“ಚಿಟ್” ಮೋಸ ನಡೆಯದು

ಮಹತ್ವದ ವಿಧೇಯಕಕ್ಕೆ ರಾಜ್ಯಸಭೆಯಲ್ಲಿ ಅನುಮೋದನೆ

Team Udayavani, Jul 30, 2019, 5:42 AM IST

ನವದೆಹಲಿ: ಶಾರದಾ ಚಿಟ್ ಫ‌ಂಡ್‌ ಮತ್ತು ಇತರ ಗುರುತರ ಹಗರಣಗಳ ಬಳಿಕ ಜನರು ಹೂಡಿಕೆ ಮಾಡಿದ್ದನ್ನು ರಕ್ಷಿಸುವ ನಿಟ್ಟಿನಲ್ಲಿ ಮಹತ್ವದ ಕಾನೂನಿಗೆ ಸಂಸತ್‌ನ ಸಮ್ಮತಿ ಸೋಮವಾರ ಸಿಕ್ಕಿದೆ. ಕಾನೂನಿನ ನಿಯಂತ್ರಣ ಮೀರಿ ವಹಿವಾಟು ನಡೆಸುವ ಸಂಸ್ಥೆಗಳ ಹಣಕಾಸು ಚಟುವಟಿಕೆಗಳಿಗೆ ನಿಯಂತ್ರಣ ಹೇರುವ ನಿಟ್ಟಿನಲ್ಲಿ ಸಿದ್ಧಗೊಂಡಿರುವ ಅನಿಯಂತ್ರಿತ ಠೇವಣಿ ಯೋಜನೆಗಳ ನಿಷೇಧ ವಿಧೇಯಕ 2019ಕ್ಕೆ ರಾಜ್ಯಸಭೆ ಧ್ವನಿಮತದಿಂದ ಅಂಗೀಕಾರ ನೀಡಿದೆ. ಜು.24ರಂದು ಲೋಕಸಭೆಯಲ್ಲಿ ಅದಕ್ಕೆ ಅನುಮೋದನೆ ಸಿಕ್ಕಿತ್ತು.

ರಾಜ್ಯಸಭೆಯಲ್ಲಿ ವಿಧೇಯಕ ಮೇಲಿನ ಚರ್ಚೆಗೆ ಉತ್ತರ ವಾಗಿ ಮಾತನಾಡಿದ ವಿತ್ತ ಖಾತೆ ಸಹಾಯಕ ಸಚಿವ ಅನುರಾಗ್‌ ಸಿಂಗ್‌ ಠಾಕೂರ್‌, ಸದಸ್ಯರೆಲ್ಲರೂ ವಿಧೇಯಕಕ್ಕೆ ಬೆಂಬಲ ನೀಡಿ ‘ಆಶೀರ್ವದಿಸಬೇಕು’ ಎಂದು ಮನವಿ ಮಾಡಿದ್ದರು.

