ದೋಣಿ ಅಪಘಾತ: ಮೀನುಗಾರರ ರಕ್ಷಣೆ

Team Udayavani, Aug 4, 2019, 9:33 AM IST

ಮಂಗಳೂರು: ತಣ್ಣೀರು ಬಾವಿ ಬೀಚ್‌ ಬಳಿ ಮೀನುಗಾರಿಕೆ ನಡೆಸುತ್ತಿದ್ದ ದೋಣಿಯೊಂದು ಶನಿವಾರ ಅಲೆಗಳ ಅಬ್ಬರಕ್ಕೆ ಸಿಲುಕಿ ಅಪಘಾತಕ್ಕೀಡಾಗಿದ್ದು, ಅದರಲ್ಲಿದ್ದ ಎಲ್ಲ 9 ಮಂದಿ ಮೀನುಗಾರರನ್ನು ಇನ್ನೊಂದು ಮೀನುಗಾರಿಕಾ ದೋಣಿಯವರು ರಕ್ಷಿಸಿದ್ದಾರೆ.

ಶಬೀರ್‌, ನಾಸಿರ್‌, ರಿಯಾಜ್‌, ಆಶಿಕ್‌, ಲಕ್ಷ್ಮಣ್‌, ಎಲ್‌.ಆರ್‌.ರಾವ್‌, ಕೃಷ್ಣ, ಗುರು ಮತ್ತು ಪವ ನ್‌ ಈ ಬೋಟ್‌ನಲ್ಲಿದ್ದರು.

ಬೆಳಗ್ಗೆ 7.45ಕ್ಕೆ ಸಸಿಹಿತ್ಲು ಶಬೀರ್‌ ಮಾಲಕತ್ವದ “ಶಬೀರ್‌’ ಎಂಬ ಹೆಸರಿನ ದೋಣಿಯು ತಣ್ಣೀರುಬಾವಿ ಬೀಚ್‌ ಬಳಿ ಸಮುದ್ರದಲ್ಲಿ ಮೀನುಗಾರಿಕೆ ನಡೆಸುತ್ತಿತ್ತು. ಈ ಸಂದರ್ಭ ಬೀಸಿದ ಗಾಳಿ ಮತ್ತು ಸಮುದ್ರಗಳ ಅಲೆಗಳ ಅಬ್ಬರಕ್ಕೆ ಸಿಲುಕಿ ದೋಣಿ ಮಗುಚಿ ಬಿದ್ದು ಅದರಲ್ಲಿದ್ದ 9 ಮಂದಿ ನೀರಿಗೆ ಬಿದ್ದು ಅಪಾಯದಲ್ಲಿದ್ದರು. ಕೂಡಲೇ ಸಮೀಪದಲ್ಲಿದ್ದ “ಸುವರ್ಣ ಕುಸುಮ’ ಹಾಗೂ “ಶ್ರೀರಾಮ’ ದೋಣಿಯವರು ಅವರನ್ನು ರಕ್ಷಿಸಿದರು. ಮುಳುಗಿದ ದೋಣಿಯನ್ನು ಬಳಿಕ ಸ್ಥಳೀಯರ ಸಹಕಾರದಿಂದ ಸಮುದ್ರದ ದಡಕ್ಕೆ ಎಳೆದು ತರಲಾಯಿತು. ದೋಣಿಯಲ್ಲಿದ್ದ ಮೀನುಗಾರರು ಸುರಕ್ಷಿತರಾಗಿದ್ದಾರೆ