ನೈಜೀರಿಯಾ ಕಡಲ್ಗಳ್ಳರಿಂದ ಐವರು ಭಾರತೀಯ ನಾವಿಕರ ಕಿಡ್ನಾಪ್, ಕೊನೆಗೂ ಬಿಡುಗಡೆ

Team Udayavani, Jun 29, 2019, 6:42 PM IST

Representative Image

ನವದೆಹಲಿ: ಐವರು ಭಾರತೀಯ ನಾವಿಕರನ್ನು ನೈಜೀರಿಯಾ ಕಡಲ್ಗಳ್ಳರು ಹಡಗಿನಿಂದ ಅಪಹರಿಸಿದ್ದು, ಬಳಿಕ ಬಿಡುಗಡೆಗೊಳಿಸಿದ್ದಾರೆ. ಅವರನ್ನು ಸುರಕ್ಷಿತವಾಗಿ ತಮ್ಮ ಕಸ್ಟಡಿಯಲ್ಲಿ ಇರಿಸಿಕೊಳ್ಳಲಾಗಿದೆ ಎಂದು ಬಂದರು ಮತ್ತು ಶಿಪ್ಪಿಂಗ್ ಖಾತೆ ರಾಜ್ಯ ಸಚಿವ ಮನ್ ಸುಖ್ ಮಾಂಡವಿಯಾ ಶನಿವಾರ ತಿಳಿಸಿದ್ದಾರೆ.

ನೈಜೀರಿಯಾ ಕಡಲ್ಗಳ್ಳರಿಂದ ಅಪಹರಿಸಲ್ಪಟ್ಟಿದ್ದ ಐವರು ಭಾರತೀಯ ನಾವಿಕರನ್ನು ಸುರಕ್ಷಿತವಾಗಿ ಬಿಡುಗಡೆಗೊಳಿಸುವಲ್ಲಿ ಶಿಪ್ಪಿಂಗ್ ಸಚಿವಾಲಯ, ಡೈರೆಕ್ಟೊರೇಟ್ ಆಫ್ ಜನರಲ್ ಆಫ್ ಶಿಪ್ಪಿಂಗ್ ಭಾರತ, ನೈಜಿರಿಯಾ ರಾಯಭಾರ ಕಚೇರಿಗಳ ಪ್ರಯತ್ನ ಯಶಸ್ವಿಯಾಗಿರುವುದಾಗಿ ಮಾಂಡವಿಯಾ ವಿವರಿಸಿದ್ದಾರೆ.

ಸುದೀಪ್ ಚೌಧರಿ, ಅಂಕಿತ್ ಹೂಡಾ, ಚಿರಾಗ್ ಯಾದವ್, ಅವಿನಾಶ್ ರೆಡ್ಡಿ ಮತ್ತು ಮೂಗು ರವಿ ಸೇರಿದಂತೆ ಐವರು ನಾವಿಕರನ್ನು ಹಡಗಿನಿಂದ ಅಪಹರಿಸಿದ್ದರು. ತದನಂತರ ಅವರನ್ನು ಕಡಲ್ಗಳ್ಳರು ನೈಜೀರಿಯಾದ ಬೋನ್ನೈ ದ್ವೀಪಕ್ಕೆ ಕರೆದೊಯ್ದಿದ್ದರು ಎಂದು ವರದಿ ವಿವರಿಸಿದೆ.

ವಿವಿಧ ಏಜೆನ್ಸಿಗಳ ಸಹಕಾರದೊಂದಿಗೆ ಐವರು ಭಾರತೀಯ ನಾವಿಕರನ್ನು ಸುರಕ್ಷಿತವಾಗಿ ಬಿಡುಗಡೆಗೊಳಿಸಲು ಸಾಧ್ಯವಾಯಿತು ಎಂದು ಹೇಳಿದರು.