ವಿಧೇಯಕದಲ್ಲಿನ ಅಂಶಗಳ ಬಗ್ಗೆ ಮಾತನಾಡಿದ ಸಚಿವ ಸಿಂಗ್‌, ಠೇವಣಿ ಪಡೆದು ವಂಚಿಸಿದರೆ ಸೆಕ್ಷನ್‌ 3ರ ಅನ್ವಯ 1 ರಿಂದ 5 ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗುತ್ತದೆ. ಈ ಅಂಶ ರಾಜ್ಯ ಸರ್ಕಾರಗಳಿಗೆ ಜನರ ಠೇವಣಿ ರಕ್ಷಿಸುವ ನಿಟ್ಟಿನಲ್ಲಿ ಹೆಚ್ಚಿನ ಕ್ರಮ ಕೈಗೊಳ್ಳಲು ಅಧಿಕಾರ ನೀಡುತ್ತದೆ ಎಂದಿದ್ದಾರೆ. ಇದೇ ಮೊದಲ ಬಾರಿಗೆ ಠೇವಣಿ ಸಂಗ್ರಹಿಸಿದ ಕಂಪನಿಗಳ ಮಾಹಿತಿ ಸಂಗ್ರಹಿಸುವ ವ್ಯವಸ್ಥೆಯನ್ನೂ ಮಾಡಲಾಗುತ್ತದೆ. ಠೇವಣಿ ಪಡೆದುಕೊಂಡು ವಂಚಿಸಿದರೆ ಆತನ ಆಸ್ತಿ ಮುಟ್ಟುಗೋಲು ಹಾಕಿಕೊಳ್ಳಲು ಅವಕಾಶವಿದೆ. ಜತೆಗೆ ಸಂಬಂಧಿತ ಪ್ರಾಧಿಕಾರ ಆಸ್ತಿ ಮುಟ್ಟುಗೋಲು ವಿಚಾರಕ್ಕೆ ಸಂಬಂಧಿಸಿದಂತೆ ಅದೇ ರಾಜ್ಯದಲ್ಲಿನ ಕೋರ್ಟ್‌ಗೇ ಮನವಿ ಮಾಡಿಕೊಳ್ಳಬೇಕಾಗುತ್ತದೆ.

ನಿಗದಿತ ಅವಧಿ: ಠೇವಣಿ ವಂಚನೆ ಪ್ರಕರಣ ಸಂಬಂಧ ನಿಗದಿತ ಕೋರ್ಟ್‌ಗಳು, ದೂರು ಸ್ವೀಕರಿಸಿದ 180 ದಿನಗಳ ಒಳಗಾಗಿ ವಿಚಾರಣೆ ನಡೆಸಿ ಇತ್ಯರ್ಥಪಡಿಸಬೇಕು ಎಂದರು. ಇದೇ ಸಂದರ್ಭದಲ್ಲಿ ಸಂಸದ ಅಮರ್‌ ಸಿಂಗ್‌ ಮಾತನಾಡಿ, ಜನಪ್ರಿಯ ಸಿನಿಮಾ ತಾರೆಯರು ಮತ್ತು ಇತರ ಗಣ್ಯರು ಹೆಚ್ಚಿನ ಶುಲ್ಕ ಪಡೆದು ಕೆಲ ಠೇವಣಿ ಯೋಜನೆಗಳಿಗೆ ರಾಯಭಾರಿಗಳಾಗಿದ್ದಾರೆ ಎಂದರು. ಅದಕ್ಕೆ ಉತ್ತರಿಸಿದ ಸಚಿವ ಸಿಂಗ್‌ ಸರ್ಕಾರ ಅಂತರ್‌ ಸಚಿವಾಲಯದ ಸಮಿತಿ ರಚಿಸಿದ್ದು, ಠೇವಣಿ ಸ್ವೀಕಾರಕ್ಕೆ ಸಂಬಂಧಿಸಿದ ಹಾಲಿ ಇರುವ ನಿಯಮಗಳಲ್ಲಿ ಕೈಗೊಳ್ಳಬೇಕಾದ ಆಡಳಿತಾತ್ಮಕ, ಕಾನೂನಾತ್ಮಕ ಬದಲಾವಣೆಗೆ ಸೂಚಿಸಲಾಗಿದೆ ಎಂದರು.

