ಶರವು ದೇವಸ್ಥಾನ: ಜನರ ಗಮನ ಸೆಳೆದ ಹಲಸು ಹಬ್ಬ

Team Udayavani, Jun 23, 2019, 5:00 AM IST

ಮಹಾನಗರ: ನಗರದ ಶರವು ಶ್ರೀ ಮಹಾಗಣಪತಿ ದೇವಸ್ಥಾನ ಸಮೀಪದ ಬಾಳಂಭಟ್ ಸಭಾಂಗಣದಲ್ಲಿ ಶನಿವಾರ ಸಂಜೆ ಜನವೋ ಜನ. ನಗರದ ಸಾವಯವ ಕೃಷಿಕ ಗ್ರಾಹಕ ಬಳಗ ಏರ್ಪಡಿಸಿದ್ದ ‘ಹಲಸು ಹಬ್ಬ’ವನ್ನು ವೀಕ್ಷಿಸಲು ಈ ಜನರು ಅಲ್ಲಿ ಸೇರಿದ್ದರು.

ಕ್ಯಾಂಪ್ಕೊ ಸಂಸ್ಥೆಯ ಅಧ್ಯಕ್ಷ ಎಸ್‌.ಆರ್‌. ಸತೀಶ್ಚಂದ್ರ ಅವರು ‘ಹಲಸು ಹಬ್ಬ’ವನ್ನು ಉದ್ಘಾಟಿಸಿದರು. ಸಾವಯವ ಕೃಷಿಕ ಗ್ರಾಹಕ ಬಳಗದ ಅಧ್ಯಕ್ಷ ಅಡ್ಡೂರು ಕೃಷ್ಣ ರಾವ್‌, ಕಾರ್ಯದರ್ಶಿ ಡಾ| ಫಝಲ್, ಉಪಾಧ್ಯಕ್ಷ ರಾಜೇಂದ್ರ ಬಲ್ಲಾಳ್‌ ಉಪಸ್ಥಿತರಿದ್ದರು.

ವಿವಿಧ ಬಗೆಯ ಹಲಸುಗಳ ಪ್ರದರ್ಶನ ಮತ್ತು ಮಾರಾಟ, ಹಲಸಿನ ಬೇರೆ ಬೇರೆ ಖಾದ್ಯಗಳ ತಯಾರಿ ಮತ್ತು ಮಾರಾಟ, ವಿವಿಧ ತಳಿಗಳ ಹಲಸು ಗಿಡಗಳ ಮತ್ತು ಇತರ ಫಲಗಳ ಸಸಿಗಳ ಮಾರಾಟ, ಹಲಸಿನ ಮೌಲ್ಯ ವರ್ಧಿತ ಖಾದ್ಯ ತಯಾರಿ ಬಗ್ಗೆ ತರಬೇತಿ ‘ಹಲಸು ಹಬ್ಬ’ದ ವೈಶಿಷ್ಟ್ಯ.

ಮೌಲ್ಯವರ್ಧಿತ ಖಾದ್ಯ, ಉತ್ಪನ್ನ
ಹಲಸಿನ ಕೇಕ್‌, ಹಲಸು ಬೀಜದ ಬಿಸ್ಕಿಟ್, ವಡ ಮತ್ತು ಇನ್‌ಸ್ಟೆಂಟ್ ರಸಂ ಪೌಡರ್‌, ಹಲಸಿನ ಗಟ್ಟಿ, ಜಾಮ್‌, ಹಲ್ವಾ, ಬನ್ಸ್‌, ಪಾಯಸ, ಅಕ್ಕಿ ಅಪ್ಪ, ಹೋಳಿಗೆ, ಉಪ್ಪಿನಕಾಯಿ, ಗುಲಾಬ್‌ ಜಾಮ್‌, ಹಪ್ಪಳ, ಸಂಡಿಗೆ ಇತ್ಯಾದಿಯಾಗಿ ಹಲವಾರು ಮೌಲ್ಯ ವರ್ಧಿತ ಖಾದ್ಯಗಳನ್ನು ತಯಾರಿಸಿ ಪ್ರದರ್ಶಿಸಲಾಗಿದೆ. ಅವುಗಳ ಮಾರಾಟ ಕೂಡ ಮಾಡಲಾಗುತ್ತಿದೆ.

ಖಾದ್ಯ ತಯಾರಿ ತರಬೇತಿ
ಹಲಸಿನ ವಿವಿಧ ಮೌಲ್ಯವರ್ಧಿತ ಖಾದ್ಯಗಳ ತಯಾರಿ ಬಗ್ಗೆ ದೀಪಶ್ರೀ ದೊಡ್ಡಮಾಣಿ ಅವರು ತರಬೇತಿ ನೀಡುತ್ತಿದ್ದಾರೆ. ಶನಿವಾರ ಸಂಜೆ 3.30ಕ್ಕೆ ಉದ್ಘಾಟನೆಗೊಂಡ ‘ಹಲಸು ಹಬ್ಬ’ ರವಿವಾರ ಸಂಜೆ 5 ಗಂಟೆ ತನಕವೂ ತೆರೆದಿರುತ್ತದೆ. ಸಾರ್ವಜನಿಕರಿಗೆ ಮುಕ್ತ ಪ್ರವೇಶವಿದ್ದು, ಹಲಸಿನ ಖಾದ್ಯ ತಯಾರಿ ತರಬೇತಿ ಪಡೆಯಲು ಇಚ್ಛಿಸುವರಿಗೆ ಮಾತ್ರ ನೋಂದಣಿ ಹಾಗೂ ಸಾಂಕೇತಿಕ ಶುಲ್ಕವನ್ನು ನಿಗದಿ ಪಡಿಸಲಾಗಿದೆ.

ಹಲಸು ಉತ್ಪನ್ನಗಳ ಜತೆಗೆ ರಾಜ್ಯದ ಹಲವು ಜಿಲ್ಲೆಗಳಿಂದ ಆಗಮಿಸಿದ ಸಾವಯವ ರೈತರು ತಮ್ಮ ಉತ್ಪನ್ನ‌ಗಳನ್ನು ಪ್ರದರ್ಶಿಸಿ ಮಾರಾಟ ಮಾಡುತ್ತಿದ್ದಾರೆ. ವಿವಿಧ ಹಲಸು ತಳಿಗಳ ಮತ್ತು ಇತರ ಹಣ್ಣುಗಳ ಗಿಡಗಳ ಪ್ರದರ್ಶನವೂ ಇದೆ.

ವಿವಿಧ ತಳಿಗಳ ಹಲಸುಗಳ ಪ್ರದರ್ಶನ ಮತ್ತು ಮಾರಾಟ ನಡೆಯುತ್ತಿದ್ದು, ದೊಡ್ಡ ಬಳ್ಳಾಪುರದ ತೂಬಗೆರೆಯ ಎಂ.ಜಿ. ರವಿ ಕುಮಾರ್‌ ಮತ್ತು ಅವರ ‘ಹಲಸು ಬೆಳೆಗಾರರ ಸಂಘ’ದ ಸದಸ್ಯರು ಪ್ರದರ್ಶಿಸಿರುವ ಕೇಸರಿ ಬಣ್ಣದ ಚಂದ್ರ ಹಲಸು, ರುದ್ರಾಕ್ಷಿ ಹಲಸು ಈ ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿದೆ.