ನಿವೇಶನ ಮಂಜೂರಾತಿಗೆ ತಹಶೀಲ್ದಾರ್‌ಗೆ ಮನವಿ

Team Udayavani, Jul 12, 2019, 5:27 AM IST

ಹೆಬ್ರಿ: ತಾಲೂಕು ಮುದ್ರಾಡಿ ಗ್ರಾ.ಪಂ. ವ್ಯಾಪ್ತಿಯ 48 ಫಲಾನುಭವಿಗಳಿಗೆ 94ಸಿ ಯೋಜನೆಯಡಿ ಈಗಾಗಲೇ ತಾತ್ಕಾಲಿಕ ಹಕ್ಕುಪತ್ರ ಮಂಜೂರಾಗಿದ್ದು ಶೀಘ್ರ ಖಾಯಂ ಹಕ್ಕು ಪತ್ರ ನೀಡುವಂತೆ ಹೆಬ್ರಿ ಬ್ಲಾಕ್‌ ಕಾಂಗ್ರೆಸ್‌ ವತಿಯಿಂದ ಹೆಬ್ರಿ ತಹಶೀಲ್ದಾರ್‌ ಮಹೇಶ್ಚಂದ್ರ ಅವರಿಗೆ ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ಎಂ. ಮಂಜುನಾಥ ಪೂಜಾರಿ ಅವರು ಗ್ರಾಮಸ್ಥರೊಂದಿಗೆ ಜು. 11ರಂದು ಮನವಿ ಸಲ್ಲಿಸಿದರು.

ಫಲಾನುಭವಿಗಳು ಸರಕಾರದ ಖಜಾನೆಗೆ ಸಂಬಂಧಿಸಿದ ಎಲ್ಲ ಶುಲ್ಕಗಳನ್ನು ಪಾವತಿಸಿದ್ದರೂ ಇದುವರೆಗೂ ಕೇವಲ ತಾತ್ಕಾಲಿಕ ಹಕ್ಕುಪತ್ರ ಮಾತ್ರ ನೀಡಿದ್ದು, ಇದರಿಂದ ಅಧಿಕೃತವಾಗಿ ಹಕ್ಕು ಪತ್ರ ಸಿಗದೇ ಫಲಾನುಭವಿಗಳು ಸರಕಾರದ ಸೌಲಭ್ಯ ಪಡೆಯುವಲ್ಲಿ ತೊಂದರೆಯಾಗುತ್ತಿದೆ. ಈಗಾಗಲೇ ಅರಣ್ಯ ಇಲಾಖೆಯವರು ಪ್ರತಿ ಫಲಾನುಭವಿಗಳ ಜಮೀನಿಗೆ ತೆರಳಿ ಪರಿಶೀಲನೆ ಮಾಡಿ ಡೀಮ್ಡ್ ಅರಣ್ಯದಿಂದ ನಿವೇಶನಗಳು ಹೊರಗಿರುವ ಬಗ್ಗೆ ವರದಿಯನ್ನು ಸಲ್ಲಿಸಿದ್ದು, ಕಡತಗಳನ್ನು ಪುನಃ ಪರಿಶೀಲನೆ ಮಾಡಿ ಮುದ್ರಾಡಿ ಗ್ರಾ.ಪಂ. ವ್ಯಾಪ್ತಿಯ ಎಲ್ಲ 94ಸಿ ಫಲಾನುಭವಿಗಳಿಗೆ ಶೀಘ್ರವಾಗಿ ಹಕ್ಕು ಪತ್ರ ಒದಗಿಸುವಂತೆ ಮನವಿಯಲ್ಲಿ ವಿನಂತಿಸಲಾಗಿದೆ.

ಮುದ್ರಾಡಿ ಗ್ರಾ.ಪಂ. ಅಧ್ಯಕ್ಷೆ ಶಶಿಕಲಾ ಡಿ. ಪೂಜಾರಿ, ಸದಸ್ಯರಾದ ಸಂತೋಷ ಕುಮಾರ್‌ ಶೆಟ್ಟಿ, ಶುಭದರ್‌ ಶೆಟ್ಟಿ, ಬ್ಲಾಕ್‌ ಕಾಂಗ್ರೆಸ್‌ನ ಪದಾಧಿಕಾರಿಗಳು, ಫಲಾನುಭವಿಗಳು ಉಪಸ್ಥಿತರಿದ್ದರು.