ವಿಧೇಯಕ ಅಂಗೀಕಾರ: ಭಾರತೀಯ ವೈದ್ಯಕೀಯ ಮಂಡಳಿ ಸ್ಥಾನದಲ್ಲಿ ರಾಷ್ಟ್ರೀಯ ವೈದ್ಯಕೀಯ ಆಯೋಗ ರಚಿಸುವ ವಿಧೇಯಕವನ್ನು ಲೋಕಸಭೆಯಲ್ಲಿ ಅಂಗೀಕರಿಸಲಾಗಿದೆ. ವೈದ್ಯ ಸ್ನಾತಕೋತ್ತರ ಪ್ರವೇಶ ಪರೀಕ್ಷೆಗೆ ಪ್ರತ್ಯೇಕ ನೀಟ್ ಬದಲು, ಅಂತಿಮ ವರ್ಷದ ಎಂಬಿಬಿಎಸ್‌ ಪ್ರವೇಶ ಪರೀಕ್ಷೆಯನ್ನೇ ಪರಿಗಣಿಸುವ ಮಹತ್ವದ ಕ್ರಮಕ್ಕೂ ಅವಕಾಶ ಮಾಡಿಕೊಡಲಾಗಿದೆ. ಎಕ್ಸಿಟ್ ಪರೀಕ್ಷೆ ಮತ್ತು ವಿಧೇಯಕದಲ್ಲಿನ ಇತರ ವಿಚಾರಗಳಿಗೆ ಪ್ರತಿಪಕ್ಷಗಳು ಆಕ್ಷೇಪ ವ್ಯಕ್ತಪಡಿಸಿವೆ.

293 ಅಣೆಕಟ್ಟುಗಳಿಗೆ ಸೆಂಚುರಿ: ದೇಶದಲ್ಲಿರುವ ಸರಿ ಸುಮಾರು 293 ಅಣೆಕಟ್ಟುಗಳು 100 ವರ್ಷಕ್ಕಿಂತ ಹಳೆಯವು ಎಂದು ಕೇಂದ್ರ ಜಲಶಕ್ತಿ ಸಚಿವ ಗಜೇಂದ್ರ ಸಿಂಗ್‌ ಲೋಕಸಭೆಯಲ್ಲಿ ತಿಳಿಸಿದ್ದಾರೆ. ಅಣೆಕಟ್ಟು ಸುರಕ್ಷತಾ ವಿಧೇಯಕ ಮಂಡಿಸಿ ಅವರು ಮಾತನಾಡಿದರು. ವಿಧೇಯಕದಲ್ಲಿ ಪ್ರಸ್ತಾಪ ಮಾಡಿದಂತೆ ರಾಷ್ಟ್ರೀಯ ಅಣೆಕಟ್ಟು ಸುರಕ್ಷಾ ಪ್ರಾಧಿಕಾರ ರಚಿಸಿ ಅವುಗಳ ರಕ್ಷಣೆ, ನಿರ್ವಹಣೆ ಮಾಡಲಾಗುತ್ತದೆ. ಜತೆಗೆ ರಾಜ್ಯಗಳ ನಡುವಿನ ಬಿಕ್ಕಟ್ಟು ಪರಿಹಾರದ ಹೊಣೆಯೂ ಅದಕ್ಕೆ ಸಿಗಲಿದೆ.

