ಬೆಂಗಳೂರಿಗೆ ಭಾರೀ ಆಘಾತ

ಆತಿಥೇಯ ಟೈಟಾನ್ಸ್‌ಗೆ ಸತತ ಎರಡನೇ ಸೋಲು

Team Udayavani, Jul 22, 2019, 5:01 AM IST

ಹೈದರಾಬಾದ್‌: ರೈಡರ್‌ ಸಚಿನ್‌ (7 ಅಂಕ) ಮತ್ತು ಡಿಫೆಂಡರ್‌ ಸುನೀಲ್‌ ಕುಮಾರ್‌ (6 ಅಂಕ) ಅವರ ಪ್ರಚಂಡ ಆಟದ ನೆರವಿನಿಂದ 7ನೇ ಆವೃತ್ತಿ ಪ್ರೊ ಕಬಡ್ಡಿಯಲ್ಲಿ ಹಾಲಿ ಚಾಂಪಿಯನ್‌ ಬೆಂಗಳೂರು ಬುಲ್ಸ್‌ ವಿರುದ್ಧ ಗುಜರಾತ್‌ ಫಾರ್ಚೂನ್‌ಜೈಂಟ್ಸ್‌ 42-24 ಅಂತರದ ಭಾರೀ ಗೆಲುವು ದಾಖಲಿಸಿದೆ. ಗುಜರಾತ್‌ಗೆ ಇದು ಮೊದಲ ಪಂದ್ಯವಾಗಿತ್ತು. ಬುಲ್ಸ್‌ ಮೊದಲ ದಿನ ಪಾಟ್ನಾಕ್ಕೆ ಸೋಲುಣಿಸಿತ್ತು.ದ್ವಿತೀಯ ಪಂದ್ಯದಲ್ಲಿ ಆತಿಥೇಯ ತೆಲುಗು ಟೈಟಾನ್ಸ್‌ಗೆ ತಮಿಳ್‌ ತಲೈವಾಸ್‌ 39-26 ಅಂತರದಿಂದ ಆಘಾತವಿಕ್ಕಿತು. ಇದು ಟೈಟಾನ್ಸ್‌ಗೆ ಎದುರಾದ ಸತತ 2ನೇ ಸೋಲು.

ಆರಂಭದಲ್ಲೇ ಕಂಗಾಲು
ಮೊದಲ ಗೆಲುವಿನ ಖುಷಿಯಲ್ಲಿದ್ದ ಬುಲ್ಸ್‌ ಬಹಳ ಆತ್ಮವಿಶ್ವಾÓ ‌ದಿಂದ ಆಡಲಿಳಿಯಿತು. ಆದರೆ ಪಾಟ್ನಾ ವಿರುದ್ಧದ ಪ್ರದರ್ಶನ ಪುನರಾವರ್ತನೆಗೊಂಡೀತೆಂಬ ನಿರೀಕ್ಷೆ ಸುಳ್ಳಾಯಿತು.

ಮೊದಲ ಅವಧಿಯಲ್ಲಿ ಗುಜರಾತ್‌ ಫಾರ್ಚೂನ್‌ಜೈಂಟ್ಸ್‌ನ ಆಕ್ರಮಣಕಾರಿ ಆಟದ ಎದುರು ಬೆಂಗಳೂರು ಬುಲ್ಸ್‌ ತಂಡ ಕಂಗಾಲಾಯಿತು. ತಂಡದ ತಾರಾ ರೈಡರ್‌ ಪವನ್‌ ಸೆಹ್ರಾವತ್‌ ಆಟ ನಡೆಯಲಿಲ್ಲ. ರೋಹಿತ್‌ ಕುಮಾರ್‌ ತಂತ್ರಗಾರಿಕೆಯೂ ಸಾಗಲಿಲ್ಲ. ಜತೆಗೆ ಮಹೇಂದರ್‌ ಸಿಂಗ್‌ ಟ್ಯಾಕಲ್‌ ನಡೆಸುವಲ್ಲಿ ವಿಫ‌ಲರಾದರು. ಇದರ ಸಂಪೂರ್ಣ ಲಾಭವನ್ನು ಎತ್ತಿದ ಗುಜರಾತ್‌ ಅಬ್ಬರದ ಆಟ ಪ್ರದರ್ಶಿಸಿತು. ಸಚಿನ್‌, ಜಿ.ಬಿ. ಮೋರೆ ಹಾಗೂ ಸುನೀಲ್‌ ಕುಮಾರ್‌ ಮಿಂಚಿನ ಆಟ ಪ್ರದರ್ಶಿ ಸುವ ಮೂಲಕ ತಂಡಕ್ಕೆ ಮೊದಲ ಅವಧಿಯಲ್ಲಿ 10-21 ಅಂತರದ ದೊಡ್ಡ ಮುನ್ನಡೆ ತಂದಿತ್ತರು.

