ಮುಂಬಯಿಯಲ್ಲಿ ಮಳೆ: ವಿಮಾನ ಸೇವೆ ವ್ಯತ್ಯಯ

Team Udayavani, Jul 4, 2019, 5:50 AM IST

ಮಂಗಳೂರು: ಮುಂಬಯಿಯಲ್ಲಿ ಭಾರೀ ಮಳೆಯ ಕಾರಣದಿಂದ ಮಂಗಳೂರಿಗೆ ಆಗಮನ-ನಿರ್ಗಮನದ ವಿಮಾನ ಸೇವೆಯಲ್ಲಿಯೂ ವ್ಯತ್ಯಯವಾಗಿದೆ.

ಮುಂಬಯಿಯಿಂದ ಆಗಮಿಸುವ ಇಂಡಿಗೋ ವಿಮಾನ ಬುಧವಾರ ರದ್ದುಗೊಂಡಿದ್ದು, ಮಧ್ಯಾಹ್ನ ಬರಬೇಕಿದ್ದ ಏರ್‌ಇಂಡಿಯಾ ವಿಮಾನ ಸಂಜೆ ವೇಳೆಗೆ ಮಂಗಳೂರಿಗೆ ಆಗಮಿಸಿದೆ. ಸಂಜೆಯ ಇಂಡಿಗೋ ವಿಮಾನ ಕೂಡ ತಡವಾಗಿ ಆಗಮಿಸಿದೆ.

ವಿಮಾನ ರದ್ದು: ಪೇಜಾವರ ಶ್ರೀ ಬೆಂಗಳೂರಿಗೆ
ಉಡುಪಿ: ಮುಂಬಯಿಯ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಳ್ಳುವುದಕ್ಕಾಗಿ ತೆರಳಿದ್ದ ಪೇಜಾವರ ಮಠಾಧೀಶ ವಿಶ್ವೇಶತೀರ್ಥ ಶ್ರೀಪಾದರು ಮಂಗಳೂರು ವಿಮಾನ ರದ್ದಾದ ಕಾರಣ ಮುಂಬಯಿಯಿಂದ ಬೆಂಗಳೂರಿಗೆ ತೆರಳಿದ್ದು ಬುಧವಾರ ರಾತ್ರಿ ರೈಲಿನಲ್ಲಿ ಉಡುಪಿ ಕಡೆಗೆ ಪ್ರಯಾಣ ಬೆಳೆಸಲಿದ್ದಾರೆ.

ಮಂಗಳವಾರ ಸಾಂತಾಕ್ರೂಜ್‌ಗೆಂದು ರೈಲಿನಲ್ಲಿ ತೆರಳಿದ್ದಾಗ ಭಾರೀ ಮಳೆಯ ಪರಿಣಾಮ ಬೊರಿವಿಲಿಯಲ್ಲಿಯೇ ರೈಲು ನಿಲುಗಡೆಯಾಯಿತು. ಅನಂತರ ಟ್ಯಾಕ್ಸಿಯಲ್ಲಿ ಡೊಂಬಿವಿಲಿ ವರೆಗೆ ತೆರಳಲು ಮುಂದಾದಾಗ ಕೆಲವು ಟ್ಯಾಕ್ಸಿ ಯವರು ನಿರಾಕರಿಸಿದರು. ಗುಲ್ಬರ್ಗ ಮೂಲದ ಟ್ಯಾಕ್ಸಿ ಚಾಲಕ ಶರ್ಪುದ್ದೀನ್‌ ಮಲೀಕ್‌ ಶ್ರೀಗಳನ್ನು ಡೊಂಬಿವಿಲಿ ವರೆಗೆ ಕರೆದೊಯ್ದರು. ಅನಂತರ ಮಠದ ವಾಹನದ ಮೂಲಕ ಶ್ರೀಗಳು ಮಠಕ್ಕೆ ತೆರಳಿದರು. ಬುಧವಾರ ಬೆಳಗ್ಗೆ 9.15ಕ್ಕೆ ಮಂಗಳೂರಿಗೆ ನಿಗದಿಯಾಗಿದ್ದ ವಿಮಾನ ರದ್ದಾಯಿತು. 1.15ಕ್ಕೆ ಬೆಂಗಳೂರು ಕಡೆಗೆ ಹೋಗುವ ವಿಮಾನ ನಿಗದಿಯಾಯಿತು. ಅದು ಕೂಡ ವಿಳಂಬವಾಗಿ 3 ಗಂಟೆಗೆ ಹಾರಾಟ ನಡೆಸಿತು. ಶ್ರೀಗಳು ಸಂಜೆ ಬೆಂಗಳೂರು ತಲುಪಿದರು.

ಕೆಲವು ನಗರಗಳಲ್ಲಿ ಕೆಲವು ಪ್ರದೇಶಗಳಿಗೆ ಕೆಲವು ಮಂದಿ ಟ್ಯಾಕ್ಸಿ ಚಾಲಕರು ಬರುವುದಿಲ್ಲ. ಹಿಂದೆಯೂ ಅಂತಹ ಅನುಭವವಾಗಿದೆ. ಬೊರಿವಿಲಿ ಯಲ್ಲಿ ಮಳೆಯೂ ಇತ್ತು. ಕೆಲವು ಟ್ಯಾಕ್ಸಿಗಳನ್ನು ವಿಚಾರಿಸುತ್ತಿದ್ದಾಗ ಒಂದು ಟ್ಯಾಕ್ಸಿಯವರು (ಶಫ‌ುರ್ದ್ದೀನ್‌) ಬರಲು ಒಪ್ಪಿದರು ಎಂದು ಪೇಜಾವರ ಶ್ರೀಗಳ ಆಪ್ತಸಹಾಯಕರು ತಿಳಿಸಿದ್ದಾರೆ.