ಕ್ಷಮೆ ಕೇಳಿದ ಅಜಂ ಖಾನ್‌

ಬಿಜೆಪಿ ಸಂಸದೆ, ಡೆಪ್ಯುಟಿ ಸ್ಪೀಕರ್‌ ರಮಾ ದೇವಿ ವಿರುದ್ಧ ಅವಹೇಳನಕಾರಿ ಮಾತುಗಳನ್ನಾಡಿದ್ದ ಸಮಾಜವಾದಿ ಪಕ್ಷದ ಸಂಸದ ಅಜಂ ಖಾನ್‌ ಕೊನೆಗೂ ಕ್ಷಮೆ ಯಾಚಿಸಿದ್ದಾರೆ. ಸೋಮವಾರ ಲೋಕಸಭೆ ಕಲಾಪ ಶುರುವಾಗುತ್ತಲೇ, ಸ್ಪೀಕರ್‌ ಓಂ ಬಿರ್ಲಾ ಅವರು ಖಾನ್‌ಗೆ ಕ್ಷಮೆ ಕೋರುವಂತೆ ಸೂಚಿಸಿದರು. ಈ ವೇಳೆ ಖಾನ್‌, ‘ಒಂಬತ್ತು ಬಾರಿ ಶಾಸಕ, ನಾಲ್ಕು ಬಾರಿ ಸಚಿವ, ಒಂದು ಬಾರಿ ರಾಜ್ಯಸಭೆ ಸದಸ್ಯನಾಗಿದ್ದ ತಮಗೆ ಸಂಸದೀಯ ನಡಾವಳಿ ಗೊತ್ತಿದೆ. ಇದರ ಹೊರತಾಗಿಯೂ ನನ್ನ ಮಾತುಗಳಿಂದ ಯಾರಿಗಾದರೂ ನೋವಾಗಿದ್ದರೆ, ಕ್ಷಮೆ ಕೋರುತ್ತೇನೆ’ ಎಂದರು. ಖಾನ್‌ ಹೇಳಿಕೆಯ ಕೆಲವು ಶಬ್ದಗಳು ಕೇಳದೇ ಇದ್ದುದರಿಂದ ಸಂಸದೀಯ ವ್ಯವಹಾರಗಳ ಸಚಿವ ಪ್ರಹ್ಲಾದ್‌ ಜೋಶಿ ಕ್ಷಮೆ ಕೇಳುವ ವಾಕ್ಯಗಳನ್ನು ಮತ್ತೂಮ್ಮೆ ಪುನರಾವರ್ತಿಸಬೇಕು ಎಂದು ಸಲಹೆ ನೀಡಿದರು. ಇದಕ್ಕೆ ಸದನದಲ್ಲಿ 2 ಬಾರಿ ಸ್ಪೀಕರ್‌ ಆ ಮಾತುಗಳನ್ನು ಪುನರಾವರ್ತಿಸುವಂತೆ ಹೇಳಿದರು.

ಕಣ್ಣೀರು ಹಾಕಿದ ನಾಯ್ಡು

ಕೇಂದ್ರದ ಮಾಜಿ ಸಚಿವ ಎಸ್‌.ಜೈಪಾಲ್ ರೆಡ್ಡಿ ಅವರಿಗೆ ರಾಜ್ಯಸಭೆಯಲ್ಲಿ ಶ್ರದ್ಧಾಂಜಲಿ ಸಲ್ಲಿಸುವ ವೇಳೆ ರಾಜ್ಯಸಭಾ ಸಭಾಪತಿ ವೆಂಕಯ್ಯ ನಾಯ್ಡು ಅವರು ಕಣ್ಣೀರು ಹಾಕಿದ ಘಟನೆ ನಡೆದಿದೆ. 1990ರ ಏಪ್ರಿಲ್ನಿಂದ 1996ರ ಏಪ್ರಿಲ್ ಮತ್ತು 1997ರ ಸೆಪ್ಟೆಂಬರ್‌ನಿಂದ 1998ರ ಮಾರ್ಚ್‌ ನಲ್ಲಿ ರೆಡ್ಡಿ ಅವರು ಅವಿಭಜಿತ ಆಂಧ್ರಪ್ರದೇಶದಿಂದ ರಾಜ್ಯಸಭೆ ಸದಸ್ಯರಾಗಿದ್ದರು. ರೆಡ್ಡಿ ನಿಧನರಾಗಿರುವ ಬಗ್ಗೆ ಸಂತಾಪ ಸೂಚಕ ನಿರ್ಣಯ ಓದುತ್ತಿರುವಾಗಲೇ, ಸಭಾಪತಿ ವೆಂಕಯ್ಯ ನಾಯ್ಡುಗೆ ದುಃಖ ಉಕ್ಕಿ ಬಂತು. ‘ಎಸ್‌.ಜೈಪಾಲ್ ರೆಡ್ಡಿ ನಿಧನದಿಂದ ದೇಶ ಅಪ್ರತಿಮ ಸಂಸದೀಯಪಟುವನ್ನು ಕಳೆದುಕೊಂಡಿದೆ. ಅವರು ಉತ್ತಮ ವಾಗ್ಮಿ ಮತ್ತು ಆಡಳಿತಗಾರ’ ಎಂದು ಕೊಂಡಾಡಿದರು.