ಹದಗೆಟ್ಟ ಕರಿಯಕಲ್ಲು -ಸೂರಾಲು ಸಂಪರ್ಕ ರಸ್ತೆ

ಕಾರ್ಕಳ: ಮಿಯ್ಯಾರು ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಸೂರಾಲು ರಸ್ತೆ ತೀರಾ ಹದಗೆಟ್ಟು ಸಂಚಾರಕ್ಕೆ ದುಸ್ತರವಾಗಿದೆ. ಕರಿಯಕಲ್ಲುವಿನಿಂದ ಸೂರಾಲು ಸಂಪರ್ಕಿಸುವ ಸುಮಾರು 3 ಕಿ.ಮೀ. ಜಿ.ಪಂ. ರಸ್ತೆ ಹೊಂಡಗುಂಡಿಗಳಿಂದ ತುಂಬಿದೆ.

ಸೂರಾಲು ಗುಂಡಾಜೆ ಶಾಲೆ, ಅಂಗನವಾಡಿ ಕೇಂದ್ರ ಸಂಪರ್ಕಿಸಲು ಇದೇ ಮಾರ್ಗವನ್ನು ಅಲವಂಬಿಸಬೇಕಿದೆ. ಮಿಯ್ನಾರು ಹಾಗೂ ಸಾಣೂರು ಗ್ರಾಮದ ಸುಮಾರು 250 ಮನೆಗಳು ಈ ಭಾಗದಲ್ಲಿದ್ದು, ರಸ್ತೆ ಹದಗೆಟ್ಟ ಕಾರಣ ಸಂಚಾರಕ್ಕೆ ತ್ರಾಸಪಡುವಂತಾಗಿದೆ. ಗೇರುಬೀಜ ಕಾರ್ಖಾನೆ, ವಾಟರ್‌ ಪಾರ್ಕ್‌ ಇದೇ ಪರಿಸರದಲ್ಲಿರುವ ಕಾರಣ ನಿತ್ಯ ನೂರಾರು ಮಂದಿ ಕಾರ್ಮಿಕರು, ಪ್ರವಾಸಿಗರು ಈ ರಸ್ತೆಯ ಮೂಲಕವೇ ಸಾಗುತ್ತಾರೆ.

ಮನವಿಗೆ ಸ್ಪಂದನೆಯಿಲ್ಲ
ರಸ್ತೆ ಅಭಿವೃದ್ಧಿಪಡಿಸುವಂತೆ ಸ್ಥಳೀಯರು ಗ್ರಾಮ ಪಂಚಾಯತ್‌, ಶಾಸಕರು, ಸಚಿವರಿಗೆ ಮನವಿ ನೀಡಿದ್ದಾರೆ. ಆದರೂ ರಸ್ತೆ ಅಭಿವೃದ್ಧಿಗಾಗಿ ಅನುದಾನ ಬಿಡುಗಡೆಗೊಂಡಿಲ್ಲ ಎಂದು ಸ್ಥಳೀಯರು ಬೇಸರ ವ್ಯಕ್ತಪಡಿಸುತ್ತಾರೆ.

ರಸ್ತೆ ಮೇಲ್ದರ್ಜೆಗೆ ?
ಕರಿಯಕಲ್ಲು -ಸೂರಾಲು ರಸ್ತೆಯನ್ನು ಲೋಕೋಪಯೋಗಿ ರಸ್ತೆಯನ್ನಾಗಿ ಮೇಲ್ದೆರ್ಜೆಗೇರಿಸುವ ನಿಟ್ಟಿನಲ್ಲಿ ಒಂದೂವರೆ ವರ್ಷಗಳ ಹಿಂದೆ ಪಿಡಬ್ಲ್ಯುಡಿ ಕೇಂದ್ರ ಕಚೇರಿಗೆ ಪ್ರಸ್ತಾವನೆ ಕಳಿಸಲಾಗಿದೆ ಎಂದು ಲೋಕೋಪಯೋಗಿ ಇಲಾಖೆ ಸಹಾಯಕ ಇಂಜಿನಿಯರ್‌ ಸೋಮಶೇಖರ್‌ ಹೇಳಿದ್ದಾರೆ.

ಸೂರಾಲುವಿನಿಂದ ಇದೇ ರಸ್ತೆಯಲ್ಲಿ ಮುಂದೆ ಸಾಗಿದಲ್ಲಿ ಇರ್ವತ್ತೂರು ಸಂಪರ್ಕಿಸುತ್ತದೆ. ಕೇವಲ 5 ಕಿ.ಮೀ. ಸಾಗಿದರೆ ಇರ್ವತ್ತೂರು ತಲುಪುವುದಾದರೂ ಈಗಿರುವ ರಸ್ತೆ ಸಂಚಾರಕ್ಕೆ ಯೋಗ್ಯವಾಗಿಲ್ಲ. ಈ ರಸ್ತೆಯನ್ನು ಅಭಿವೃದ್ಧಿಗೊಳಿಸಬೇಕು ಎನ್ನುವ ಬೇಡಿಕೆಯೂ ಸಾರ್ವಜನಿಕರದ್ದು.