ಚೇಸಿಂಗ್‌ ಅನುಭದ ಕೊರತೆ ಕಾಡಿತು: ತಮಿಮ್‌ ಇಕ್ಬಾಲ್‌

Team Udayavani, Jun 22, 2019, 5:55 AM IST

ನಾಟಿಂಗ್‌ಹ್ಯಾಮ್‌: ದೊಡ್ಡ ಮೊತ್ತವನ್ನು ಯಶಸ್ವಿಯಾಗಿ ಬೆನ್ನಟ್ಟುವಲ್ಲಿ ತಮ್ಮ ತಂಡಕ್ಕೆ ಅನುಭವದ ಕೊರತೆ ಕಾಡುತ್ತಿದೆ ಎಂಬುದಾಗಿ ಬಾಂಗ್ಲಾದೇಶ ತಂಡದ ಆರಂಭಕಾರ ತಮಿಮ್‌ ಇಕ್ಬಾಲ್‌ ಅಭಿಪ್ರಾಯಪಟ್ಟಿದ್ದಾರೆ.

ಗುರುವಾರನ ವಿಶ್ವ ಚಾಂಪಿಯನ್‌ ಆಸ್ಟ್ರೇಲಿಯದ 381ರನ್ನುಗಳ ಬೃಹತ್‌ ಮೊತ್ತಕ್ಕೆ ದಿಟ್ಟ ಜವಾಬು ನೀಡಿದ ಬಳಿಕ ಬಾಂಗ್ಲಾ ಕೇವಲ 48 ರನ್ನುಗಳ ಸೋಲನುಭವಿಸಿತ್ತು.
“ನಾನು ಸ್ಕೋರ್‌ಬೋರ್ಡ್‌ ಗಮನಿಸುತ್ತಲೇ ಆಡುತ್ತಿದ್ದೆ. ಮೊದಲ 30 ಓವರ್‌ಗಳಲ್ಲಿ 180-200 ರನ್‌ ಗಳಿಸಿದ್ದೇ ಆದರೆ ಕೊನೆಯ 20 ಓವರ್‌ಗಳಲ್ಲಿ ಮೇಲುಗೈ ಸಾಧಿಸಬಹುದಿತ್ತು. ನಮ್ಮ ಆಟ ಬಿರುಸಿನಿಂದಲೇ ಕೂಡಿತ್ತು. ಹೀಗಾಗಿ 20 ಓವರ್‌ಗಳಲ್ಲಿ ಟಿ20 ಶೈಲಿಯಲ್ಲಿ ಬ್ಯಾಟ್‌ ಬೀಸಿದರೆ 160-170 ರನ್‌ ಪೇರಿಸುವುದು ಭಾರೀ ಸವಾಲಾಗುತ್ತಿರಲಿಲ್ಲ. ಇದಕ್ಕೆ ನಾವು ಪ್ರಯತ್ನಿಸಿದೆವಾದರೂ ಯಶಸ್ವಿ ಆಗಲಿಲ್ಲ’ ಎಂದು ತಮಿಮ್‌ ಹೇಳಿದರು.

ಬಾಂಗ್ಲಾದೇಶವಿನ್ನು 3 ಏಶ್ಯನ್‌ ರಾಷ್ಟ್ರಗಳಾದ ಅಫ್ಘಾನಿಸ್ಥಾನ, ಭಾರತ ಮತ್ತು ಪಾಕಿಸ್ಥಾನ ವಿರುದ್ಧ ಆಡಬೇಕಿದೆ. ಹೀಗಾಗಿ ಬಾಂಗ್ಲಾ ಪಾಲಿಗೆ ಈ ಕೂಟವಿನ್ನು ವಿಶ್ವಕಪ್‌ ಅಲ್ಲ, “ಏಶ್ಯ ಕಪ್‌’!