ನಡೆಯದ ಜಾದೂ
ಬೆಂಗಳೂರು 2ನೇ ಅವಧಿಯಲ್ಲಿಯೂ ಚೇತರಿಸಿಕೊಳ್ಳಲಿಲ್ಲ. ನಿರಂತರ ವೈಫ‌ಲ್ಯವನ್ನು ಅನುಭವಿಸುತ್ತ ಸಾಗಿತು. ರೈಡರ್‌ ಪವನ್‌ ಸೆಹ್ರಾವತ್‌ (8 ಅಂಕ), ಸುಮಿತ್‌ ಸಿಂಗ್‌ (5 ಅಂಕ) ಹಾಗೂ ಡಿಫೆಂಡರ್‌ ಮಹೇಂದ್ರ ಸಿಂಗ್‌ (4 ಅಂಕ) ಮಿಂಚಿ ದರೂ ನಾಯಕ ರೋಹಿತ್‌ ಕುಮಾರ್‌ ರೈಡಿಂಗ್‌ನಲ್ಲಿ ಭಾರೀ ವೈಫ‌ಲ್ಯ ಅನುಭವಿಸಿದರು. 12 ರೈಡಿಂಗ್‌ನಿಂದ ಕೇವಲ 4 ಅಂಕ ಮಾತ್ರ ತರಲು ಸಾಧ್ಯವಾಯಿತು. 5 ಬಾರಿ ಎದುರಾಳಿ ಕೋಟೆಯೊಳಗೆ ಸಿಲುಕಿದ ಇವರು ಮತ್ತೆ 5 ಬಾರಿ ಯಾವುದೇ ಅಂಕ ಪಡೆಯಲಾಗದೆ ವಾಪಸ್‌ ಆಗಿದ್ದರು. ಗುಜರಾತ್‌ ಪರ ಹೆಚ್ಚುವರಿ ಆಟಗಾರನಾಗಿ ಕಣಕ್ಕೆ ಇಳಿದ ಸೋನು ರೈಡಿಂಗ್‌ನಿಂದ 5 ಅಂಕ ಪಡೆದು ಗಮನ ಸೆಳೆದರು.

ಪವನ್‌ ಸೆಹ್ರಾವತ್‌ ದಾಖಲೆ
ಕಳೆದ ಸಲ ಬುಲ್ಸ್‌ ತಂಡವನ್ನು ಚಾಂಪಿಯನ್‌ ಪಟ್ಟಕ್ಕೇರಿಸಿದ್ದ ರೈಡರ್‌ ಪವನ್‌ ಸೆಹ್ರಾವತ್‌ ಪ್ರೊ ಕಬಡ್ಡಿಯಲ್ಲಿ 350 ರೈಡಿಂಗ್‌ ಪಾಯಿಂಟ್‌ ದಾಟಿ ವೈಯಕ್ತಿಕ ದಾಖಲೆ ನಿರ್ಮಿಸಿದ್ದಾರೆ.