ಎಟಿಪಿ ಟೆನಿಸ್‌: ಜಾನ್‌ ಇಸ್ನರ್‌ ಫೈನಲಿಗೆ

Team Udayavani, Jul 22, 2019, 5:18 AM IST

ನ್ಯೂಪೋರ್ಟ್‌: ಇಲ್ಲಿನ ರೋಡ್‌ ಐಲ್ಯಾಂಡ್‌ನ‌ಲ್ಲಿ ನಡೆಯುತ್ತಿರುವ ಎಟಿಪಿ ಗ್ರಾಸ್‌ ಕೋರ್ಟ್‌ ಕೂಟದಲ್ಲಿ ಮೂರು ಬಾರಿಯ ಚಾಂಪಿಯನ್‌ ಜಾನ್‌ ಇಸ್ನರ್‌ ಕಠಿನ ಹೋರಾಟದಲ್ಲಿ 4ನೇ ಶ್ರೇಯಾಂಕದ ಫ್ರಾನ್ಸ್‌ನ ಯುಗೊ ಹಂಬರ್ಟ್‌ ಅವರನ್ನು ಸೋಲಿಸಿ ಫೈನಲ್‌ ಹಂತಕ್ಕೇರಿದರು.

ಮೊದಲೆರಡು ಸೆಟ್‌ಗಳಲ್ಲಿ ಇಸ್ನರ್‌ ಮತ್ತು ಹಂಬರ್ಟ್‌ ತಮ್ಮ ಸರ್ವೀಸ್‌ ಬ್ರೇಕ್‌ ಮಾಡಲು ಆಸ್ಪದ ಕೊಡಲಿಲ್ಲ. ಹೀಗಾಗಿ ಸೆಟ್‌ ಟೈಬ್ರೇಕರ್‌ಗೆ ಹೋಯಿತು. ಮೊದಲ ಸೆಟ್‌ ಕಳೆದುಕೊಂಡ ಇಸ್ನರ್‌ ಆಬಳಿಕ ಅಮೋಘವಾಗಿ ಆಡಿ ಸತತ ಎರಡು ಸೆಟ್‌ಗಳನ್ನು ಗೆದ್ದು ಮುನ್ನಡೆದರು. ಇಸ್ನರ್‌ ಗೆಲುವಿನ ಅಂತರ 6-7 (4-7), 7-6 (7-5), 6-3.
ಕಳೆದ ಎಪ್ರಿಲ್‌ನಲ್ಲಿ ಮಯಾಮಿ ಯಲ್ಲಿ ನಡೆದ ಕೂಟದಲ್ಲಿ ಫೈನಲ್‌ ತಲುಪಿದ ಬಳಿಕ ಇಸ್ನರ್‌ ಪಾದದ ಸ್ನಾಯು ಸೆಳೆತದಿಂದಾಗಿ ಉತ್ತಮ ಪ್ರದರ್ಶನ ನೀಡಲು ವಿಫ‌ಲರಾಗಿದ್ದರು.

ಇಸ್ನರ್‌ ಫೈನಲ್‌ ಹೋರಾಟದಲ್ಲಿ ಏಳನೇ ಶ್ರೇಯಾಂಕದ ಕಜಾಕ್‌ಸ್ಥಾನದ ಅಲೆಕ್ಸಾಂಡರ್‌ ಬಬ್ಲಿಕ್‌ ಅವರನ್ನು ಎದುರಿಸಲಿದ್ದಾರೆ. ಬಬ್ಲಿಕ್‌ ಇನ್ನೊಂದು ಸೆಮಿಫೈನಲ್‌ ಪಂದ್ಯದಲ್ಲಿ ಸ್ಪೇನ್‌ನ ಮಾರ್ಸೆಲ್‌ ಗ್ರ್ಯಾನೊಲ್ಲರ್ ಅವರನ್ನು 7-6 (7-5), 3-6, 6-4 ಸೆಟ್‌ಗಳಿಂದ ಕೆಡವಿದರು.

ಪೇಸ್‌ ಜೋಡಿ ಪರಾಭವ
ಹಾಲ್‌ ಆಫ್ ಫೇಮ್‌ ಕೂಟದ ಪುರುಷರ ಡಬಲ್ಸ್‌ನಲ್ಲಿ ಲಿಯಾಂಡರ್‌ ಪೇಸ್‌-ಮಾರ್ಕಸ್‌ ಡೇನಿಯಲ್‌ (ನ್ಯೂಜಿಲ್ಯಾಂಡ್‌) ಜೋಡಿ ಸೆಮಿಫೈನಲ್‌ನಲ್ಲಿ ಪರಾಭವಗೊಂಡಿದೆ. ರವಿವಾರದ ಮುಖಾಮುಖೀಯಲ್ಲಿ ಶ್ರೇಯಾಂಕರಹಿತ ಮಾರ್ಸೆಲ್‌ ಗ್ರ್ಯಾನೊಲರ್- ಸರ್ಗಿ ಸ್ಟಾಖೋವ್‌ಸ್ಕಿ ಸೇರಿಕೊಂಡು ಇಂಡೋ-ಕಿವೀಸ್‌ ಜೋಡಿಯನ್ನು ಭಾರೀ ಹೋರಾಟ ನಡೆಸಿ 3-6, 7-6 (8), 11-9 ಅಂತರದಿಂದ ಮಣಿಸಿತು. ಲಿಯಾಂಡರ್‌ ಪೇಸ್‌ ಎಟಿಪಿ ಟೂರ್‌ ಸೆಮಿಫೈನಲ್‌ ತಲುಪಿದ ವಿಶ್ವದ 2ನೇ ಅತೀ ಹಿರಿಯ ಟೆನಿಸಿಗನಾಗಿದ್ದರು.