ಬೇಸಗೆಯಲ್ಲಿ ನೀರಿನ ಕೊರತೆ; ಮಳೆಗಾಲದಲ್ಲಿ ತಾಂತ್ರಿಕ ಸಮಸ್ಯೆ!

Team Udayavani, Jul 12, 2019, 5:08 AM IST

ಮಹಾನಗರ: ಬೇಸಗೆ ವೇಳೆ ತುಂಬೆ ಡ್ಯಾಂನಲ್ಲಿ ನೀರಿನ ಕೊರತೆಯಿಂದ ಮಂಗಳೂರು ಜನರು ಸಮಸ್ಯೆ ಎದುರಿಸಿದರೆ, ಮಳೆಗಾಲದಲ್ಲಿ ವೆಂಟೆಡ್‌ ಡ್ಯಾಂ ತುಂಬಿದರೂ ತಾಂತ್ರಿಕ ಸಮಸ್ಯೆಗಳಿಂದ ನೀರಿಲ್ಲದೆ ನಾಲ್ಕು ದಿನಗಳಿಂದ ಪರದಾಡುವಂತಾಗಿದೆ.

ನಗರಕ್ಕೆ ನೀರು ಸರಬರಾಜು ಮಾಡುವ ತುಂಬೆ ಡ್ಯಾಂನಿಂದ ಸಂಪರ್ಕವಿರುವ ಪೈಪ್‌ಲೈನ್‌ ಅಡ್ಯಾರ್‌ ಭಾಗದಲ್ಲಿ ರವಿವಾರ ರಾತ್ರಿ ಸೋರಿಕೆಯಾಗಿ ನೀರು ಸರಬರಾಜು ಸ್ಥಗಿತಗೊಂಡಿತ್ತು. ಬಳಿಕ ರಿಪೇರಿ ಆರಂಭಿಸಿದರೂ ಗುರುವಾರದವರೆಗೆ ರಿಪೇರಿ ಪೂರ್ಣವಾಗದೆ, ನಗರದ ಬಹುತೇಕ ಭಾಗಗಳಿಗೆ ನೀರಿನ ಸಮಸ್ಯೆ ಎದುರಾಯಿತು. ಈಗ ಪೈಪ್‌ಲೈನ್‌ ಸರಿಪಡಿಸಲಾಗಿದ್ದು, ಗುರುವಾರ ಸಂಜೆಯ ಬಳಿಕ ನೀರು ಸರಬರಾಜು ಮರು ಆರಂಭವಾಗಿದೆ.

ಆಧುನಿಕ ವ್ಯವಸ್ಥೆಗಳು ಇರುವ ಈ ಕಾಲದಲ್ಲಿಯೂ ಮುಖ್ಯ ಕೊಳವೆಯ ಸೋರಿಕೆಯನ್ನು ಪತ್ತೆಹಚ್ಚಿ ಕ್ಷಿಪ್ರಗತಿಯಲ್ಲಿ ಕಾಮಗಾರಿ ನಡೆಸುವ ಯಾವುದೇ ಸೌಕರ್ಯ ಪಾಲಿಕೆಯಲ್ಲಿ ಇಲ್ಲದಿರುವ ಕಾರಣದಿಂದ ನೀರು ಸೋರಿಕೆ ತಡೆಯಲು ನಾಲ್ಕು ದಿನ ಕಾಯಬೇಕಾಯಿತು. ಜತೆಗೆ, ಪೈಪ್‌ಲೈನ್‌ನ ಮೇಲೆ ಕೆಲವರು ಹಾಕಿರುವ ಮಣ್ಣಿನಿಂದ ಹಲವು ಬಾರಿ ತೊಂದರೆ ಅನುಭವಿಸಿದರೂ ಪಾಲಿಕೆ ತೆಗೆಯುಲು ಇನ್ನೂ ಮುಂದಾಗದಿರುವುದು ಹಾಗೂ ಪದೇ ಪದೆ ತಾಂತ್ರಿಕ ಸಮಸ್ಯೆ ಎದುರಾದರೂ ಅದನ್ನು ಸಮರ್ಥವಾಗಿ ನಿರ್ವಹಿಸುವಲ್ಲಿ ಪಾಲಿಕೆ ವಿಫಲವಾಗಿರುವ ಕಾರಣ ಮಳೆಗಾಲದಲ್ಲಿಯೂ ಜನರು ನೀರಿನ ಸಮಸ್ಯೆ ಎದುರಿಸುವಂತಾಗಿದೆ.

ನೀರಿನ ಮುಖ್ಯ ಕೊಳವೆ ಈಗಲೂ ಅಸುರಕ್ಷಿತ !

ತುಂಬೆಯಿಂದ ತಲಾ 18 ಎಂಜಿಡಿ ಸಾಮರ್ಥ್ಯದ ಎರಡು ಬೃಹತ್‌ ಗಾತ್ರದ ಪೈಪ್‌ಲೈನ್‌ (ಮುಖ್ಯ ಕೊಳವೆ)ಗಳ ಮೂಲಕ ನಗರಕ್ಕೆ ನೀರು ಪೂರೈಕೆಯಾಗುತ್ತಿದೆ.

– ವೆಂಟೆಡ್‌ ಡ್ಯಾಂನಲ್ಲಿ ತಾಂತ್ರಿಕ ಸಮಸ್ಯೆ

– ನಗರದಲ್ಲಿ ನೀರು ಸಂಪರ್ಕ ವ್ಯತ್ಯಯ

– ಗುರುವಾರ ದುರಸ್ತಿ ಕಾರ್ಯ ಪೂರ್ಣ

ಹಲವು ದಿನಗಳಿಂದ ನೀರಿನ ಸಮಸ್ಯೆ ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಪಡೀಲ್, ಮಂಗಳಾದೇವಿ, ಮೇರಿಹಿಲ್, ಕಾವೂರು, ಪಚ್ಚನಾಡಿ, ಬೋಳಾರ, ಬಜಾಲ್, ಕಣ್ಣೂರು ಸಹಿತ ನಗರದ ಅರ್ಧದಷ್ಟು ಭಾಗಗಳಿಗೆ ನೀರು ಸರಬರಾಜು ವ್ಯತ್ಯಯವಾಗಿತ್ತು. ನಾಲ್ಕು ದಿನಗಳಿಂದ ನೀರಿಲ್ಲದ ಕಾರಣದಿಂದ ನಗರದ ಬಹುತೇಕ ವಸತಿ ಸಮುಚ್ಚಯ, ಪಿಜಿ ವಾಸಿಗಳು ಖಾಸಗಿ ಟ್ಯಾಂಕರ್‌ ನೀರನ್ನು ಆಶ್ರಯಿಸಿದ್ದರು.