ಮಹಾತ್ಮರ ಜಯಂತಿಗೆ ಜನರ ಕೊರತೆ

Team Udayavani, Jul 17, 2019, 11:23 AM IST

ಚಿಕ್ಕಮಗಳೂರು: ಡಿಸಿ ಕಚೇರಿಯಲ್ಲಿ ಜಿಲ್ಲಾಡಳಿತ ಹಮ್ಮಿಕೊಂಡಿದ್ದ ಶಿವಶರಣ ಹಡಪದ ಅಪ್ಪಣ್ಣ ಜಯಂತಿ ಕಾರ್ಯಕ್ರಮವನ್ನು ಜಿಲ್ಲಾಧಿಕಾರಿ ಡಾ.ಬಗಾದಿ ಗೌತಮ್‌ ಹಡಪದ ಅಪ್ಪಣ್ಣ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಮಾಡುವ ಮೂಲಕ ಉದ್ಘಾಟಿಸಿದರು.

ಚಿಕ್ಕಮಗಳೂರು: ಸರ್ಕಾರದ ವತಿಯಿಂದ ಮಹಾತ್ಮರ ಜಯಂತಿ ಆಚರಿಸುವುದು ಸಂತಸದ ವಿಚಾರ. ಆದರೆ, ಇಂತಹ ಕಾರ್ಯಕ್ರಮಗಳಿಗೆ ಸಾರ್ವಜನಿಕರು, ಜನಪ್ರತಿನಿಧಿಗಳು ಪಾಲ್ಗೊಳ್ಳದಿರುವುದು ವಿಷಾದಕರ ಸಂಗತಿ ಎಂದು ಸಾಹಿತಿ ಬೆಳವಾಡಿ ಮಂಜುನಾಥ್‌ ಬೇಸರ ವ್ಯಕ್ತಪಡಿಸಿದರು.

ನಗರದ ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ಮಂಗಳವಾರ ಜಿಲ್ಲಾಡಳಿತ ಆಯೋಜಿಸಿದ್ದ ಶಿವಶರಣ ಹಡಪದ ಅಪ್ಪಣ್ಣ ಜಯಂತಿ ಕಾರ್ಯಕ್ರಮದಲ್ಲಿ ಉಪನ್ಯಾಸ ನೀಡಿದರು.

ಮಹಾತ್ಮರ ಜಯಂತಿ ಆಚರಿಸುವುದು ಒಂದು ಕಡೆ ಸಂತೋಷ ಉಂಟು ಮಾಡಿದರೆ, ಮತ್ತೂಂದು ಕಡೆ ವಿಷಾದವುಂಟು ಮಾಡುತ್ತದೆ. ಜಯಂತಿ ಆಚರಣೆಯಿಂದ ಎಲ್ಲರನ್ನೂ ಒಳಗೊಂಡ ಭಾವೈಕ್ಯತಾ ವ್ಯವಸ್ಥೆ ರೂಪುಗೊಳ್ಳುತ್ತದೆ. ಇಂತಹ ಕಾರ್ಯಕ್ರಮಗಳಲ್ಲಿ ಜನರು, ಜನಪ್ರತಿನಿಧಿಗಳು ಭಾಗವಹಿಸದಿರುವುದು ಬೇಸರ ತರಿಸುತ್ತದೆ ಎಂದು ವಿಷಾದ ವ್ಯಕ್ತಪಡಿಸಿದರು.

12ನೇ ಶತಮಾನ ಕ್ರಾಂತಿಕಾರಿಗಳ ಶತಮಾನ. ಜಾತಿ, ಭಾಷೆ ಸೇರಿದಂತೆ ಸಮಾಜದಲ್ಲಿದ್ದ ಅಂಧ ಆಚರಣೆಗಳ ವಿರುದ್ಧ ಹೋರಾಡಿ ಸಮಾಜದಲ್ಲಿ ಸಮಾನತೆಗಾಗಿ ಜನರಲ್ಲಿ ಜಾಗೃತಿ ಮೂಡಿಸುವ ಕೆಲಸವನ್ನು ಶಿವಶರಣರು, ಶರಣೆಯರು ಮಾಡಿದರು ಎಂದರು.

