5 ಲಕ್ಷ ಕೋಟಿ ಡಾಲರ್‌ ಆರ್ಥಿಕತೆಗೆ ಹಿಂದಿನ ಸರ್ಕಾರಗಳೂ ಕಾರಣ

Team Udayavani, Jul 20, 2019, 5:31 AM IST

ನವದೆಹಲಿ: ”ಭಾರತದ 5 ಲಕ್ಷ ಕೋಟಿ ಡಾಲರ್‌ ಆರ್ಥಿಕತೆ ಸ್ವರ್ಗದಿಂದ ಇಳಿದು ಬರುವಂಥದ್ದಲ್ಲ. ನಮ್ಮ ದೇಶ ಆ ಮಟ್ಟಕ್ಕೆ ಬೆಳೆದಿದೆ ಎಂದಾದರೆ ಅದಕ್ಕೆ ಕೇಂದ್ರದಲ್ಲಿ ಈ ಹಿಂದೆ ಅಧಿಕಾರದಲ್ಲಿದ್ದ ಸರ್ಕಾರಗಳೂ ಕಾರಣ” ಎಂದು ಮಾಜಿ ರಾಷ್ಟ್ರಪತಿ ಪ್ರಣಬ್‌ ಮುಖರ್ಜಿ ಹೇಳಿದ್ದಾರೆ.

ದೆಹಲಿಯಲ್ಲಿ ಉಪನ್ಯಾಸ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ”ಭಾರತದ ಆರ್ಥಿಕತೆ 5 ಲಕ್ಷಕೋಟಿ ಡಾಲರ್‌ಗೆ ಮುಟ್ಟುತ್ತದೆ ಎಂದು ವಿತ್ತ ಸಚಿವರು ಹೇಳಿದ್ದಾರೆ. ಆ ಮಟ್ಟಕ್ಕೆ ದೇಶ ಬೆಳೆಯುತ್ತಿದೆ ಎಂದಾದರೆ, ಅದಕ್ಕೆ ಹಿಂದಿನ ಸರ್ಕಾರಗಳು ಹಾಕಿರುವ ಭದ್ರ ಬುನಾದಿಯೇ ಕಾರಣ’ ಎಂದಿದ್ದಾರೆ.

ಇದೇ ವೇಳೆ, ಯೋಜನಾ ಆಯೋಗವನ್ನು ಬರ್ಖಾಸ್ತು ಮಾಡಿರುವ ಕೇಂದ್ರ ಸರ್ಕಾರದ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ ಅವರು, ಆಧುನಿಕ ಭಾರತದ ಅಡಿಪಾಯ ಹಾಕಿದ ನಮ್ಮ ಹಿರಿಯರು ಯೋಜಿತ ಆರ್ಥಿಕತೆಯ ಮೇಲೆ ನಂಬಿಕೆ ಇಟ್ಟಿದ್ದರು ಎಂದಿದ್ದಾರೆ.