ಹೆಬ್ರಿ -ಕುಚ್ಚೂರು ರಸ್ತೆ: ಅವೈಜ್ಞಾನಿಕ ಹಂಪ್‌ ತೆರವು

Team Udayavani, Jul 26, 2019, 5:33 AM IST

ಹೆಬ್ರಿ: ಹೆಬ್ರಿ ಪೇಟೆಯಿಂದ ಕುಚ್ಚೂರು ಮಾರ್ಗದಲ್ಲಿ ಪ್ರಮುಖ ರಸ್ತೆಯ ಆರಂಭದಲ್ಲಿ ಅಳವಡಿಸಲಾದ ಅವೈಜ್ಞಾನಿಕ ಹಂಪ್‌ನ್ನು ಜು. 23ರಂದು ಜಿ.ಪಂ. ಎಂಜಿನಿಯರ್‌ ಸದಾನಂದ ನಾಯಕ್‌ ನೇತೃತ್ವದಲ್ಲಿ ತೆರವುಗೊಳಿಸಲಾಗಿದೆ.

ಹಂಪ್‌ನಿಂದ ಈ ಮಾರ್ಗದಲ್ಲಿ ಸಂಚರಿಸುವ ವಾಹನಗಳಿಗೆ ಸಮಸ್ಯೆ ಯಾಗುತ್ತಿರುವ ಬಗ್ಗೆ ವರದಿಯನ್ನು ಪತ್ರಿಕೆ ಜು. 9ರಂದು ಪ್ರಕಟಿಸಿತ್ತು. ಇದಕ್ಕೆ ಸ್ಪಂದಿಸಿರುವ ಜಿ.ಪಂ. ಎಂಜಿನಿಯರ್‌ ಅವರು ಕೂಡಲೇ ತೆರವುಗೊಳಿಸಿ ಸ್ವಲ್ಪ ಮುಂದೆ ಅಳವಡಿಸುವುದಾಗಿ ತಿಳಿಸಿದ್ದರು. ಅದರಂತೆ ಈಗ ಹಂಪ್‌ನ್ನು ತೆರವುಗೊಳಿಸಿದ್ದು ಮಳೆ ಕಡಿಮೆಯಾದ ಅನಂತರ ಬೇರೆ ಹಂಪ್‌ನ್ನು ಅಳವಡಿಸುವುದಾಗಿ ತಿಳಿಸಿದ್ದಾರೆ.

ಸಾರ್ವಜನಿಕರ ಅಭಿಪ್ರಾಯ ಪಡೆದು ಹಂಪ್‌ ಅಳವಡಿಕೆ

ಸಮಸ್ಯೆಯ ಬಗ್ಗೆ ಗ್ರಾಮ ಸಭೆಯಲ್ಲಿ ಚರ್ಚಿಸಿ ಜಿ.ಪಂ. ಎಂಜಿನಿಯರ್‌ ಅವರಿಗೆ ಪತ್ರಬರೆಯಲಾಗಿದೆ. ಅದರಂತೆ ಅವರು ಹಂಪ್‌ನ್ನು ತೆರವುಗೊಳಿಸಿದ್ದು ಮುಂದೆ ಹಂಪ್‌ ಅಳವಡಿಸುವಾಗ ಸಾರ್ವಜನಿಕರ ಅಭಿಪ್ರಾಯ ಪಡೆದು, ಜಿ.ಪಂ.ನೊಂದಿಗೆ ಚರ್ಚಿಸಿ ಅಳವಡಿಸಲಾಗುವುದು ಎಂದು ಹೆಬ್ರಿ ಗ್ರಾ.ಪಂ. ಅಧ್ಯಕ್ಷ ಎಚ್.ಕೆ. ಸುಧಾಕರ ಅವರು ತಿಳಿಸಿದ್ದಾರೆ.