ಸಂಚಾರಕ್ಕೆ ದುಸ್ತರವಾದ ಮದನಾಡು- ಪರಪ್ಪಾಡಿ ಸಂಪರ್ಕ ರಸ್ತೆ

Team Udayavani, Jun 27, 2019, 5:44 AM IST

ಪಳ್ಳಿ: ನಿಟ್ಟೆ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಮದನಾಡು ರಸ್ತೆಯು ಸುಮಾರು 1 ಕಿ.ಮೀ. ಡಾಮರು ಕಾಣದ್ದರಿಂದ ಇಲ್ಲಿ ಮಳೆಗಾಲದಲ್ಲಿ ಸಂಚರಿಸುವುದು ಕಷ್ಟಕರವಾಗಿದೆ.

ಮದನಾಡು ರಸ್ತೆಯು 3 ಕಿ.ಮೀ. ಉದ್ದವಿದ್ದು ಈ ಮಾರ್ಗವಾಗಿ ಬೋಳ, ಕೆಮ್ಮಣ್ಣು, ಬೇಲಾಡಿ ಹಾಗೂ ಪರಪ್ಪಾಡಿ, ಬಾರಾಡಿ ಮಾರ್ಗ‌ವಾಗಿ ಬೆಳುವಾಯಿಗೆ ಅತಿ ಹತ್ತಿರದ ಸಂಪರ್ಕ ರಸ್ತೆಯಾಗಿದೆ. ಆದರೆ 1 ಕಿ.ಮೀ. ರಸ್ತೆ ಡಾಮರು ಕಾಣದ್ದರಿಂದ ಮತ್ತು ಚರಂಡಿ ಇಲ್ಲದೆ ರಸ್ತೆ ಕೆಸರುಮಯವಾಗಿದೆ.

ಬಾಕಿ ಉಳಿದ ಕಾಮಗಾರಿ

2004 ನೇ ಸಾಲಿನಲ್ಲಿ 2 ಕಿ.ಮೀ ರಸ್ತೆ ಡಾಮರೀಕರಣಗೊಂಡಿದ್ದು, ಉಳಿದ 1 ಕಿ.ಮೀ ರಸ್ತೆ ಕಚ್ಚಾ ರಸ್ತೆಯಾಗಿಯೇ ಉಳಿದಿದೆ. ಕಳೆದ ಬಾರಿ 2 ಕಿ.ಮೀ ರಸ್ತೆಗೆ ತೇಪೆ ಕಾರ್ಯ ನಡೆಸಲಾಗಿದೆ.

ಮಳೆಗಾಲದಲ್ಲಿ ಇಲ್ಲಿ ರಸ್ತೆಯಲ್ಲೇ ನೀರು ಹರಿಯುವುದರಿಂದ ರಸ್ತೆ ಹೊಂಡ-ಗುಂಡಿಯಿಂದ ತುಂಬಿದ್ದು, ವಾಹನ ಸವಾರರಿಗೆ ಸಂಕಷ್ಟ ತಂದಿದೆ. ಮದೆನಾಡು ವ್ಯಾಪ್ತಿಯಲ್ಲಿ ಸುಮಾರು 100ಕ್ಕೂ ಅಧಿಕ ಮನೆಗಳಿದ್ದು 5 ಸೆಂಟ್ಸ್‌ ಕಾಲನಿಯನ್ನು ಹೊಂದಿದೆ. ಈ ಮಾರ್ಗವನ್ನು ವಿದ್ಯಾರ್ಥಿಗಳು, ಕಾರ್ಮಿಕರು, ಪರಪ್ಪಾಡಿ, ಬಾರಾಡಿ ಆಸುಪಾಸಿನ ನಿವಾಸಿಗಳು ಅವಲಂಬಿಸಿದ್ದಾರೆ.

ಕಿರು ಸೇತುವೆ ಅಗತ್ಯ

ಈ ರಸ್ತೆಯಲ್ಲಿ ಅತೀ ಹಳೆಯದಾದ ಸ್ಥಳೀಯರೇ ಅಳವಡಿಸಿದ್ದ ಮೋರಿಯಿದೆ. ಇದೀಗ ಹಳತಾಗಿದೆ. ಧಾರಾಕಾರವಾಗಿ ಮಳೆ ಸುರಿದರೆ ಮೋರಿ ಮುಳುಗಡೆ ಹೊಂದಿ ಸಂಚಾರ ಸ್ಥಗಿತಗೊಳ್ಳುತ್ತದೆ. ಮೋರಿಯ ಎರಡು ಇಕ್ಕೆಲಗಳಲ್ಲಿ ತಡೆಗೋಡೆ ಇಲ್ಲದೆ ಇರುವುದರಿಂದ ಅಪಾಯಕ್ಕೆ ಆಹ್ವಾನ ನೀಡುತ್ತಿದೆ.