ಡಾ.ಚಿದಾನಂದಮೂರ್ತಿ ಅವರು ಹೇಳುವಂತೆ ಬಸವಣ್ಣ, ಅಲ್ಲಮ್ಮಪ್ರಭು ಸೇರಿದಂತೆ ಅನೇಕ ಶಿವಶರಣರು ಮೇಲ್ಸ್ತರದಿಂದ ಬಂದು ಸಾಮಾಜಿಕ ಅನಿಷ್ಠಗಳ ವಿರುದ್ಧ ಹೋರಾಡಿದರೆ, ಕೇಳ ಸಮುದಾಯದಿಂದ ಬಂದು ವ್ಯವಸ್ಥೆಯ ವಿರುದ್ಧ ಹೋರಾಡಿದ ಹಡಪದ ಅಪ್ಪಣ್ಣ ಸಮಾಜಕ್ಕೆ ಮಾದರಿಯಾಗಿದ್ದಾರೆ ಎಂದು ಬಣ್ಣಿಸಿದ್ದಾರೆ. ಹಡಪದ ಅಪ್ಪಣ್ಣ ವೇದ, ಪುರಾಣ, ಶಾಸ್ತ್ರದಲ್ಲಿ ಪಾಂಡಿತ್ಯ ಗಳಿಸಿದ್ದರು ಎಂದು ತಿಳಿಸಿದರು.

ಹಡಪದ ಅಪ್ಪಣ್ಣ ತಮ್ಮ ವಚನಗಳ ಮೂಲಕ ಸಮಾಜದ ವ್ಯವಸ್ಥೆಯ ಬಗ್ಗೆ ಜನಸಾಮಾನ್ಯರಿಗೆ ತಿಳಿಸುವ ಪ್ರಯತ್ನ ಮಾಡಿದ್ದಾರೆ. ಅವರ ಒಂದು ವಚನದಲ್ಲಿ ವ್ಯಕ್ತಿಯ ವೇಷಭೂಷಣದಿಂದ ಅಳೆಯಬಾರದು. ಅವನ ಅಂತರಂಗವನ್ನು ಅರ್ಥ ಮಾಡಿಕೊಳ್ಳಬೇಕು ಎಂದಿದ್ದರು. ಆದರೆ, ವ್ಯಕ್ತಿಯ ಅಂತರಂಗವನ್ನು ಅರ್ಥಮಾಡಿಕೊಳ್ಳದೆ ಕೇವಲ ವ್ಯಕ್ತಿಯ ವೇಷಭೂಷಣದಿಂದ ಅಳೆಯುವ ಮನಃಸ್ಥಿತಿ ನಮ್ಮಲ್ಲಿ ಇಂದು ಕೂಡ ಇದೆ. ಇಂತಹ ಮನಃಸ್ಥಿತಿ ನಮ್ಮಿಂದ ದೂರವಾದಾಗ ಮಾತ್ರ ವಚನಕಾರರ ಆಶಯಕ್ಕೆ ಅರ್ಥ ಬರುತ್ತದೆ ಎಂದರು.

ಕಾಯಕವೇ ಕೈಲಾಸ ಎಂಬ ಬಸವ ತತ್ವ ಪಾಲನೆ ಮತ್ತು ದಾಸೋಹದಿಂದ ವ್ಯಕ್ತಿಗೆ ಮುಕ್ತಿ, ಶರಣರಿಗೆ ಮೋಕ್ಷ ಎಂಬುದು ಹಡಪದ ಅಪ್ಪಣ್ಣ ಅವರ ಮುಖ್ಯ ಉದ್ದೇಶವಾಗಿತ್ತು. ಅವರ ವಚನಗಳ ಮೂಲಕ ಇದನ್ನು ಸಾರಿದರು. ಅವರ ಈ ಕಾರ್ಯಕ್ಕೆ ಪತ್ನಿ ಲಿಂಗಮ್ಮ ಅವರು ಬೆಂಬಲ ನೀಡಿದರು. ಸುಮ್ಮನೆ ಮಹನೀಯರ ಜಯಂತಿ ಆಚರಿಸುವುದರಿಂದ ಮಹಾತ್ಮರ ಜಯಂತಿಗೆ ಅರ್ಥ ಬರುವುದಿಲ್ಲ. ಅವರ ತತ್ವ, ಸಿದ್ಧಾಂತಗಳನ್ನು ಅಳವಡಿಸಿಕೊಂಡಾಗ ಜಯಂತಿಗಳ ಆಚರಣೆಗೆ ಅರ್ಥ ಬರುತ್ತದೆ ಎಂದು ಹೇಳಿದರು.

ಜಿಲ್ಲಾಧಿಕಾರಿ ಡಾ.ಬಗಾದಿ ಗೌತಮ್‌ ಶಿವಶರಣ ಹಡಪದ ಅಪ್ಪಣ್ಣ ಅವರ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಮಾಡುವ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿದರು.

ಅಪರ ಜಿಲ್ಲಾಧಿಕಾರಿ ಕುಮಾರ್‌, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕ ಡಾ.ರಮೇಶ್‌, ಬಿಎಸ್‌ಪಿ ಮುಖಂಡ ರಾಧಾಕೃಷ್ಣ, ರವೀಶ್‌ ಕ್ಯಾತನಬೀಡು ಹಾಗೂ ವಿವಿಧ ಇಲಾಖೆಗಳ ಅಧಿಕಾರಿಗಳು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.