ಕೇರಳದಲ್ಲಿ ಇಂದಿನಿಂದ 928 ವಸ್ತುಗಳ ಬೆಲೆ ಏರಿಕೆ

Team Udayavani, Aug 1, 2019, 6:43 PM IST

ತಿರುವನಂತಪುರ: ಕಳೆದ ಬಾರಿಯ ಮಹಾಮಳೆಯಿಂದಾಗಿ ಪ್ರವಾಹಕ್ಕೀಡಾಗಿರುವ ಪ್ರದೇಶಗಳಲ್ಲಿ ಮತ್ತೆ ರಸ್ತೆ ನಿರ್ಮಾಣಕ್ಕೆ ಮುಂದಾಗಿರುವ ಕೇರಳ ಸರಕಾರ ಆ.1ರಿಂದ 928 ವಸ್ತುಗಳ ಮೇಲೆ ವಿಶೇಷ ತೆರಿಗೆ ಹೇರಿದೆ.

ಶೇ.1ರಷ್ಟು ಪ್ರವಾಹ ಸೆಸ್ ಅನ್ನು ಅದು ವಿಧಿಸಿದ್ದು, ಇದರಿಂದ ವಸ್ತುಗಳ ಬೆಲೆಯಲ್ಲಿ ತುಸು ಏರಿಕೆಯಾಗಿದೆ. ಈ ಸೆಸ್ ಜಿಎಸ್ಟಿ ಸ್ಲ್ಯಾಬ್ ನಲ್ಲಿರುವ ಶೇ.12ರಷ್ಟು ತೆರಿಗೆ ಹೊಂದಿದ ವಸ್ತುಗಳು, ಶೇ.18ರಷ್ಟು ಮತ್ತು ಶೇ.28ರಷ್ಟು ತೆರಿಗೆ ಹೊಂದಿದ ವಸ್ತುಗಳಿಗೂ ಅನ್ವಯವಾಗುತ್ತದೆ.

ಪೆಟ್ರೋಲ್, ಡೀಸೆಲ್ ಮತ್ತು ಮದ್ಯದ ಮೇಲೆ ಈ ಪ್ರವಾಹ ಸೆಸ್ ಹಾಕಲಾಗಿಲ್ಲ. ಅಲ್ಲದೆ ಶೇ.0ಯಿಂದ ಶೇ.5ರ ಸ್ಲ್ಯಾಬ್ನಲ್ಲಿರುವ ವಸ್ತುಗಳಿಗೂ ಕರ ಹಾಕಲಾಗಿಲ್ಲ. ಶೇ.1ರಷ್ಟು ತೆರಿಗೆ ವಿಧಿಸಿದ ಬಹುತೇಕ ವಸ್ತುಗಳ ಶೇ.12ರ ಜಿಎಸ್ಟಿ ಸ್ಲ್ಯಾಬ್ ಅಡಿಯಲ್ಲಿ ಬರುತ್ತವೆ ಎಂದು ಸರಕಾರದ ಮೂಲಗಳು ಹೇಳಿವೆ. ಕಾರು, ಬೈಕ್, ಟಿ.ವಿ. ಫ್ರಿಡ್ಜ್, ವಾಷಿಂಗ್ ಮಷೀನ್, ಮೊಬೈಲ್ ಫೋನ್, ಔಷಧ, ಸಿಮೆಂಟ್, ಪೈಂಟ್ ಇತ್ಯಾದಿಗಳಿಗೆ ವಿಶೇಷ ತೆರಿಗೆ ಅನ್ವಯವಾಗಲಿದೆ. ಇದರಿಂದ ಕಾರಿನ ಬೆಲೆ 8 ಲಕ್ಷ ರೂ. ಆಗಿದ್ದರೆ, 8 ಸಾವಿರ ರೂ.ಹೆಚ್ಚುವರಿ ತೆರಿಗೆಯಿರಲಿದೆ. ಬೈಕ್‌ ನ ಬೆಲೆ 80 ಸಾವಿರ ರೂ. ಆಗಿದ್ದರೆ, 800 ರೂ. ಟಿ.ವಿ.ದರ 30 ಸಾವಿರ ರೂ. ಆಗಿದ್ದರೆ 300 ರೂ. ಕರ ವಿಧಿಸಲಾಗುತ್ತದೆ.