ಕೃಷಿ ಸಮೃದ್ಧಿ, ಜಾನುವಾರು ಆರೋಗ್ಯಕ್ಕಾಗಿ ಅಜ್ಜಿ ಹಬ್ಬ!

Team Udayavani, Jul 20, 2019, 1:21 PM IST

ಹೊನ್ನಾಳಿ: ತಾಲೂಕಿನ ಬಲಮುರಿ, ಎಚ್. ಗೋಪಗೊಂಡನಹಳ್ಳಿ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ಗ್ರಾಮಸ್ಥರು ಶುಕ್ರವಾರ ಸಡಗರ-ಸಂಭ್ರಮಗಳಿಂದ ಅಜ್ಜಿ ಹಬ್ಬ ಆಚರಿಸಿದರು.

ಹಬ್ಬಕ್ಕೆ ಅಗತ್ಯವಾದ ಮಣ್ಣಿನ ಕುಡಿಕೆ, ಬಳೆ ಬಂಗಾರ, ತೆಂಗಿನಕಾಯಿ, ಬಾಳೆಹಣ್ಣು ಮತ್ತಿತರ ಸಾಮಗ್ರಿಗಳನ್ನು ಶುಕ್ರವಾರ ಹೊನ್ನಾಳಿ ಪಟ್ಟಣದಲ್ಲಿ ಜನತೆ ಖರೀದಿಸಲು ಮುಗಿಬಿದ್ದಿದ್ದ ದೃಶ್ಯ ಕಂಡುಬಂತು.

ಅಜ್ಜಿ ಹಬ್ಬದ ದಿನ ಹೋಳಿಗೆ-ಸೀಕರಣೆ ಮತ್ತಿತರ ಅಡುಗೆ ಮಾಡಿ ಊಟ ಮಾಡುವ ವಾಡಿಕೆ. ಅದರಂತೆ, ಸೀಕರಣೆ ಮಾಡಲು ಬೇಕಾದ ಮಾವಿನಹಣ್ಣನ್ನು ಖರೀದಿಸಲು ಜನತೆ ಮುಗಿಬಿದ್ದಿದ್ದರು. ಮಾವಿನಹಣ್ಣಿನ ಕೊನೇ ಸೀಜನ್‌ ಆದ ಕಾರಣ ಬೆಲೆ ಕೊಂಚ ಹೆಚ್ಚಾಗಿತ್ತು.

ಮಳೆಗಾಲದ ಆಷಾಢ ಮಾಸದಲ್ಲಿನ ಶುಕ್ರವಾರ ಗ್ರಾಮೀಣ ಪ್ರದೇಶಗಳಲ್ಲಿ ಈ ಹಬ್ಬ ಆಚರಿಸಲಾಗುತ್ತದೆ. ಅದರಂತೆ ಬಲಮುರಿ ಗ್ರಾಮದಲ್ಲಿ ಮೂರನೇ ಆಷಾಢ ಶುಕ್ರವಾರ ಹಬ್ಬ ಆಚರಿಸಲಾಯಿತು.

ಮಳೆಗಾಲದಲ್ಲಿ ಜಾನುವಾರು ಗಳಿಗೆ ಬರುವ ಸಾಮಾನ್ಯ ಕಾಯಿಲೆಗಳಾದ ಗಳಲೆ ರೋಗ, ಕಾಲು-ಬಾಯಿ ಜ್ವರ, ಗದ್ದ ಬಾವು ಮತ್ತಿತರ ಕಾಯಿಲೆಗಳು ಬಾರದಿರಲಿ, ಜಾನುವಾರುಗಳು ಆರೋಗ್ಯದಿಂದ ಇರಲಿ ಎಂಬ ಉದ್ದೇಶದಿಂದ ಈ ಹಬ್ಬವನ್ನು ಆಚರಿಸಲಾಗುತ್ತದೆ ಎನ್ನುತ್ತಾರೆ ಬಲಮುರಿ ಗ್ರಾಮದ ಎ.ಇ. ಮಲ್ಲಿಕಾರ್ಜುನ್‌.

ಅಜ್ಜಿ ಹಬ್ಬದ ದಿನ ಗ್ರಾಮಸ್ಥರು ರಾತ್ರಿ ವೇಳೆ ಗ್ರಾಮದಲ್ಲಿನ ದುರುಗಮ್ಮನ ದೇವಸ್ಥಾನಕ್ಕೆ ತೆರಳುತ್ತಾರೆ. ಹಾಲು, ಅನ್ನ ಮತ್ತಿತರ ಖಾದ್ಯಗಳ ಎಡೆಯನ್ನು ದೇವಿಗೆ ಅರ್ಪಿಸುತ್ತಾರೆ. ನಂತರ, ಮನೆಗೆ ಬಂದು ಅಜ್ಜಿ ಹಬ್ಬದ ವಿಧಿ-ವಿಧಾನಗಳನ್ನು ನೆರವೇರಿಸಿ, ಎಡೆ ಮಾಡಿ ಎಲ್ಲರೂ ಭೋಜನ ಸವಿಯುತ್ತಾರೆ. ಈ ಹಬ್ಬದ ವಿಶೇಷವೇನೆಂದರೆ, ಮನೆಯ ಎತ್ತುಗಳಿಗೆ ಸಂಪೂರ್ಣ ವಿಶ್ರಾಂತಿ ನೀಡಲಾಗುತ್ತದೆ. ಎತ್ತುಗಳನ್ನು ಈ ದಿನ ಬೇಸಾಯಕ್ಕೆ ಬಳಸುವುದಿಲ್ಲ.