ಚಂದ್ರಯಾನ 2: ಮೊದಲ ಹಂತದ ಕಕ್ಷೆ ಏರಿಕೆ ಯಶಸ್ವಿ

Team Udayavani, Jul 25, 2019, 5:00 AM IST

ಶ್ರೀಹರಿಕೋಟ: ಕಳೆದ ಸೋಮವಾರ ನಭಕ್ಕೆ ನೆಗೆದ ಚಂದ್ರಯಾನ-2 ಗಗನನೌಕೆಯ ಮೊದಲ ಹಂತದ ಕಕ್ಷೆಗೇರಿಸುವಿಕೆ ಪ್ರಕ್ರಿಯೆಯನ್ನು ಬುಧವಾರ ಯಶಸ್ವಿಯಾಗಿ ನಡೆಸಲಾಗಿದೆ ಎಂದು ಇಸ್ರೋ ತಿಳಿಸಿದೆ. ಉನ್ನತ ಸ್ತರದ ಕಕ್ಷೆಗೆ ಗಗನನೌಕೆಯನ್ನು ಏರಿಸಲಾಗಿದೆ. ಇದಕ್ಕಾಗಿ 57 ಸೆಕೆಂಡುಗಳ ಕಾಲ ಇಂಜಿನ್‌ ಅನ್ನು ಚಾಲನೆ ಮಾಡಲಾಗಿತ್ತು. ಮಧ್ಯಾಹ್ನ 2.52 ಗಂಟೆಗೆ ಸರಿಯಾಗಿ ಈ ಪ್ರಕ್ರಿಯೆ ಯಶಸ್ವಿಯಾಗಿ ನಡೆದಿದೆ ಎಂದು ಇಸ್ರೋ ವಿಜ್ಞಾನಿಗಳು ತಿಳಿಸಿದ್ದಾರೆ. ಚಂದ್ರನ ಮೇಲೆ ಇಳಿಯುವುದಕ್ಕೂ ಮೊದಲು ಒಟ್ಟು ನಾಲ್ಕು ಕಕ್ಷೆಗೇರಿಸುವಿಕೆ ಪ್ರಕ್ರಿಯೆ ನಡೆಯಲಿದೆ. ಇದರ ಎರಡನೇ ಪ್ರಕ್ರಿಯೆ ಜುಲೈ 26 ರಂದು ಮಧ್ಯಾಹ್ನ 1 ಗಂಟೆಗೆ ನಡೆಯಲಿದೆ.

ನಿಗದಿಯಂತೆ ಸೆ.7 ರಂದು ಚಂದ್ರನ ಮೇಲೆ ಲ್ಯಾಂಡರ್‌ ಸಾಫ್ಟ್ ಲ್ಯಾಂಡ್‌ ಆಗಲಿದೆ. ಆಗಸ್ಟ್‌ 14 ರಂದು ನೌಕೆಯನ್ನು ಚಂದ್ರನ ಕಕ್ಷೆಗೆ ಕಳುಹಿಸಲಾಗುತ್ತದೆ. ಇದು ಅತ್ಯಂತ ಪ್ರಮುಖ ಹಂತವಾಗಿದ್ದು, ನಂತರದ ಪ್ರಮುಖ ಹಂತವೇ ಚಂದ್ರನ ಮೇಲೆ ಸಾಫ್ಟ್ ಲ್ಯಾಂಡಿಂಗ್‌ ಆಗಿದೆ.

ನ್ಯಾಷನಲ್ ಜಿಯೋಗ್ರಾಫಿಕ್‌ನಲ್ಲಿ ಲೈವ್‌

ಸೆಪ್ಟೆಂಬರ್‌ 7 ರಂದು ಚಂದ್ರನ ಮೇಲೆ ಗಗನನೌಕೆ ಸಾಫ್ಟ್ ಲ್ಯಾಂಡ್‌ ಮಾಡುವ ಪ್ರಕ್ರಿಯೆಯನ್ನು ನೇರ ಪ್ರಸಾರ ಮಾಡಲು ನ್ಯಾಷನಲ್ ಜಿಯೋಗ್ರಾಫಿಕ್‌ ಚಾನೆಲ್ ನಿರ್ಧರಿಸಿದೆ. ಈ ಪ್ರಕ್ರಿಯೆಯನ್ನು ಇಸ್ರೋದಿಂದ ನೇರ ಪ್ರಸಾರ ಮಾಡಲಾಗುತ್ತದೆ. ಈ ನೇರ ಪ್ರಸಾರದಲ್ಲಿ ಇಡೀ ಪ್ರಕ್ರಿಯೆಯ ಬಗ್ಗೆ ವೀಕ್ಷಕರಿಗೆ ವಿವರವಾದ ಮಾಹಿತಿಯನ್ನೂ ನೀಡಲಾಗುತ್ತದೆ ಎಂದು ಚಾನೆಲ್ ಪ್ರಕಟಿಸಿದೆ.

239 ಉಪಗ್ರಹ ಉಡಾವಣೆ; 6,289 ಕೋಟಿ ರೂ. ಆದಾಯ

ಕಳೆದ 3 ವರ್ಷಗಳಲ್ಲಿ ಇಸ್ರೋದ ವಾಣಿಜ್ಯಿಕ ಅಂಗವಾದ ಆ್ಯಂಟ್ರಿಕ್ಸ್‌ ಕಾರ್ಪೊರೇಷನ್‌ ಒಟ್ಟು 239 ಉಪಗ್ರಹಗಳನ್ನು ಉಡಾವಣೆ ಮಾಡಿದ್ದು, ಇದರಿಂದ 6,289 ಕೋಟಿ ರೂ. ಆದಾಯ ಗಳಿಸಿದೆ ಎಂದು ಲೋಕಸಭೆಗೆ ಸರ್ಕಾರ ಬುಧವಾರ ಮಾಹಿತಿ ನೀಡಿದೆ.