರದ ಹಾಲಾಡಿ ರಸ್ತೆಯನ್ನು ಸಂಪರ್ಕಿಸುವ ಅಗಲ ಕಿರಿದಾದ ರಸ್ತೆಯೊಂದು ಸಂಚಾರಕ್ಕೆ ತೀವ್ರ ಸಮಸ್ಯೆ ಉಂಟುಮಾಡುತ್ತಿದೆ.

ಈ ರಸ್ತೆ ಸುಮಾರು ಮೂರು ಕಿ.ಮೀ.ಉದ್ದವಿದ್ದು, ಇಲ್ಲಿಂದ ಯಾವುದೇ ಘನ ವಾಹನಗಳು ಸಂಚರಿಸುವುದಿಲ್ಲ. ಲಘು ವಾಹನಗಳೇ ಸಂಚರಿಸಿದರೂ ಎದುರಿನಿಂದ ಮತ್ತೂಂದು ವಾಹನ ಬಂದರೆ ಜಾಮ್‌ ಆಗುತ್ತದೆ.

ಇಕ್ಕಟ್ಟಾದ ಈ ರಸ್ತೆಯ ಆರಂಭದ ಜಾಗ ಕೋಣಿ ಗ್ರಾ.ಪಂ.ಗೆ ಸೇರುತ್ತದೆ ಮತ್ತೂಂದು ಭಾಗ ಕೋಟೇಶ್ವರ ಗ್ರಾ.ಪಂ.ಗೆ ಒಳಪಡುತ್ತದೆ. ಆದರೆ ಎರಡೂ ಆಡಳಿತಗಳು ಇದನ್ನು ಅಗಲಗೊಳಿಸುವ ಪ್ರಯತ್ನಕ್ಕೆ ಮುಂದಾಗಿಲ್ಲ.

ಕೋಣಿಯ ಅಗ್ನಿ ಶಾಮಕ ಠಾಣೆಯ ರಸ್ತೆಯೂ ಆಗಲ ಕಿರಿದಾಗಿದ್ದು ಅಗ್ನಿ ಶಾಮಕ ವಾಹನ ಸಂಚಾರಕ್ಕೆ ಕಷ್ಟವಾಗಿದೆ. ಈ ರಸ್ತೆಯಲ್ಲೂ ವಾಹನಗಳ ಸಂಖ್ಯೆ ಹೆಚ್ಚಾಗಿರುವುದರಿಂದ ಈ ಬಗ್ಗೆ ಶೀಘ್ರ ಪರಿಹಾರ ಕ್ರಮಗಳ ಬಗ್ಗೆ ನಿರ್ಧಾರ ತೆಗೆದುಕೊಳ್ಳುವಂತೆ ಸ್ಥಳೀಯರು ಆಗ್ರಹಿಸಿದ್ದಾರೆ.