ಜಮ್ಮು ಕಾಶ್ಮೀರ ವಿಶೇಷ ಸ್ಥಾನಮಾನ ರದ್ದತಿಗೆ ಸಂಭ್ರಮ

Team Udayavani, Aug 6, 2019, 11:28 AM IST

ಹೊನ್ನಾಳಿ: ಜಮ್ಮು-ಕಾಶ್ಮೀರ್‌ ವಿಶೇಷ ಸ್ಥಾನಮಾನದ ವಿಧಿ 370, 35(ಎ) ರದ್ದು ಮಾಡಿದ ಕೇಂದ್ರ ಸರ್ಕಾರದ ನಿರ್ಧಾರವನ್ನು ಸ್ವಾಗತಿಸಿ ಶಾಸಕ ಎಂ.ಪಿ.ರೇಣುಕಾಚಾರ್ಯ ನೇತೃತ್ವದಲ್ಲಿ ಸೋಮವಾರ ಪಟ್ಟಣದ ಸಂಗೊಳ್ಳಿರಾಯಣ್ಣ ವೃತ್ತದಲ್ಲಿ ತಾಲೂಕು ಬಿಜೆಪಿ ಕಾರ್ಯಕರ್ತರು ಪಟಾಕಿ ಸಿಡಿಸಿ, ಸಿಹಿ ಹಂಚಿ ವಿಜಯೋತ್ಸವ ಆಚರಿಸಿದರು.

ಶಾಸಕ ಎಂ.ಪಿ. ರೇಣುಕಾಚಾರ್ಯ ಮಾತನಾಡಿ, ಒಂದು ದೇಶದಲ್ಲಿ ಎರಡು ಕಾನೂನು, ಎರಡು ಧ್ವಜ ಸೇರಿದಂತೆ ವಿವಿಧ ಪ್ರತ್ಯೇಕ ವ್ಯವಸ್ಥೆಗಳನ್ನು ಅಂದಿನಿಂದ ಇಂದಿನವರೆಗೂ ಬೆಂಬಲಿಸಿಕೊಂಡು ಬಂದ ಪ್ರತ್ಯೇಕತಾವಾದಿಗಳು ಹಾಗೂ ಭಯೋತ್ಪಾದಕರು ಅಲ್ಲಿನ ಜನ ಸಾಮಾನ್ಯರ ಬದುಕಿನ ಜತೆ ಚೆಲ್ಲಾಟ ಆಡುತ್ತಿದ್ದರು. ಈಗ ಆ ಎಲ್ಲದಕ್ಕೂ ಕೇಂದ್ರ ಸರ್ಕಾರ ಐತಿಹಾಸಿಕ ಕ್ರಮ ಕೈಗೊಂಡು ಪೂರ್ಣವಿರಾಮ ಹಾಕಿದೆ ಎಂದು ಹೇಳಿದರು.

ಸ್ವಾತಂತ್ರ್ಯಾನಂತರ ಅಲ್ಲಿ ನಮ್ಮ ರಾಷ್ಟ್ರಧ್ವಜ ಹಾರಾಡುವುದೂ ಕಷ್ಟಸಾಧ್ಯವಾಗಿತ್ತು. ನಮ್ಮ ಕಾಶ್ಮೀರಿ ಪಂಡಿತರ ಕುಟುಂಬಗಳನ್ನು ಹಿಂಸಿಸಿ ಮನೆಯಿಂದ ಹೊರಹಾಕಿ ಅಟ್ಟಹಾಸ ಮೆರೆಯುತ್ತಿದ್ದನ್ನು ನಾವು ನೀವೆಲ್ಲ ನೋಡಿದ್ದಾಗಿದೆ. ಅಂತಹ ಎಲ್ಲಾ ದುಷ್ಕೃತ್ಯಕ್ಕೆ ಕೊನೆ ಹಾಕಲಾಗಿದೆ ಎಂದರು.

ಜಮ್ಮು ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ನೀಡಿದ್ದ ಆರ್ಟಿಕಲ್ 370, 35(ಎ) ಅನ್ನು ಬಹುವಾಗಿ ವಿರೋಧಿಸಿದ್ದ ಅಂದಿನ ಜನಸಂಘದ ಮುಖಂಡರಾದ ಶ್ಯಾಂಪ್ರಕಾಶ್‌ ಮುಖರ್ಜಿ 1953ರಲ್ಲಿ ರೈಲಿನಲ್ಲಿ ಹೋಗುವಾಗ ಕೊಲೆ ಮಾಡಿಸಲಾಯಿತು. ಇದರಿಂದ ಕೊನೆಗೂ ಅವರು ಜಮ್ಮು ಕಾಶ್ಮೀರ ತಲುಪಲೇ ಇಲ್ಲ ಎಂದರು.

ರಾಜಕೀಯ ತುಷ್ಟೀಕರಣದಿಂದಾಗಿ ಅಲ್ಲಿನ ಹಿಂದೂಗಳ ಗೋಳನ್ನು ಕೇಳುವವರು ಯಾರೂ ಇಲ್ಲದಂತಾಗಿತ್ತು. ಸುಮಾರು 2 ಲಕ್ಷ ಹಿಂದೂಗಳನ್ನು ಜಮ್ಮು ಮತ್ತು ಕಾಶ್ಮೀರದಿಂದ ಓಡಿಸಲಾಯಿತು. ಅವರೆಲ್ಲ ದೆಹಲಿ, ಪಂಜಾಬ್‌, ರಾಜಸ್ಥಾನ್‌, ಉತ್ತರಪ್ರದೇಶ ಹಾಗೂ ಇನ್ನಿತರ ರಾಜ್ಯಗಳ ಬೀದಿ ಬದಿಯಲ್ಲಿ ಆಶ್ರಯ ಪಡೆಯುವಂತಾಯಿತು. ಜಮ್ಮು ಕಾಶ್ಮೀರಕ್ಕೆ ನೀಡಿದ್ದ ವಿಶೇಷ ಸ್ಥಾನಮಾನ ರದ್ದತಿಗೆ ಹೋರಾಟ ಮಾಡುತ್ತ ಪ್ರಾಣತ್ಯಾಗ ಮಾಡಿದ ಎಲ್ಲರ ಆತ್ಮಕ್ಕೆ ಇಂದು ಶಾಂತಿ ಲಭಿಸಿದೆ ಎಂದರು.

ತಾಲೂಕು ಬಿಜೆಪಿ ಅಧ್ಯಕ್ಷ ಡಿ.ಜಿ.ರಾಜಪ್ಪ, ನೆಲಹೊನ್ನೆ ಮಂಜುನಾಥ್‌, ಕುಬೇರಪ್ಪ, ಸತೀಶ್‌, ರಂಗನಾಥ್‌ ಸೇರಿದಂತೆ ಬಿಜೆಪಿ ಕಾರ್ಯಕರ್ತರು ಉಪಸ್ಥಿತರಿದ್ದರು.