ಸಾಲಿಗ್ರಾಮದಲ್ಲಿ ಗುರುವಾರ ಸಂಜೆ ಅಪಘಾತ: ಸಹೋದರರಿಬ್ಬರ ಸಾವು

Team Udayavani, Jun 28, 2019, 9:23 AM IST

ಕೋಟ: ಕಾರು ಢಿಕ್ಕಿಯಾಗಿ ರಸ್ತೆ ಬದಿಯಲ್ಲಿ ನಡೆದುಕೊಂಡು ಹೋಗುತ್ತಿದ್ದ ಸಹೋದರರಿಬ್ಬರು ಮೃತಪಟ್ಟ ದಾರುಣ ಘಟನೆ ಗುರುವಾರ ಸಾಲಿಗ್ರಾಮ ಹಾಡಿಮನೆ ಹೊಟೇಲ್‌ ಸಮೀಪ ಸಂಭವಿಸಿದೆ.

ಇಲ್ಲಿನ ಬಡಾಹೋಳಿ ನಿವಾಸಿ ಚಂದ್ರ (52) ಹಾಗೂ ಇವರ ಸಹೋದರ ನಾರಾಯಣ (55) ಮೃತಪಟ್ಟವರು.

ಇವರು ಕಟ್ಟಡ ಕಾರ್ಮಿಕರಾಗಿದ್ದು, ಸಂಜೆ ಮನೆಯಿಂದ ಪೇಟೆಗೆ ತೆರಳಲೆಂದು ರಸ್ತೆಯ ಬದಿಯಲ್ಲಿ ನಿಂತಿದ್ದರು. ಆಗ ಕುಂದಾಪುರದಿಂದ ಉಡುಪಿ ಕಡೆಗೆ ಸಂಚರಿಸುತ್ತಿದ್ದ ಇಕೋ ಕಾರು ಚಾಲಕನ ನಿಯಂತ್ರಣ ತಪ್ಪಿ ಅತಿ ವೇಗದಿಂದ ಬಂದು ಢಿಕ್ಕಿಯಾಗಿದೆ. ಪರಿಣಾಮ ಇಬ್ಬರೂ ದೂರಕ್ಕೆ ಎಸೆಯಲ್ಪಟ್ಟಿದ್ದು, ಕಾರು ಪಕ್ಕದ ಕಣಿವೆಗೆ ಪಲ್ಟಿಯಾಗಿದೆ. ಚಂದ್ರ ಸ್ಥಳದಲ್ಲೇ ಮೃತಪಟ್ಟಿದ್ದು, ನಾರಾಯಣ ಮಣಿಪಾಲ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾರೆ. ಚಂದ್ರ ಅವರು ಪತ್ನಿ ಹಾಗೂ ಇಬ್ಬರು ಪುತ್ರಿಯರನ್ನು ಅಗಲಿದ್ದು, ನಾರಾಯಣ ಪತ್ನಿಯನ್ನು ಅಗಲಿದ್ದಾರೆ.

ಕಾರು ಚಾಲಕನ ವಿರುದ್ಧ ಆಕ್ರೋಶ
ನೇರ ರಸ್ತೆಯಲ್ಲಿ ಯಾವುದೇ ಅಡೆತಡೆಗಳಿಲ್ಲದೆ ಬರುತ್ತಿದ್ದ ಕಾರು ಏಕಾಏಕಿ ವೇಗವಾಗಿ ನುಗ್ಗಿ ಮುಖ್ಯ ರಸ್ತೆಯಿಂದ ಸುಮಾರು 30 ಮೀ.ನಷ್ಟು ದೂರ ನಿಂತಿದ್ದವರಿಗೆ ಅಪ್ಪಳಿಸಿದೆ. ಅಪಘಾತದ ಅನಂತರ ಸ್ಥಳೀಯರು ಕಾರು ಚಾಲಕನ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.

ಸಿಸಿಟಿವಿಯಲ್ಲಿ ಸೆರೆಯಾದ ದೃಶ್ಯ
ಅಪಘಾತದ ಸಂಪೂರ್ಣ ಚಿತ್ರಣ ಪಕ್ಕದಲ್ಲಿದ್ದ ಹೊಟೇಲ್‌ನ ಸಿಸಿ ಟಿವಿಯಲ್ಲಿ ಸೆರೆಯಾಗಿದ್ದು, ಅದು ಈಗ ವೈರಲ್‌ ಆಗಿದೆ. ಸ್ಥಳಕ್ಕೆ ಕೋಟ ಪೊಲೀಸರು ಆಗಮಿಸಿ ತನಿಖೆ ನಡೆಸಿದ್ದಾರೆ ಹಾಗೂ ಟೋಲ್‌ ಸಿಬಂದಿ, ಸ್ಥಳೀಯರು ಆಸ್ಪತ್ರೆಗೆ ದಾಖಲಿಸುವಲ್ಲಿ ಶ್ರಮಿಸಿದರು.